Gûco 2 - ÎVUKU RÎA ÛVORO MWARO

Mîaka îrîa andû a Isiraeli meekarire werûrî makîûrûraga

¹ “Vuva wa ûguo nîtwagarûrûkire na tûkîthiî werûrî tûthiîte na njîra îrîa yavîtûkîrîrîte Îria Îtune, wata ûrîa Ngai-Mûnene ambathîte. Nîtwekarire kavinda karaca tûkîûrûraga kûu vûrûrirî ûrîa ûrî irîma wa Edomu.

² “Ngai-Mûnene nîwacokire akîra Musa atî,

³ ‘Mûrî ekaru îvinda rîganu mûkîûrûraga vûrûrirî ûrîa ûrî irîma wa Edomu; kwoguo thiîni mwena wa rûgûrû,

⁴ na wîre andû atî, mûrî vakuvî kûvîtûkîrîra vûrûrirî ûrîa ûrî irîma wa Edomu, vûrûri wa andû enyu na nîo njiarwa cia Esaû. Andû acio nîmakaamwîtigîra.

⁵ Nwatî mûtikarûe nao nîûndû nie ndikaamûva wanarî îkinyo rîmwe rîa vûrûri wao. Nie nîmvete njiarwa cia Esaû vûrûri wa Edomu ûtuîke wao.

⁶ Mûkaagûraga irio cia kûrîa na manjî ma kûnyua kuuma kûrî o.’

⁷ “Ngai-Mûnene, Ngai wenyu ethîrîtwe akîmûrathima maûndûrî monthe marîa mwethîrîtwe mûgîka, na akîmûmenyagîrîra rîrîa mwaûrûraga werûrî ûyû mûnene ûguo. Ethîrîtwe arî vamwe namue îvinda rîa mîaka mîrongo îna (40) na mwarî na indo cionthe irîa mwavataraga.

⁸ “Kwoguo nîtwathiîre na mbere na rûgendo, na tûgîtiga Edomu kûrîa njiarwa cia Esaû ciatûûraga, na tûkîvîtûka njîra îrîa yavîtûkîrîrîte Elathi na Ezioni-geberi na tûkîthiîra njîra ya werû wa Moabu.

⁹ Ngai-Mûnene nîwambîrire atî, ‘Ndûkathînie andû a Moabu, njiarwa cia Loti, kana mûrûe nao, nîûndû nînîmavete îtûûra rîa Ari, na ndikaamûva wanarî gacunjî ka vûrûri wao.’ ”

¹⁰ (Tene andû anene mûno ta marimû meetagwa Emimu nîo maatûûraga kuo. Maarî eengî na maarî na vinya mûno na araca ta Anaki.

¹¹ Wata Anaki, andû acio nîmeetagwa rîngî Refaimu, nwatî Amoabu maametaga Emimu.

¹² Tene Ahori wanao nîmaatûûraga vûrûri wa Edomu. Nwatî njiarwa cia Esaû nîciamengatire na ikîmathiria kuo onthe. Nîmaacokire magîtûûra kuo vandûrî vao. Ûguo nwa ta guo andû a Isiraeli meekire andû arîa matûûraga vûrûri ûrîa maaverwe nî Ngai-Mûnene.)

¹³ “Nîtwacokire tûkîringa rûnjî rwa Zeredi, wata ûrîa Ngai-Mûnene aatwîrire.

¹⁴ Kuuma twauma Kadeshi-barinea nginya rîrîa twaringire karûnjî ka Zeredi, twathirîtie mîaka mîrongo îthatû na înana (38). Kavinda kau, rûciaro rwa andû arîa maarî na ûkûrû wa kûthiî mbaararî nîrwathirîte wata ûrîa Ngai-Mûnene eevîtîte.

¹⁵ Ngai-Mûnene nîwathiîre na mbere na kûregana nao nginya rîrîa aamathiririe onthe.

¹⁶ “Rîrîa arûme onthe a mbaara maakwire,

¹⁷ Ngai-Mûnene, nîwambîrire atî,

¹⁸ ‘Ûmûnthî nîmûkûvîtûkîrîra îtûûra rîa Ari mûvakarî wa vûrûri wa Moabu.

¹⁹ Nîmûgûkinya vakuvî na vûrûri wa Aamoni, njiarwa cia Loti. Mûtikamavurie kana mûrûe nao nîûndû ndikaamûva wanarî gacunjî ka vûrûri wa Aamoni ûrîa nîmavete ûtuîke wao.’ ”

²⁰ (Vûrûri ûyû wîtagwa rîngî vûrûri wa Refaimu, rîîtwa rîîrî nî rîa andû arîa maatûûraga kuo. Aamoni meetaga andû acio Zamuzumimu.

²¹ Andû acio maarî eengî na maarî na vinya na araca ta Anaki. Nwatî Ngai-Mûnene nîwamathiririe, nao Aamoni nîmoocire vûrûri ûcio na magîtûûra kuo.

²² Ngai-Mûnene nîwekîte wata ûguo kûrî andû a Edomu, njiarwa cia Esaû, arîa maatûûraga vûrûrirî ûrîa ûrî irîma wa Edomu, rîrîa aathiririe Aahori, nao andû a Edomu magîoca vûrûri ûcio na magîtûûra kuo na kûu nîkuo matûûraga nginya ûmûnthî.

²³ Vûrûri ûrîa ûrî rûtere rwa îria rîa Mediterania nginya îtûûra rîa Gaza watûûragwa nî andû a Avimu mbererî. Andû a kuuma gîcîgîrîrarî gîa Kirete nîmaamathiririe na magîoca vûrûri ûcio na magîtûûra kuo.)

²⁴ “Twarîkia kûvîtûka vûrûri wa Moabu, Ngai-Mûnene nîwatwîrire atî, ‘Rîu ambîrîriani kûringa rûnjî rwa Arinoni. Nîngûnenganîra Sihoni, mûthamaki wa Aamori kuuma Heshiboni vamwe na vûrûri wake kûrî mue. Mûtharîkîreni na mwoce vûrûri wake.

²⁵ Kuuma ûmûnthî nîngûtûma andû onthe mamwîtigîre. Andû a nthî yonthe makegucaga mwagwetwa makainaina nî guoya.’

Andû a Isiraeli nîmaavootire mûthamaki Sihoni

²⁶ “Nînaacokire ngîtûma anjaama kuuma werûrî wa Kedemothi kûrî mûthamaki Sihoni wa kuuma Heshiboni na ciugo cia thayû erwe atî,

²⁷ ‘Twîtîkîrie tûvîtûkîrîre vûrûrirî waku. Nîtûthiî na njîra tûtakwathûkia vandû.

²⁸ Tûkaarîva irio na manjî marîa tûkaanyua. Twîtîkîrie tu tûvîtûkîrîre vûrûrirî waku,

²⁹ tûthiî tûringe rûnjî rwa Jorodani na tûkinye vûrûrirî ûrîa Ngai-Mûnene, Ngai wetû atûvete. Njiarwa cia Esaû, arîa matûûraga Edomu na andû a Moabu, arîa matûûraga Ari, nîmaatwîtîkîririe tûvîtûkîrîre vûrûrirî wao.’

³⁰ “Nwatî mûthamaki Sihoni ndetîkîra tûvîtûkîrîre vûrûrirî wake. Ngai-Mûnene, Ngai wenyu nîwamûmirie ngoro, na agîtuîka nthande nîguo tûmûvoote. Kwoguo nîtwamûtharîkîre tûkîmûvoota na tûgîoca vûrûri wake, na nîkuo tûtûûraga nginya ûmûnthî.

³¹ “Ngai-Mûnene nîwacokire akîmbîra atî, ‘Taroriani, nie nînyambîrîrîtie kûnenganîra mûthamaki Sihoni vamwe na vûrûri wake kûrî mue. Ocani vûrûri wake ûtuîke wenyu.’

³² Sihoni nîwaumîrire na athigari ake onthe a mbaara kûrûa natue, vakuvî na îtûûra rîa Jahazi.

³³ Nake Ngai-Mûnene, Ngai wetû nîwamûrekererie kûrî tue na tûkîmûraga; tûkîûraga avîcî ake vamwe na athigari ake onthe a mbaara.

³⁴ Nîtwanyitire na tûgîcûkangia matûûra monthe na tûkîûraga arûme onthe, aka onthe na ciana. Gûtirî mûndû wanarî ûmwe watigarire.

³⁵ Nîtwatavire ndîthia tûkîthiî nacio, na tûgîkuua indo irîa twatavire matûûrarî marîa twanyitîte.

³⁶ Kuuma Aroeri, îtûûra rîrîa rîrî rûtere rwa rûnjî rwa Arinoni, na kuuma îtûûra rîrîa rîrî Kîamndarî, nginya Gileadi, gûtirî îtûûra rîarî na nthingo îngîatûremire. Ngai-Mûnene, Ngai wetû nîwatûvotithirie kwîgwatîra matûûra monthe.

³⁷ Nwatî tûtiakuvîvîria vûrûri wa Aamoni, kana ndeere cia rûnjî wa Jaboku kana matûûra marîa marî vûrûrirî ûrîa ûrî irîma, kana kûndû kuonthe kûrîa Ngai-Mûnene, Ngai wetû aatûgirîtie kûthiî.