Gûco 14 - ÎVUKU RÎA ÛVORO MWARO

Maûndû marîa makananîtue vîndî ya macakaya

¹ “Mue mûrî ciana cia Ngai-Mûnene Ngai wenyu. Kwoguo vîndî îrîa mûgûcakaya mûtigatemange mîîrî yenyu kana mwenje mwena wa mbere wa ciongo cienyu nîûndû wa mûndû ûrîa ûkuîte, ta ûrîa andû a mavûrûri marîa mengî mekaga.

² Mue mûrî andû atheru a Ngai-Mûnene Ngai wenyu, na amwamûrîte gatagatîrî ka mavûrûri marîa mengî monthe ma nthî nîguo mûtuîke andû ake kîûmbe.

Nyamû irîa ntheru na irîa itarî ntheru

³ “Mûtikarîe kîndû kîrîa Ngai-Mûnene augîte atî kîrî mûgiro.

⁴ Nwa mûrîe ng'ombe, ng'ondu, mbûri,

⁵ nthwariga, nthiia, ngûrûngû, ngondi, ngunû, ndovo,

⁶ na nyamû wa yonthe mbatûkanu mavûngû na îcokagîra.

⁷ Nwatî mûtikarîe nyamû wa yonthe îtacokagîra na îtarî mbatûkanu mavûngû. Mûtikarîe ngamîîra, mbûkû, kana îthiiî, nîûndû ino nîicokagîra nwatî tî mbatûkanu mavûngû. Nyamû icio irî mûgiro.

⁸ Mûtikarîe ngûrwe, nîûndû îrî mavûngû matûkanu nwatî ndîcokagîra. Mûtikarîe nyamû icio kana mûvutie ciimba ciacio.

⁹ “Gatagatîrî ka nyamû cionthe irîa itûûraga manjîrî, nwa mûrîe nthamaki îrîa îrî mathagu manyitanu na îrî ngerecû.

¹⁰ Nwatî mûtikarîe nyamû wa yonthe îtûûraga manjîrî na îtarî mathagu manyitanu kana ngerecû nîûndû nî mûgiro kûrî mue.

¹¹ “Nwa mûrîe iconi cionthe irîa itarî mûgiro.

¹² Nwatî mûtikarîe iconi ta: ndiiû, nderi, ngoru,

¹³ mîthemba yonthe ya irwîgî.

¹⁴ Mîthemba yonthe ya ikûngûrû;

¹⁵ nyaga, kîvangariûki, ithumambûri na mîthemba yonthe ya mvûngû.

¹⁶ Mîthemba yonthe ya ndundu, wana ngune;

¹⁷ gakuua ûrogi, ndiiû, mbata cia manjîrî,

¹⁸ cûcû wa njoka, ngune, na mîthemba yonthe ya iconi icio; njûmbaine na mvuvu.

¹⁹ “Mûtikarîe tûnyamû tuonthe tûrîa tûtambaga nthî na tûrî mathagu, nîûndû nî mûgiro.

²⁰ Nwatî nwa mûrîe tûnyamû tuonthe tûrî mathagu na tûtheru.

²¹ “Mûtikarîe nyamû wa yonthe îkuîte mûvûvû. Nwatî nwa mûmîve ageni arîa matûûraga matûûrarî menyu mamîrîe, kana ageni arîa mavîtûkîte, nîûndû mue mûrî andû amûre a Ngai-Mûnene Ngai wenyu. “Mûtikaruge koori na îriia rîa ng'ina.

Watho wîgiî gîcunjî gîa îkûmi

²² “Rutagani gîcunjî gîa îkûmi Kîam irio cia mîgûnda yenyu wa mwaka.

²³ Thiîcagani vandû varîa Ngai-Mûnene Ngai wenyu akaathuura va kûgoocagîrwa na mûrîcagîre gîcunjî kîu gîa îkûmi Kîam ngano, ndivei, maguta ma ndamaiyû na marikithathi ma ng'ombe na ma ng'ondu cienyu mûrî vau mbere yake. Îkagani ûguo nîguo mwîrute gûtîîaga Ngai-Mûnene Ngai wenyu vîndî cionthe.

²⁴ Ethîrwa varîa Ngai-Mûnene Ngai wenyu akaathuura va kûgoocagîrwa nî kûraca na mûtingîvota kûvira gîcunjî gîa îkûmi Kîam mîgûnda yenyu vo Kîam indo irîa Ngai-Mûnene Ngai wenyu amûrathimîte nacio,

²⁵ endagiani gîcunjî kîu gîa îkûmi mûkînavira mbeca varîa Ngai-Mûnene Ngai wenyu akaathuura va kûgoocagîrwa.

²⁶ Mûgaatûmagîra mbeca icio kûgûra kîrîa mûndû endaga ta: ndegwa, ng'ondu, ndivei kana njovi. Wa mûndû na nyomba yake nîmakaarîa indo icio marî mbere ya Ngai-Mûnene Ngai wenyu mûkenete.

²⁷ “Mûtikariganîrwe nî Alawi arîa matûûraga matûûrarî menyu, nîûndû matiagaîrwa kûndû gwa gûtûûra.

²⁸ Mûthiiarî wa mwaka wa kathatû, viragani gîcunjî gîa îkûmi kuuma mîgûndarî yenyu na mûciigage matûûrarî menyu.

²⁹ Irio ino nî cia Alawi nîûndû matiagaîrwa kûndû gwa gûtûûra gatagatîrî kenyu, ageni, ciana cia ndigwa, na aka a ndigwa arîa matûûraga matûûrarî menyu, nîguo monage gîa kûrîa makavaa. Mwîkage ûguo nîguo Ngai-Mûnene Ngai wenyu amûrathimage na akarathima wîra wenyu.