Gûco 22 - ÎVUKU RÎA ÛVORO MWARO

¹ “Ûngîona ng'ombe kana ng'ondu ya Mûisiraeli ûrîa wîngî îrî mbûru ndûkamîtige, nwatî ûkaamîcokia gwake mûciî.

² Nwatî ethîrwa mwene yo atûûraga kûndû kûraca, kana ndwîcî mwene yo, ûkaathiî nayo mûciî gwaku rîrîa mwene yo agaaûka akîmîcaragia, ûkaamûnengera yo.

³ Îkagani wa ûguo mûngîona mvunda, nguo, kana kîndû wa kîonthe Kîam mûrwanyûkwe kîûrîte. Ndûkarege kûmûtethia.

⁴ “Ûngîona mvunda kana ng'ombe ya mûrwanyûkwe îgwîte, ndûkamîtiganîrie, mûtethererie kûmîûkîria.

⁵ “Aka matigekagîre nguo cia arûme kana arûme mekagîre nguo cia aka. Ngai-Mûnene Ngai wenyu nîathûrîte ûndû ûcio.

⁶ “Ûngîona kîomba Kîam gîconi kîrî mûtîrî kana nthî, na ng'ina îthîrwe kuo îkunîkîrîte matumbî kana twana twa kîo, ndwagîrîrwe nî gwoca gîconi kîu vamwe na twana twa kîo.

⁷ Nwa woce twana, nwatî ûrekererie ng'ina îthiî. Weka ûguo nîûkaagîa na ûtûûro mwaro na ûtûûre mîaka mîngî.

⁸ “Rîrîa ûgaatuma nyomba njerû ûkaamîrigicîria na rûthingo rûkuvî mîena yonthe îgûrû rîayo nîguo mûndû wa wonthe angîgwa akue aumîte îgûrû rîayo, andû a nyomba yaku matikagwatwe nî wîvia wa kûragana.

⁹ “Ndûkavande mîmera îngî mûgûndarî ûrîa ûvandîte mîthavibu, nîûndû weka guo, ndûrî mwîtîkîrie gûtûmîra maciaro ma mîmera îo îngî wana ma mîthavibu.

¹⁰ “Ndûkarîme mûgûnda na mûraû wovete ndegwa na mvunda vamwe.

¹¹ “Ndûgekîre nguo îtumîtwe na guoya na ndigi itukanîte.

¹² “Tumagîrîrani mîkumbû mîthiiarî îna ya nguo cienyu.

Mawatho megiî andû arîa mavikanîtie

¹³ “Mûndû nwa avikie mûndûmûka na arîkia kûmenyana nake kîîmwîrî amûmene,

¹⁴ na amûcambie akiugaga atî, rîrîa maavikanirie mûndûmûka ûcio ndaarî nthingi.

¹⁵ “Ethîrwa ûndû ûcio nwa wîkîke, îthe na ng'ina a mûndûmûka ûcio nîmagooca cuka îrîa yamamîrîtwe nî mûviki na mûvikania mûthenya ûrîa maavikanirie mavirîre atongoria a îtûûra vau kîvingorî ûrî ûira atî, mwîrîtu wao aarî nthingi.

¹⁶ Îthe wa mwîrîtu nîakeera atongoria atî: ‘Nînavere mûndû ûyû mwarîwa amûvikie na rîu nîwamûmena.

¹⁷ Nîamûcambîtie akiugaga atî, mwarîwa ndoona mûndûmûka ûcio arî nthingi vîndî îrîa aamûvikirie. Nwatî aciari nîmagooca cuka îrîa mûviki na mûvikania maamamîre mûthenya wa ûviki na nîmakaamîkûnjûra mbere ya athuuri nîguo îtuîke ûira atî mwarî aarî nthingi!’

¹⁸ Atongoria a îtûûra nîmagaacoka manyite mûndûmûrûme ûcio na mamûrive na kîvoko.

¹⁹ Nîmagaacoka mamwîtie vaini ya sîlûva îgana rîmwe na manengere îthe wa mwîrîtu ûcio, nîûndû mûndûmûrûme ûcio wamûvikîtie nîaconorithîtie mûndûmûka nthingi Mûisiraeli. Mûndûmûka ûcio nîathiî na mbere gûtuîka mûka na ndakaamûta ûtûûrorî wake wonthe.

²⁰ “Nwatî ethîrwa îthitanga rîu nî rîa ma na gûtirî na ûndû wa kwonania atî ke aarî nthingi,

²¹ atongoria a îtûûra nîmagooca mûndûmûka ûcio na mamûvire mûromorî wa nyomba ya îthe na mamûragîre vo na mathiga, nîûndû nîaconorithîtie andû a Isiraeli na njîra ya kwîvecana amenywe kîîmwîrî mbere ya avikue. Ûguo nîguo mûkaathiria wîvia ûcio gatagatîrî kenyu.

²² “Mûndûmûrûme angîkaanyitwa akîmenyana kîîmwîrî na mûka wa mûndû wîngî, wa oîrî nîmakaaûragwa. Ûguo nîguo mûkaathiria wîvia ûcio gatagatîrî kenyu.

²³ “Ethîrwa kûrî mwîrîtu nthingi marîkanîrîte na mwanake atî nîmakûvikania, na acoke anyitîrwe îtûûrarî makîmenyana kîîmwîrî na mûndûmûrûme wîngî,

²⁴ oîrî nîmakaavirwa nja ya îtûûra na maûragîrwe vo na mathiga. Mwîrîtu ûcio akaaûragwa nîûndû anyitwa ndaauga mbu atethue, wana ethîrwa aarî îtûûrarî. Nake mûndûmûrûme akaaûragwa nîûndû wa kûmenyana kîîmwîrî na mwîrîtu warî mwîrîre atî nîakûvikua nî mûndû wîngî. Ûguo nîguo mûkaathiria wîvia ûcio gatagatîrî kenyu.

²⁵ “Nwatî ethîrwa mûndûmûrûme nwa acemanie na mwîrîtu mwîrîre atî nîakûvikua na amûmenye kîîmwîrî na vinya, mûndûmûrûme ûcio wîkîte ûguo nîke ûkaaûragwa wenga.

²⁶ Mwîrîtu ûcio ndagekwe wanarî ûndû. Gûtirî wîvia ekîte wa gûtûma aûragwe. Ûyû nîta ciira wa mûndû atharîkîrîte mûndû ûrîa wîngî akînamûraga,

²⁷ nîûndû mûndûmûrûme ûcio aamenyanire na mwîrîtu ûcio kîîmwîrî na vinya arî kûndû gûtarî andû; kwoguo wana ethîrwa nîwaugire mbu, gûtirî mûndû wathiîre kûmûtigithia.

²⁸ “Mûndûmûrûme angîmenyeka atî nîanyitîte mwîrîtu nthingi ûtarî mwîrîre atî nîakûvikua nî mûndû na akamenyana nake kîîmwîrî na vinya,

²⁹ mûndû ûcio nîakaaraîria îthe wa mwîrîtu ûcio sîlûva mîrongo îtano, nîûndû aanyitire mwîrîtu ûcio na akîmenyana nake kîîmwîrî na vinya. Mwîrîtu ûcio nîagaatuîka mûka wa mûndû ûcio ûtûrorî wake wonthe.

³⁰ “Gûtirî mûndûmûrûme ûkaamenyana kîîmwîrî na mûka wa îthe, nîûndû gwîka ûguo nî gûconorithia îthe.