Gûco 24 - ÎVUKU RÎA ÛVORO MWARO

Gûtecana na kûvikania rîngî

¹ “Mûndûmûrûme angîvikia mûndûmûka na acoke ecirie kûmûta nîûndû wa kwona arî na ûndû ûtakûmûkenia, nwa andîkîre mûndûmûka ûcio maarûa ya kûmûta, amûnengere na amwîngate aume nyomba yake.

² Ethîrwa mûndûmûka ûcio nwa avikue nî mûndûmûrûme wîngî,

³ na wanake ecirie kûmûta, nwa andîkîre mûndûmûka ûcio maarûa ya kûmûta, amûnengere na amwîngate aume nyomba yake. Narîo mûndûmûrûme ûcio wa kaîrî angîkua,

⁴ mûndûmûrûme ûrîa wamûvikîtie mbere ndangîmwoca rîngî atuîke mûka arî na mûgiro. Ûndû ûcio nî mûcûku mbere ya Ngai-Mûnene. Mûtigatûme vûrûri ûrîa Ngai-Mûnene Ngai wenyu akûmûva ûnyitwa nî wîvia.

Mawatho mwanya mwanya

⁵ “Rîrîa mûndûmûrûme avikania wa rîo, ndagîrîrwe nî kûthiî mbaararî kana kûruta wîra wa wonthe wa mwîngî. Agîrîrwe nî gwîkara mûciî îvinda rîa mwaka ûmwe agîkenagia mûka ûcio avikîtie.

⁶ “Rîrîa wakovithia mûndû kîndû, ndûgooce îthiga kana nthio yake, atî nîguo wîkare nayo nginya rîrîa akaarîva; nîûndû gwîka ûguo nî gûcuuna mûciî kîrîa mavaragîrîria gîa kûrîa nakîo nîguo matûûre mwoyo.

⁷ “Mûisiraeli angînyitwa akîya Mûisiraeli ûrîa wîngî, na acoke amûtue ngombo kana amwendie, mûndû ûcio nwanginya akaaûragwa. Ûguo nîguo mûkaathiragia wîvia ûcio gatagatîrî kenyu.

⁸ “Rîrîa mûndû arwara mûrimû mûcûku wa ngothi, nîathiî kûrî mûthînjîri-Ngai Mûlawi na amenyerere eke maûndû monthe marîa mûthînjîri-Ngai akaamwîra wata ûrîa namaathire.

⁹ Ririkanani ûrîa Ngai-Mûnene Ngai wenyu eekire Miriamu rîrîa mwarî rûgendorî mumîte Misiri.

¹⁰ “Rîrîa wakovithia mûndû ûrîa wîngî kîndû wa kîonthe, ndûkathiî gwake mûciî kûgîra kîndû gîa kûrûngamîrîra kîrîa ûmûkovithîtie.

¹¹ Etagîrîra vau nja na mûndû ûcio ûkovithîtie kîndû agaakûretere kîrîa mwarîkanîre.

¹² Ethîrwa mûndû ûcio nî mûthîni ndûkamûrarîrie kîrîa mûrîkanîrîte.

¹³ Mûcokagîrie kîndû kîu kîvwaî wa kîu nîguo akîmama agagûcokeria ngatho, nake Ngai-Mûnene, Ngai waku agakenagua nîwe.

¹⁴ “Ndûkaverithie mûndû mûthîni na ngîa ûrîa wandîkîte, arî wa andû enyu Aisiraeli kana arî mûgeni kuuma îtûûrarî rîmwe rîa vûrûri wenyu.

¹⁵ Marîvageni wa mûthenya wîra ûrîa matinda makîruta mbere ya gûtuka, nîûndû methagîrwa mevokete mbeca icio. Ûngîrega kûmarîva, nwa marîrîre Ngai-Mûnene, naguo ûndû ûcio ûgatuîka wîvia kûrî mue.

¹⁶ “Aciari matikaaûragwa nîûndû wa wîvia wa ciana ciao, nacio ciana itikaaûragwa nîûndû wa wîvia wa aciari ao. Wa mûndû akaaûragwa nîûndû wa wîvia ûrîa ekîte ke mwene.

¹⁷ “Mûtikaime ageni kana ciana cia ndigwa kîvooto Kîamo, kana mwoce nguo ya mûndûmûka wa ndigwa îrî kîndû gîa kûrûngamîrîra kîndû kîrîa akovithîtue.

¹⁸ Ririkanani atî mwarî ngombo vûrûrirî wa Misiri na Ngai-Mûnene Ngai wenyu akîmûkûûra kuo. Kîu nîkîo gîtûmîte nîmwatha mwîke maûndû mama.

¹⁹ “Rîrîa mwaketha irio na mwatigaria imwe kûu mûgûndarî mûtigaicokere. Icio ikethagîrwa irî cia ageni, ciana cia ndigwa, na aka a ndigwa; nake Ngai-Mûnene Ngai wenyu akaarathimaga mawîra menyu monthe.

²⁰ Rîrîa mwaketha ndamaiyû, mûtigacokere irîa ciatigara. Icio nî cia ageni, ciana cia ndigwa na aka a ndigwa.

²¹ Rîrîa mwaketha thavibu, mûtigacokere irîa ciatigara. Icio nî cia ageni, ciana cia ndigwa na aka a ndigwa.

²² Ririkanani atî mwarî ngombo vûrûrirî wa Misiri, na kîu nîkîo gîtûmîte nîmwatha mwîke maûndû mama.