Gûco 18 - ÎVUKU RÎA ÛVORO MWARO

Îgai rîa Athînjîri-Ngai

¹ “Athînjîri-Ngai Alawi, na nîguo mûvîrîga wonthe wa Lawi ndûkaagaîrwa gîcunjî Kîam mîgûnda vûrûrirî wa Isiraeli. Magaatûûragua nî matega ma kûvîvua, na matega ma indo irîa ciîngî irutagîrwa Ngai-Mûnene.

² Matikaagaîrwa kûndû gwa gûtûûra ta mîvîrîga îrîa îngî ya Isiraeli. Ngai-Mûnene nîke îgai rîao wata ûrîa aamerîîre.

³ “Rîrîa andû makûruta îgongoona rîa ndegwa kana rîa ng'ondu, mûthînjîri-Ngai akaavecagwa kûgûrû kwa mbere, nthîa cioîrî, na nyama cia nda.

⁴ Akaavecagwa maketha ma mbere ma ngano, ndivei, maguta ma ndamaiyû, na guoya wa ng'ondu ûrîa ikenjagwa riita rîa mbere.

⁵ Ngai-Mûnene Ngai wenyu athuurîte andû a mûvîrîga wa Lawi gatagatîrî ka mîvîrîga yonthe ya Isiraeli nîguo matûûre mamûtungatagîra marî athînjîri-Ngai tene na tene.

⁶ “Mûlawi wa wonthe ûrîa ûkwenda nwa aume îtûûrarî wa rîonthe vûrûrirî wa Isiraeli na athiî varîa Ngai-Mûnene akaathuura va kûgoocagîrwa

⁷ na nwa atungatîre Ngai-Mûnene Ngai wake ta mûthînjîri-Ngai, wata Alawi arîa engî matungata kuo.

⁸ Akaavecagwa irio wata irîa athînjîri-Ngai acio engî makûvewa gûtagûtarwa mbeca irîa amûkîrîte kuuma kûrî indo cia mûciî wao irîa ciendetue

Gûkaanua îgûrû rîgiî mîtugo ya mavûrûri mageni

⁹ “Rîrîa mûgaatonya vûrûrirî ûrîa Ngai-Mûnene Ngai wenyu akûmûva, mûtikarûmîrîre mîtugo mîcûku ya andû arîa matûûraga kuo.

¹⁰ Gatagatîrî kenyu gûtikethîrwe kûrî na mûndû wa wonthe ûkaaruta mûvîcî, kana mwarî arî îgongoona rîa kûvîvua. Gûtikethîrwe kûrî na mûragûri, mûndûmûgo kana mûringi mbûgû,

¹¹ kana mûrogi, kana mûndû ûrîa waragia na maroho ma andû arîa akuû.

¹² Ngai-Mûnene Ngai wenyu nîathûrîte andû arîa mekaga maûndû mama macûku, na kîu nîkîo gîgûtûma engate andû arîa maatûûraga vûrûrirî ûrîa akûmûva nîguo mûwîgwatîre.

¹³ Îthagîrwani mûrî evokeku kûrî Ngai-Mûnene Ngai wenyu vîndî cionthe.

Andû a Isiraeli nîmeerîrwe mûrathi

¹⁴ “Andû a mavûrûri mau mûkeengata na mwîgwatîre vûrûri wao, nîmathîkagîra andû arîa maringagia mbûgû, na aragûri, nwatî Ngai-Mûnene Ngai wenyu ndamwîtîkîrîtie gwîka ûguo.

¹⁵ Vandû va ûguo Ngai-Mûnene Ngai wenyu nîakaamûtûmîra mûrathi tanie kuuma kûrî andû enyu. Mûkaamwathîkagîra.

¹⁶ “Rîrîa mwacemanîtie kîrîmarî gîa Sinai, mwavoire mûkiuga mûtikwenda kwîgua Ngai-Mûnene Ngai wenyu akîaria rîngî, na mûtikwenda kwona mwaki mûnene wake rîngî nîûndû nwa mûkue.

¹⁷ Nake Ngai-Mûnene Ngai wenyu nîwambîrire atî, ‘Ûguo wonthe mauga nî ûvoro wa ma.

¹⁸ Nîngaamathuurîra mûrathi tawe kuuma gatagatîrî ka andû ao. Nîngekîra ciugo ciakwa kanyuarî gake, na ameerage maûndû monthe marîa ngaamwatha.

¹⁹ Mûndû wa wonthe ûtakaathîkîra ciugo ciakwa irîa mbarîtie na njîra ya mûrathi, nie mwene nîngaamûverithia.

²⁰ Nwatî mûrathi wa wonthe ûkeera andû ûndû ûmbîgiî ûrîa ndamwîrîte auge, kana arie na rîîtwa rîa ngai cia mîvuanano, nîagaakua.’

²¹ “Mwavota kwîyûria na ngoro atîrî, ‘Tûngîvota atîa kûmenya ciugo irîa itaumîte kûrî Ngai-Mûnene?’

²² Ethîrwa mûrathi nwa auge ûndû na njîra ya rîîtwa rîa Ngai-Mûnene, na ûndû ûcio ûrege kûvinga, kana wîthîrwe tî wa ma, mûkaamenya waro atî ûndû ûcio nduumîte kûrî Ngai-Mûnene. Mûrathi ûcio arîtie maûndû make na mûtikamwîtigîre.