Gûco 13 - ÎVUKU RÎA ÛVORO MWARO

¹ “Mûrathi kana mûndû ûrîa ûrotaga iroto angîûka kûrî mue na amwîre atî nîmûkûringîrwa Kîamma kana mwonue morirû,

² nakîo Kîamma kîu kana ûrirû wîkîke acoke amwîre mûgooce ngai ciîngî irîa mûtaicî, na mûitungatîre,

³ mûtikathikîrîrie mûrathi ûcio kana mûroti ûcio, nîûndû Ngai-Mûnene Ngai wenyu nîke ûramûgeria nîguo amenye kana nîmûmwendete na ngoro yonthe na mwoyo wonthe.

⁴ Rûmagîrîrani Ngai-Mûnene Ngai wenyu na mûmûtîîage na mwathîkagîre maathani make na mûmwîgucage. Mûtungatagîreni na mwîthagîrwe mûrî evokeku kûrî ke.

⁵ Nwatî mûrathi ûcio kana mûroti ûcio nîakaaûragwa nîûndû wa kûmwîra mûregane na Ngai-Mûnene Ngai wenyu, ûrîa wamûrutire vûrûrirî wa Misiri na akîmûkûûra kuuma kûrîa mwarî ngombo. Andû ta acio nî acûku na mendaga mûtiganîrie njîra îrîa Ngai-Mûnene Ngai wenyu aamwathire mûrûmagîrîre. Ûguo nîguo mûkaathiria maûndû macûku gatagatîrî kenyu.

⁶ “Ethîrwa mûrwanyûkwe, kana mûvîcîguo, kana mwarîguo, kana mûkaguo ûrîa wendete mûno, kana mûrata waku wa vakuvî nwa akûveenererie na nthitho akwîre mûthiî mûkagooce ngai ciîngî irîa we wana methe menyu mûtaicî,

⁷ ngai cia andû arîa mûriganîtie nao, marî vakuvî namue kana marî kûraca namue, kuuma mûthiia ûmwe wa nthî kûthiî ûrîa wîngî,

⁸ mûtigetîkîre mûndû ta ûcio amûveenererie kana mûmûthikîrîria. Mûtikeguîre mûndû ta ûcio ntha; mûtikamûgitîre kana mûmûthitha.

⁹ Mûkaamûraga! Mûkeethîrwa mûrî a mbere kûmûringa na mathiga, nao andû acio engî onthe marûmîrîre.

¹⁰ Nîmûkaamûraga na mathiga nîûndû nîageretie kûmûgucîrîria mûtige kûgooca Ngai-Mûnene Ngai wenyu ûrîa wamûrutire vûrûrirî wa Misiri kûrîa mwarî ngombo.

¹¹ Andû onthe a Isiraeli nîmakegua ûrîa gwîkîkîte kûrî mûndû ûcio; nîmagetigîra na matigaacoka gwîka maûndû macûku ta mau rîngî.

¹² “Rîrîa mûrî matûûrarî marîa Ngai-Mûnene Ngai wenyu akûmûva mûtûûre, nwa mwîgue

¹³ atî îtûûrarî rîmwe nî kuumîrîte andû matarî kîene na nî maveenereretie andû magooce ngai ciîngî irîa mûtaicî.

¹⁴ Mwegua ûndû ta ûcio, mûgaatuîria waro; na mwamenya atî ûndû ûcio mûcûku ûguo nî mwîkîku,

¹⁵ mûkaaûraga andû onthe a îtûûra rîu wa vamwe na ng'ombe ciao. Mûgaacûkangia îtûûra rîu viû.

¹⁶ Mûkaaûngania indo cionthe cia andû a îtûûra rîu na mûivire kîvarorî gîa îtûûra na mûvîvie îtûûra rîu vamwe na indo cionthe rîrî îtega rîa kûvîvua kûrî Ngai-Mûnene Ngai wenyu. Îtûûra rîu rîgaatûûra rîrî rîomomoku na rîtigaatumwa rîngî.

¹⁷ Mûtikeigîre kîndû wanarî kîmwe Kîam irîa ciathanirwe icûkangue, nîguo Ngai-Mûnene athirwe nî marakara. Nîagaacoka amwîguîre ntha na atûme mwîngîve wata ûrîa eerîre methe menyu,

¹⁸ ethîrwa mûkaathîkagîra maûndû marîa amwathîte, mûkîvingagia maathani ma Ngai-Mûnene Ngai wenyu monthe marîa ngûmwatha ûmûnthî na mwîkage ûrîa endaga.