Gûco 16 - ÎVUKU RÎA ÛVORO MWARO

Kîrugo kîa pasaka

¹ “Kûngûagîrani mweri wa Abibu na njîra ya kîrugo Kîam pasaka. Na njîra îno, Ngai-Mûnene Ngai wenyu akaavecagwa gîtîîo. Mweri ûcio nîguo Ngai-Mûnene Ngai wenyu aamûrutire vûrûri wa Misiri ûtukû.

² Mûkaarutagîra Ngai-Mûnene Ngai wenyu îgongoona rîa pasaka kuuma ndîthiarî yenyu ya mbûri na ng'ombe mûrî varîa Ngai-Mûnene akaathuura va kûgoocagîrwa.

³ Mîgate îrîa mûkarîcaga kîrugorî gîkî ndîkethagîrwa îkîrîtwe ndawa ya kwimbia, na mûkaarîcaga mîgate îo mîthenya mûgwanja wata ûrîa mwekire vîndî îrîa mwaumaga Misiri na îvenya. Mûgate ûyû ûgetagwa wa mathîna, nîguo mavinda marîa monthe mûgûtûûra mwoyo mûririkanage mûthenya ûrîa mwaumire Misiri.

⁴ Gûtirî mûndû wagîrîrwe kwîthîrwa arî na ndawa ya kwimbia mûgate vûrûrirî wenyu îvinda rîa mîthenya mûgwanja, kana nyama ya îgongoona îrîa îrutîtwe ya îgongoona îrara îkinyia kîraûko.

⁵ “Mûtikaarutîre îgongoona rîa pasaka îtûûrarî wa rîonthe rîa marîa Ngai-Mûnene Ngai wenyu akûmûva.

⁶ Vandû va ûguo rutagîrani Ngai-Mûnene Ngai wenyu îgongoona rîu rîa pasaka vandû varîa akaathuura va kûgoocagîrwa. Mûkaarîrutaga kîvwaî riûa rîkîthûa vîndî ta îrîa mwaumire Misiri.

⁷ Rugagani nyama na mûirie mûrî varîa Ngai-Mûnene Ngai wenyu akaathuura va kûgoocagîrwa, na kîraûko mûthenya ûcio wîngî, mûgacoka kwenyu mîciî.

⁸ Mûkaarîcaga mîgate îtarî mîkîre ndawa ya kwimbia mîthenya îtandatû, naguo mûthenya wa mûgwanja mûkagomana vamwe kûgooca Ngai-Mûnene Ngai wenyu. Mûthenya ûcio mûtikarute wîra.

Kîrugo kîa maketha

⁹ “Taragani ciumia mûgwanja kuuma mwambîrîria gûketha,

¹⁰ mûcoke mûkûngûîre kîrugo Kîam maketha. Rutagîrani Ngai-Mûnene Ngai wenyu matega ma kwîyendera vîndî ya kîrugo gîkî îrî njîra ya kûmûva gîtîîo, wa mûndû kûringana na ûrîa arathimîtwe.

¹¹ Kenagani mûrî mbere ya Ngai-Mûnene Ngai wenyu mûrî vamwe na ciana cienyu, ndungata cienyu, Alawi, ageni, ciana cia ndigwa na aka a ndigwa arîa matûûraga matûûrarî menyu. Îkagani ûguo mûrî varîa Ngai-Mûnene Ngai wenyu akaathuura va kûgoocagîrwa.

¹² Athîkagîrani maathani mama na kinyi na mûririkanage atî vîndî îmwe mwatûûraga Misiri mûrî ngombo.

Kîrugo gîa tûnyomba

¹³ “Mwarîkia kûvûûra ngano cienyu cionthe na kûviva thavibu, kûngûagîrani kîrugo gîa tûnyomba îvinda rîa mîthenya mûgwanja.

¹⁴ Kûngûagîrani kîrugo kîu mûkenete mûrî na ciana cienyu, ndungata cienyu, Alawi, ageni, ciana cia ndigwa, na aka a ndigwa arîa matûûraga matûûrarî menyu.

¹⁵ Mûgaakûngûagîra kîrugo gîkî îvinda rîa mîthenya mûgwanja mûrî varîa Ngai-Mûnene Ngai wenyu akaathuura va kûgoocagîrwa, îrî njîra ya kûmûva gîtîîo. Kenagani nîûndû Ngai-Mûnene Ngai wenyu nîakaarathima maketha ma mîgûnda yenyu na wîra wonthe ûrîa mûrutaga.

¹⁶ “Arûme onthe vûrûrirî wenyu makaathiîcaga maita mathatû wa mwaka kûgooca Ngai-Mûnene Ngai wenyu varîa akaathuura va kûgoocagîrwa vîndî ya kîrugo Kîam pasaka, Kîam maketha na gîa tûnyomba. Mûndûmûrûme wa wonthe akaaviragîra Ngai-Mûnene kîveo

¹⁷ wa ûrîa akûvota kûringana na ûrîa arathimîtwe nî Ngai-Mûnene Ngai wenyu.

Kûrûmîrîra kîvooto

¹⁸ “Thuurani atucanîri ciira na anene kuuma matûûrarî menyu monthe marîa Ngai-Mûnene Ngai wenyu akûmûva kûringana na mîvîrîga yenyu. Andû acio magaatucagîra andû na waragania.

¹⁹ Matiagîrîrwe nî kûregana na kîvooto kana marûtha kîmenyano, na matiagîrîrwe nî kwamûkîra îvaki, nîûndû îvaki rîtucaga mûndû mûûgî kîrimû akaremwa nî gûtua îtua ûrîa kwagîrîrîte.

²⁰ Mavinda monthe rûmagîrîrani kîvooto. Namue nîmûkegwatîra vûrûri ûrîa Ngai-Mûnene Ngai wenyu akûmûva na mûthiî na mbere gûtûûra kuo.

²¹ “Watumîra Ngai-Mûnene Ngai wenyu metha ya kîgongoona, ndûkaarûthe mûvuanano wa ngai ya Ashera mwenarî wayo.

²² Ndûgatume mûvuanano wa gîtugî Kîam îthiga gîa kûgoocaga nîûndû Ngai-Mûnene Ngai wenyu nîathûrîte mîvuanano.