File 1 - ÎVUKU RÎA ÛVORO MWARO

¹ Kuuma kûrî nie Paûlo, mûndû wovetwe njeera nîûndû wa Jesû Kristû, tûrî na Timotheo, mûriû wa Îthe wetû. Kûrî we Filemona, mûrata wetû ûrîa tûrutithanagia wîra nake,

² na kûrî kanitha ûrîa ûtûnganaga gwaku mûciî, na kûrî mwarî wa îthe wetû Afia, na kûrî Arikipo, mûthigari ûrîa tûrutithanagia wîra nake.

³ Mûrogîa na wega na thayû kuuma kûrî Ngai îthe wetû na Mwathani wetû Jesû Kristû.

Wendo na wîtîkio wa Filemona

⁴ Filemona, mûrû wa îthe wetû, vîndî cionthe rîrîa nîravoya nîngûririkanaga na ngacokeria Ngai wakwa ngatho.

⁵ Nîûndû nîmbîgucaga ûvoro wa wendo ûrîa wîthagîrwa ûrî naguo kûrî andû onthe a Ngai na ûrîa wîtîkîtie Mwathani Jesû.

⁶ Mavoya makwa nî atî ngwatanîro yetû namue tûrî ta etîkia, nîgûtûma tûtaûkîrwe waro nî irathimo cionthe irîa tûnyitaga nîûndû wa kwîthîrwa rûrî ûrûmwe na Kristû.

⁷ Mûrû wa îthe wetû, wendo waku nîûtûmîte ngîe na gîkeno kînene na ûkanyûmîrîria mûno! We nîûcanjamûrîte ngoro cia andû onthe a Ngai.

Paûlo nîwathaithanîre Onesimo

⁸ Kwoguo nîrî ûûrûmwe na Kristû, nîngîakwatha nyûmîrîrîtie wîke ûndû ûrîa wagîrîrîte.

⁹ Nwatî vandû va ûguo nînîrakûthaitha nîûndû nîngwendete. Nie Paûlo nîreka ûguo wana ethîrwa rîu nîrî mûthuuri mûkûrû na rîu njovetwe njeera nîûndû wa Jesû Kristû.

¹⁰ Kwoguo nîrakûthaitha îthenya rîa Onesimo mwana wakwa, nîûndû nîratuîkire îthe wake wa Kîîroho nîrî wa gûkû njera.

¹¹ Mbererî ke aarî mûndû wa mana mûno kûrî we nwatî rîu nîatuîkîte mûndû wa vata kûrî we na kûrî nie.

¹² Nie nîramûtûma rîu acoke kûrî we, na ngîgûtûmîra ke, nî ta ngoro yakwa nîragûtûmîra.

¹³ Nie nwa mende twîkare nake nîguo andethagie vandûrî vaku vîndî îno nîrî gûkû njera njovetwe nîûndû wa kûvunjia ûvoro mwaro.

¹⁴ Nwatî ndirenda gûkûringîrîria ûndethie. Nie nîrenda ûndethie nîûndû wa kwîyendera gwaku we mwene.

¹⁵ Nwakwîthîrwa Onesimo arethîrîtwe atarî vamwe nawe kavinda kau kanini nîguo acoka mûtûûranie nake mavinda monthe.

¹⁶ Na rîu ke tî ngombo tu, nwatî nîakîrîte ngombo; nî mûrû wa îthe wetû. Nanie nîmwendete mûno, nwatî we nîûkûmwenda mûno makîria nîûndû ke nî ngombo yaku na nî mûrû wa îthe wetû wîtîkîtie Mwathani.

¹⁷ Kwoguo ethîrwa nîwicî atî nîtûrutithanagia wîra wa Mwathani nawe, amûkîra Onesimo wata ûrîa ûngînyamûkîra.

¹⁸ Ethîrwa nîakûvîtîrîtie kana arî na thirî yaku, mbîra nîguo ngûrîve.

¹⁹ Nie Paûlo nandîka ava na njara ciakwa atî: Nie Paûlo nînie ngaakûrîva. (Nî ma ndîagîrîrwe nî kûgweta atî wa nawe we mwene wî thirî yakwa.)

²⁰ Kwoguo mûrû wa îthe wetû mwende, wenda tu ndethia nîûndû wa Mwathani. Canjamûra ngoro yakwa, nîûndû we na nie nîtwîtîkîtie Kristû.

²¹ Nîrandîka maarûa îno nîrî na mwîvoko atî we nîûgwîka ûguo nakûria wîke. Nîrî na ma we nîûgwîka wana makîria ya ûguo.

²² Vamwe na ûguo, varîria nyomba îrîa nîngîkara, nîûndû nîrî na mwîrîgîrîro atî Ngai nîakwîgua mavoya menyu muonthe na nîakûmbîtîkîria mbûke kûrî mue.

Ngethi cia mûthiia

²³ Epafara ûrîa twovetwe njera nake nîûndû wa kûvunjia ûvoro mwaro wîgiî Jesû Kristû nîwamûkethia.

²⁴ Wana nîmwakethua nî andû arîa tûrutithanagia wîra nao, na nîo Maariko, Arisitariko, Dema na Luka.

²⁵ Muonthe mûrogîa na wega wa Mwathani wetû Jesû Kristû.