Gûco 10 - ÎVUKU RÎA ÛVORO MWARO

Musa nîwamûkîre Maathani rîngî

¹ “Ngai-Mûnene nîwacokire akîmbîra atîrî, ‘Umia ivengere igîrî cia îthiga wata irîa cia mbere na ûcoke ûtume îthandûkû rîa mûtî rîa gwîkîra ivengere icio, ûcoke unûkie kîrîmarî kûrî nie.’

² Nîngaandîka ivengererî icio ciugo irîa nandîkîte ivengererî cia mbere irîa waunangire, ûcoke ûciîkîre îthandûkûrî rîu.

³ “Kwoguo nînatumire îthandûkû rîa mûtî wa mûgaa, ngîcoka ngiumia ivengere igîrî cia îthiga ta irîa cia mbere, na ngîunûkia kîrîmarî nguuîte ivengere icio na njara.

⁴ Ngai-Mûnene nîwacokire akîandîka ivengererî icio ciugo wata irîa aandîkîte mbere; nacio nî Maathani îkûmi marîa aamûveere rîrîa aamwarîrie arî mwakirî mûthenya ûrîa mwagomanîte kîrîmarî. Ngai-Mûnene nîwacokire akînengera ivengere icio.

⁵ Nînaanyûrûkire ngiuma kîrîmarî. Nînacokire ngîkîra ivengere icio îthandûkûrî rîrîa naatumîte wata ûrîa Ngai-Mûnene aathanîte, na kûu nîkuo irî.”

⁶ (Andû a Isiraeli nîmaaumire kûu ithimarî cia andû a Jaakani na makîthiî Mosera. Marî kûu, Aroni nîwakwire na akîthikwa. Nake Mûvîcî Eliazaru nîwatuîkire mûthînjîri-Ngai vuva wake.

⁷ Nîmaaumire kûu na makîthiî Gudigoda, na kuuma Gudigoda nîmaathiîre nginya Jotibatha kûrîa kwarî na tûrûnjî twîngî.

⁸ Vîndî îo, Ngai-Mûnene nîwathuurire andû a mûvîrîga wa Lawi makuuage îthandûkû rîa kîrîkanîro na mamûtungatagîre marî athînjîri-Ngai, na marathimage andû rîîtwarî rîake. Ûguo nîguo mekaga nginya ûmûnthî.

⁹ Kwoguo andû a mûvîrîga wa Lawi matiagaîrwa vûrûri wa gûtûûra ta mîvîrîga îrîa îngî. Vandû va ûguo maagaire wîra wa gûtungatîra wata ûrîa Ngai-Mûnene Ngai wenyu aamerîrîte.)

¹⁰ “Nînekarire kîrîmarî îvinda rîa mîthenya mîrongo îna, ûtukû na mûthenya wata ûrîa nekîte mbere. Ngai-Mûnene nîwanthikîrîrie rîngî na akîrega kûmûthiria.

¹¹ Nîwacokire akîmbîra, ‘Ûkîra ûthiî na mbere na rûgendo rwaku ûtongoretie andû nginya makinye na megwatîre vûrûri ûrîa nerîîre methe mao na mwîvîtwa atî nîngaamava.’

Maûndû marîa Ngai endaga mwîkage

¹² “Rîu mue andû a Isiraeli, na kinthî maûndû marîa Ngai-Mûnene Ngai wenyu endaga kuumana namue tî kûmwîtigîra, kûrûmîrîra njîra ciake cionthe, kûmwenda, kûmûtungatagîra na ngoro yonthe na mwoyo wonthe,

¹³ na kwathîkagîra maathani monthe na mawatho marîa ngûmwatha mûvingie ûmûnthî nîûndû wa wagîrîru wenyu.

¹⁴ Îgûrû na îgûrû kûrîa kûraca mûno wana nthî vamwe na indo cionthe irîa irî kuo nî cia Ngai-Mûnene Ngai wenyu.

¹⁵ Nwatî wendo wa Ngai-Mûnene Ngai wenyu kûrî methe menyu warî mûnene mûno. Kwoguo nîwamûthuurire, mue njiarwa ciao îthenya rîa andû a ndûrîrî irîa ciîngî na mûrî ake nginya ûmûnthî.

¹⁶ Kwoguo kuuma rîu theriani ngoro cienyu mwîyamûrîre Ngai-Mûnene na mûtigatuîke aremi rîngî.

¹⁷ Nîûndû Ngai-Mûnene Ngai wenyu, nîke Ngai wa ngai irîa ciîngî, na Mwathani wa athani. Ke nî mûnene, arî vinya na nîwagîrîrwe nî gwîtigîrwa. Ke ndacagûranagia na ndamûkagîra mavaki.

¹⁸ Atucaga ciira wa aka a ndigwa na ciana cia ndigwa na kîvooto. Nîwendete ageni na nîamavecaga gîa kûrîa wana nguo.

¹⁹ Kwoguo endagani ageni, nîûndû wanamue mwarî ageni vûrûrirî wa Misiri.

²⁰ Tîagani Ngai-Mûnene Ngai wenyu na mûmûtungatagîre wenga. Tuîkani evokeku kûrî ke na mwîvîtage mûkîgwetaga rîîtwa rîake rîonga.

²¹ Nîke mwagîrîrwe nî gûkumia, na nîke Ngai wenyu ûrîa wamûringîre ciama na morirû marîa mwonire na metho menyu.

²² Methe menyu arîa maathiîre Misiri onthe maarî mîrongo mûgwanja. Nwatî rîu, Ngai-Mûnene Ngai wenyu nîatûmîte mwîngîve ta njata cia matuurî.