Gûco 23 - ÎVUKU RÎA ÛVORO MWARO

Kwamûranua na andû a Ngai

¹ “Mûndûmûrûme wa wonthe mûkarambe kana mûtinie kîîga gîake gîa ûciari, tî mwîtîkîrie kwîthîrwa arî ûmwe wa kîûngano Kîam andû a Ngai-Mûnene.

² “Mwana wa wonthe ûciarîtwe nî mwîrîtu atarî mûvikie, wana ciana ciake cionthe nginya rûciaro rwa îkûmi, matigaatonya kîûnganorî Kîam andû a Ngai-Mûnene.

³ “Gûtirî mûndû wa kuuma vûrûrirî wa Aamoni kana wa Moabu, kana njiarwa ciao cionthe nginya rûciaro rwa îkûmi ûgeetîkîrua gûtonya kîûnganorî Kîam andû a Ngai-Mûnene.

⁴ Nîmaaregire kûmûva irio kana kûmûkundia manjî rîrîa mwaumaga Misiri, na makîandîka Balaamu mûvîcî wa Beori kuuma Pethori kûu Mesopotamia nîguo amûrume.

⁵ Nwatî Ngai-Mûnene Ngai wenyu ndaathikîrîria Balaamu. Vandû va ûguo kîrumi kîu gîacokire gûtuîka kîrathimo kûrî mue; nîûndû Ngai-Mûnene Ngai wenyu nîamwendete.

⁶ Rîrîa rîonthe mûgûtûûra mwoyo mûtigeke ûndû wanarî ûmwe ûngîtûma andû a mavûrûri mama meganîre.

⁷ “Mûtigatume ûthû na andû a vûrûri wa Edomu nîûndû acio nî aa mûrwanyûkwe. Mûtigatume ûthû na andû a Misiri, nîûndû vîndî îmwe mwarî ageni vûrûrirî wao.

⁸ Ciana ciao, kuuma rûciaro rwa kathatû kûthiî na mbere, nwa metîkîrue gûtonya kîûnganorî Kîam andû a Ngai-Mûnene.

Ûtheru rîrîa andû marî kûrîa mambîte magema

⁹ “Rîrîa mûrî varîa athigari mambîte magema vîndî ya mbaara, mûtikavutie kîndû wa kîonthe kîngîtûma mûgîa na gîko.

¹⁰ Kûngîkethîrwa kûrî mûndû ûrî na gîko gatagatîrî kenyu, nîûndû wa kwîthîrwa aumîtwe nî vinya wa ûciari ûtukû, mûndû ûcio nîakaauma athiî na kûu nja ya kûrîa mwambîte magema na ekare kuo.

¹¹ Gûgîkinya kîvwaî nîakethambia na manjî, na riûa rîathûa nîagaacoka kûu mwambîte magema.

¹² “Nwanginya mwîthagîrwe na vandû nja ya varîa mwambîte magema varîa mûndû angîthiî gwîtetheria.

¹³ Îthagîrwani mûrî na mûtî vîndî cionthe, nîguo rîrîa ûngîgua ûkîenda gwîtethia, wînjage îrima rîa gwîtetheria, na warîkia gwîtethia ûkathika mai mau naguo.

¹⁴ Mavinda monthe rîrîa mûrî magemarî menyu, îthagîrwani mûrî atheru. Nîûndû Ngai-Mûnene Ngai wenyu ethagîrwa arî vamwe namue kûu mwambîte magema akîmûgitîra na akîmûvotithia kûvoota nthû cienyu. Kwoguo mûtigatûme Ngai-Mûnene Ngai wenyu oona ûndû mûcûku gatagatîrî kenyu ûngîtûma amûtiganîria.

Mawatho mwanya mwanya

¹⁵ “Ngombo îngîtoroka kuuma kûrî mwathi wayo na yûke kûu Isiraeli îkîenda mûmîgitîre, mûtikamîcokie kûrî mwathi wayo.

¹⁶ Nîagekara kûu kwenyu îtûûrarî wa rîrîa rîonthe îngîthuura; mûtikamûvinyîrîrie.

¹⁷ “Gûtirî Mûisiraeli, mûndûmûrûme kana mûndûmûka ûgatuîka îraa rîa ndini.

¹⁸ Mûtikanavire nyombarî ya Ngai kîrîa kîonekete kuumana na wîra wa ûmaraa, ûrî wa aka kana ûrî wa arûme, kîrî gîa kûrîva kîrîa wîranîrîte na mwîvîtwa. Ngai-Mûnene Ngai wenyu nîathûrîte ciîko icio wa cioîrî.

¹⁹ “Rîrîa Mûisiraeli akovithia Mûisiraeli ûrîa wîngî kîndû ta mbeca, irio, kana kîndû wa kîonthe kîngîgîa na maciaro, ndakamwîtie maciaro.

²⁰ Nwa mwîtie mûgeni maciaro ma kîrîa mûmûkovithîtie, nwatî mûtigetie Mûisiraeli ûrîa wîngî maciaro. Mwathîkîra watho ûyû Ngai-Mûnene Ngai wenyu nîakaamûrathimîra mawîra menyu monthe marîa mûkaaruta mûrî vûrûrirî ûrîa mûgaatonya mwîgwatîre.

²¹ “Rîrîa werîra Ngai-Mûnene, Ngai waku ûndû na mwîvîtwa, ndûkarege kûûvingia; nîûndû Ngai-Mûnene, Ngai waku nîakenda ûvingie ûndû ûcio, na nî wîvia kûrega kûûvingia.

²² Mûndû angîrega kwîvîta ndangîthîrwa evîtie.

²³ Nwatî mûndû angîranîra ûndû na mwîvîtwa, nwanginya aûvingie na kinyi, nîûndû ethagîrwa eranîrîte ûndû ûcio mbere ya Ngai-Mûnene Ngai wake atakûringîrîrua.

²⁴ “Ûngîvîtûkîrîra mûgûndarî wa mîthavibu wa mûndû, nwa ûrîe thavibu wa irîa ûngîvota kûrîa, nwatî ndûgekîre imwe kîondorî ûthiî nacio.

²⁵ Ûngîvîtûkîrîra mûgûndarî wa ngano wa mûndû, nwa ûtue wa irîa ûngîvota kûrikitha na njara, nwatî ndûgateme ngano na kaviû ka gûketha.