Gûco 19 - ÎVUKU RÎA ÛVORO MWARO

Matûûra marîa andû mathiîcaga kwîthitha

¹ “Rîrîa Ngai-Mûnene Ngai wenyu akaaûraga andû arîa marî vûrûrirî ûrîa akûmûva, na mûmengate na mûtûûre matûûrarî na nyomba cia vûrûri ûcio,

² nî mûkaamûra matûûra mathatû kûu vûrûrirî ûrîa Ngai-Mûnene Ngai wenyu akûmûva mûwîgwatîre.

³ Mûkagaania vûrûri ûcio icunjî ithatû na mûrûthe njîra ithatû; wa njîra îthiîte îtûûrarî rîmwe nîguo andû arîa maûraganîte mathiîcage kwîthitha kuo.

⁴ Ethîrwa mûndû wa wonthe nwa aûrage mûndû ûtarî nthû yake atakwenda, nwa aûrîre îtûûrarî rîmwe rîa mau na ethîrwe arî mûgitîre.

⁵ Kwa ngerekano, andû aîrî mangîthiî mûtitûrî gûtema mîtî na vîndî wa îo ûmwe wao aratema mûtî îthanwa rîake rîrûke na rîûrage ûcio wîngî, mûndû ûcio ûraganîte nwa aûrîre îtûûrarî rîmwe rîa mau na ethîrwe arî mûgitîre.

⁶ Îtûûra rîu rîa kwîthitha rîngîthîrwa rîrî rîmwe, nwa rîthîrwe rîrî kûraca mûno; na mûndû ûrîa ûkûrîvîrîria mûndû ûrîa ûragîtwe nwa akinyîrîre mûndû ûrîa ûraganîte na akamûraga atarî arakinya îtûûrarî rîu rîa kwîthitha, wana ethîrwa mûndû ûcio ndagîrîrwe nî kûragwa nîûndû aûraganîte atakwenda na matiarî na ûthû mbererî.

⁷ Kîu nîkîo kîratûma nîmwathe mûkaathuura matûûra mathatû.

⁸ “Ngai-Mûnene Ngai wenyu angîkaaramia vûrûri wenyu wata ûrîa eerîre methe menyu na mwîvîtwa, na amûve vûrûri wonthe ûrîa aamerîîre,

⁹ nî mûkoongerera matûûra mengî mathatû ma kwîthitha. Ngai-Mûnene akaaramia vûrûri wenyu ethîrwa nî mûkaathîkîra na kinyi maathani monthe marîa ngûmwatha ûmûnthî na mwendage Ngai-Mûnene Ngai wenyu na mûmwathîkagîre.

¹⁰ Mûgeeka ûguo nîguo mûndû ûrîa ûtekîte ûndû mûcûku ndakaûragîrwe vûrûrirî wenyu ûrîa Ngai-Mûnene Ngai wenyu akûmûva rîrî îgai rîenyu, na mûtikethîrwe mûrî na mavîtia ma kûûraga mûndû ûtarî na mavîtia.

¹¹ “Nwatî mûndû ûngîîthithîra nthû yake na amîringe îkînakua, mûndû ûcio ûraganîte acoke aûrîre îtûûrarî rîmwe rîa mau ma kwîthitha,

¹² atongoria a îtûûra rîake nîmagaatûmana agîrwe na anenganîrwe kûrî mûndû ûrîa ûkûrîvîrîria mûndû ûcio ûragîtwe nîguo wanake aûragwe.

¹³ Mûtikeguîre mûndû ûcio ûûraganîte ntha. Mûkaathiria andû arîa maûragaga arîa engî matarî na mavîtia vûrûrirî wa Isiraeli nîguo mûtûûre na thayû.

Mîvaka

¹⁴ “Mûtikagendagendie mîvaka ya arîa mûriganîtie nao, îrîa yekîrirwe tene vûrûrirî ûrîa Ngai-Mûnene Ngai wenyu akûmûva mwîgwatîre.

Ûvoro wîgiî aira

¹⁵ “Ûira wa mûndû ûmwe tî mwîganu wa gûtûma mûndû atuîrwe atî nî munu watho. Ûira wa andû aîrî kûthiî na mbere nîguo ûngîtîkua nîguo mûndû atuîrwe atî nî mwîku ûndû mûcûku.

¹⁶ Mûira ûrî na rwetho angîruta ûira wa maveeni wîgiî mûndû ûrîa wîngî,

¹⁷ andû acio oîrî nîmakaathiî varîa Ngai-Mûnene akaathuura va kûgoocagîrwa nîguo matuithanue ciira nî athînjîri-Ngai na atongoria arîa makethîrwa marî wîrarî wa gûtuithania ciira vîndî îo.

¹⁸ Atongoria acio matuithanagia ciira nîmagaatuîria ûndû ûcio waro, na ethîrwa mûira ûcio nî wa maveeni na maûndû marîa arîtie megiî mûndû ûcio wîngî nî ma maveeni,

¹⁹ mûira ûcio agîrîrwe nî gûtuîrwa na avewe îvera rîrîa mûndû ûcio ûthitangîtwe angîvewa. Ûguo nîguo mûkaathiria wîvia gatagatîrî kenyu.

²⁰ Nao andû acio engî onthe nîmakegua ûndû ûcio na metigîre, na wîvia wa mûthemba ta ûcio ndûgeekîka rîngî gatagatîrî kenyu.

²¹ Mûtikeguîre andû a mûthemba ta ûcio ntha. Mwoyo ûkaarîvagwa na mwoyo, riitho rîkaarîvagwa na riitho, îgego rîkaarîvagwa na îgego, njara îkaarîvagwa na njara na kûgûrû gûkaarîvagwa na kûgûrû.