Gûco 17 - ÎVUKU RÎA ÛVORO MWARO

¹ “Ndûkarutîre Ngai-Mûnene Ngai wenyu îgongoona rîa ndegwa kana ng'ondu îrî na wonje wa mûthemba wa wonthe, nîûndû Ngai-Mûnene Ngai wenyu nîathûrîte ûndû ûcio.

² “Kûngîonekana mûndû gatagatîrî kenyu arî îtûûrarî rîmwe rîa marîa Ngai-Mûnene Ngai wenyu akûmûva, wîkîte ûndû mûcûku na akarega kwathîkîra maathani make,

³ na njîra ya kûgooca na gûtungatîra ngai ciîngî: riûa, mweri kana njata irîa ngananîtie,

⁴ na mwîrwe ûvoro wake, tuîragiani ûndû ûcio waro. Ethîrwa nî ma atî ûndû ûcio mûcûku ûguo nî mwîke Isiraeli,

⁵ mûndû ûcio nîakaarutwa nja ya îtûûra na aûragwe na mathiga.

⁶ Nwatî nwanginya kwîthîrwe kûrî na ûira wa andû aîrî kana athatû nîguo mûndû ûcio atuîrîrwe kûragwa. Mûndû ndangîûragwa nîûndû wa ûira wa mûndû ûmwe.

⁷ Aira nîo makethagîrwa marî a mbere gwikia mûndû ûcio mathiga, nao andû acio engî onthe marûmîrîre. Ûguo nîguo mûkaathiria ûndû ûcio mûcûku gatagatîrî kenyu.

⁸ “Kûngîgîa na maciira maûmû gûtuithania kûu matûûrarî menyu ta: kûûragana mûndû atakwenda, gûkararanîria ûndû, kana kûtharîkîra mûndû, thiîcagani vandû varîa Ngai-Mûnene Ngai wenyu akaathuura va kûgoocagîrwa,

⁹ na mûmenyithie athînjîri-Ngai Alawi, na kûrî mûtongoria ûrîa ûrî wîrarî wa gûtwithania ciira vîndî îo, nîguo athikîrîrie ciira ûcio, nao nîmakaavecana îtua rîao.

¹⁰ Namue nîmûgaacoka mwîke wata ûrîa makaamwîra mwîke marî varîa Mwathani akaathuura na mûmenyagîrîre mwîkage na kinyi maûndû monthe marîa makaamwatha.

¹¹ Amûkagîrani îtua rîao na mûrûmagîrîre kîrîra Kîamo kîonthe.

¹² Mûndû wa wonthe ûkaaregana na îtua rîa mûthînjîri-Ngai ûrîa ûtungataga Ngai-Mûnene Ngai wenyu, kana rîa mûtongoria ûrîa ûrî wîrarî wa gûtwithania ciira, nîakaaûragwa. Ûguo nîguo mûkaathiria wîvia Isiraeli.

¹³ Kwoguo andû onthe nîmakegua ûndû ûcio na metigîre, na gûtirî mûndû ûgeeka ûndû rîngî atambîte gwîciiria.

Mataaro megiî Mûthamaki

¹⁴ “Mwarîkia kwîgwatîra vûrûri ûrîa Ngai-Mûnene Ngai wenyu akûmûva na mûtûûre kuo, na mwîcirie kûgîa na mûthamaki ta mavûrûri marîa mamûthiûrûrûkîrîtie;

¹⁵ mûndû ûcio mûgaatua mûthamaki nwanginya akeethîrwa nîke Ngai-Mûnene Ngai wenyu akaathuura, na nwanginya akeethîrwa arî ûmwe wa andû enyu. Mûtigatue mûgeni mûthamaki wenyu.

¹⁶ Mûthamaki ûcio ndakethîrwe na mbarathi nyîngî, na ndagatûme andû Misiri kûgûra mbarathi nîûndû Ngai-Mûnene aaugire atî andû ake matigaacoka Misiri rîngî.

¹⁷ Mûthamaki ndagîrîrwe nî kwîthîrwa na aka eengî, nîûndû nwa matûme atiganîria Ngai-Mûnene, na ndagîrîrwe nî gwîtongia mûno na sîlûva na thaavu.

¹⁸ Rîrîa agaatuîka mûthamaki, nwanginya akaagîa na îvuku rîa watho wa Ngai rîandîkîtwe kuuma îvukuurî rîa mbere rîa watho rîrîa rîkaraga na athînjîri-Ngai Alawi.

¹⁹ Akeethagîrwa na îvuku rîîrî vîndî cionthe na arîthomage ûtûûrorî wake wonthe, nîguo amenyage gwîtigîra Ngai-Mûnene Ngai wake, na kwathîkîra na kinyi maathani monthe na irîra irîa ciandîkîtwe wathorî ûcio.

²⁰ Eka ûguo, ndakeyona arî mûnene gûkîra andû acio engî a Isiraeli, na gûtirî vîndî akaarega kwathîkîra maathani ma Ngai nîguo mûthamaki ûcio na njiarwa ciake makaathana îvinda îraca kûu Isiraeli.