Gûco 11 - ÎVUKU RÎA ÛVORO MWARO

Ûnene wa Ngai-Mûnene

¹ “Endagani Ngai-Mûnene Ngai wenyu vîndî cionthe na mwathîkagîre maûndû marîa aathanîte, mawatho make, irîra ciake, na maathani make.

² Ririkanani ûmûnthî maûndû marîa mwonire Ngai-Mûnene agîka. Mue nîmue mwonire maûndû mau, nwatî tî ciana cienyu. Nîmwonire ûnene wa Ngai-Mûnene Ngai wenyu, vinya wake, ûvoti wake,

³ cioneki, na maûndû manene marîa eekire Misiri kûrî mûthamaki wa kuo na vûrûri wake wonthe.

⁴ Nîmwonire ûrîa Ngai-Mûnene eekire athigari a Misiri wa vamwe na mbarathi na ikaari ciao cia mbaara. Nîwatûmire maûrîre Îriarî Îtune mamûkinyîrîte na makîthira viû.

⁵ Nîmwicî maûndû marîa aamwîkîre rîrîa mwarî werûrî mbere ya mûkinya gûkû.

⁶ Nîmwonire maûndû marîa eekire Dathani na Abiramu, avîcî a Eliabu a mûvîrîga wa Reubeni. Nthî nîyathamirie andû onthe a Isiraeli makîonaga na îkîmeria andû acio onthe wa vamwe na andû onthe a mîciî yao, magema mao, ndungata ciao na nyamû ciao cionthe.

⁷ Mue nîmue mwonire maûndû mau monthe manene marîa Ngai-Mûnene eekire.

Irathimo irîa irî vûrûrirî wa kîîranîro

⁸ “Vîndî îtarî ndaca nîmûkûringa rûnjî rwa Jorodani, na mwona mwathîkîra maathani monthe marîa ngûmûva ûmûnthî, nî mûkûgîa na vinya wa kwîgwatîra vûrûri ûcio mûthiîte gûtonya.

⁹ Namue nîmûgaatûûra kavinda karaca vûrûrirî ûcio wîcûrîte îriia na ûûkî, vûrûri ûrîa Ngai-Mûnene eerîrîre methe menyu wa vamwe na njiarwa ciao atî nîakaamava.

¹⁰ Nîûndû vûrûri ûrîa mûthiîte kwîgwatîra ndwîkariî ta vûrûri wa Misiri kûrîa mwaumire, kûrîa mwavandaga irio na mûgaciîtîrîria manjî ta mîgûnda ya mboga.

¹¹ Nwatî vûrûri ûrîa mûkwîgwatîra mwaringa Jorodani, nî vûrûri ûrî irîma na cianda, vûrûri uraga mbura.

¹² Nî vûrûri ûmenyagîrîrwa nî Ngai-Mûnene Ngai wenyu vîndî cionthe; Ngai-Mûnene Ngai wenyu nîaûgitagîra vîndî cionthe kuuma Kîammbîrîria Kîam mwaka nginya kîrîkîro Kîam guo.

¹³ “Kwoguo, athîkagîrani maathani marîa ngûmûva ûmûnthî; endagani Ngai-Mûnene Ngai wenyu na ngoro yonthe na mûmûtungatagîre na mwoyo wonthe.

¹⁴ Mweka ûguo agaatûmaga mbura yure mîgûndarî yenyu mavinda marîa magîrîru, vîndî ya mbura nene na vîndî ya mbura nini, nîguo mwîthagîrwe mûrî na ngano, ndivei na maguta ma kwîgana.

¹⁵ Nîagaatûma mîgûnda yenyu îgîe na nyaki ya kûrîwa nî ng'ombe cienyu. Mûkethagîrwa mûrî na irio cia kwîgana.

¹⁶ Menyererani mûtikaveenererue mûtiganîrie Ngai-Mûnene na mûgooce ngai irîa ciîngî na mûitungatîre.

¹⁷ Mûngîkaagooca ngai ciîngî, Ngai-Mûnene nîakaarakara nîmue na atige kuurithia mbura na mîgûnda yenyu îng'aare na îtige kuuma kîndû. Nîmûgaacoka mûkuîre kuo narua, wana ethîrwa vûrûri ûcio Ngai-Mûnene akûmûva nî mwaro.

¹⁸ “Mûtikariganîrwe nî maathani mama makwa na mûmaigage ngororî cienyu na mîoyorî yenyu. Moverereni njararî cienyu na mothiûrî menyu nîguo mûmaririkanage.

¹⁹ Thomithagiani ciana cienyu maathani mama. Thomithagiani ciana cienyu rîrîa mûrî mîciî, rîrîa mûrî kûraca na mîciî, mûkîthiî toro na rîrîa mwaramûka.

²⁰ Mandîkeni itugîrî cia mîrango ya nyomba cienyu na ivingorî cienyu.

²¹ Mweka ûguo, mue vamwe na ciana cienyu nî mûgaatûûra vîndî ndaca vûrûrirî ûrîa Ngai-Mûnene eerîre methe menyu atî nîakaamava, na mûgaatûûra kuo tene na tene.

²² “Mwona mwathîkîra na kinyi maathani mama monthe nîmûvete: kwenda Ngai-Mûnene Ngai wenyu, kûrûmîrîra njîra ciake cionthe, na gûtuîka andû evokeku kûrî ke,

²³ Ngai-Mûnene nîakeengata andû a mavûrûri mau monthe nîguo mûtonye kuo. Nîmûkegwatîra mavûrûri manene na marî na vinya kûrî mue.

²⁴ Kûrîa kuonthe mûkaavîtûkîrîra, gûkethîrwa kûrî kwenyu. Vûrûri wenyu ûkeethîrwa umîte werûrî nginya Lebanoni, na kuuma rûnjîrî rwa Farati nginya îria rîa Mediterania mwena wa îthûîro.

²⁵ Vûrûrirî wa wonthe kûrîa mûkaathiî, Ngai-Mûnene Ngai wenyu nîagaatûma andû a kuo megue guoya na mamwîtigîre wata ûrîa eeranîrîte na gûtirî mûndû ûkaamûvoota.

²⁶ “Ûmûnthî nîrenda mûthuure kîrîa mûkwenda: kîrathimo kana kîrumi.

²⁷ Ethîrwa nî mûkwathîkîra maûndû marîa Ngai-Mûnene Ngai wenyu amwathîte, nîmûkwamûkîra kîrathimo.

²⁸ Mwarega kwathîkîra maathani ma Ngai-Mûnene Ngai wenyu, na mûgooce ngai ciîngî irîa mûtaaicî mbere, nîmûkaaverithua.

²⁹ Mwakinyua nî Ngai-Mûnene Ngai wenyu vûrûrirî ûrîa aamwîrîîre na mûwîgwatîre, nî mûkaanîrîra mûrî kîrîmarî Kîam Gerizimu ûrîa akaamûrathima, na mûrî kîrîmarî Kîam Ebali, mwanîrîre ûrîa akaamûverithia.

³⁰ Irîma icio cioîrî irî mwena wa îthûîro wa rûnjî rwa Jorodani vûrûrirî wa andû a Kanaani arîa matûûraga Kîamndarî Kîam Jorodani. Irîma icio irî vakuvî na mîtî ya mîvuru îrîa mîamûre ya More kûrigania na îtûûra rîa Giligali.

³¹ Rîu mûrî vakuvî kûringa rûnjî rwa Jorodani mûthiîte kwîgwatîra vûrûri ûrîa Ngai-Mûnene Ngai wenyu akûmûva. Mwegwatîra vûrûri ûcio na mûtûûre kuo,

³² mwîmenyagîrîreni mûvingagie na kinyi maathani monthe marîa namûva ûmûnthî.