Ezira 3 - ÎVUKU RÎA ÛVORO MWARO

Andû nîmaambîrîrie kûgooca Ngai rîngî

¹ Mwerirî wa mûgwanja andû a Isiraeli onthe maarî matûûrarî mao. Kwoguo onthe nîmaacokire makîgomana vamwe kûu Jerusalemu.

² Jeshua mûvîcî wa Jehozadaki, athînjîri-Ngai arîa maatungataga nao, na Zerubabeli mûvîcî wa Shealitieli marî na andû a nyomba yao nîmaatumire metha ya kîgongoona ya Ngai wa andû a Isiraeli. Maamîtumire nîguo marutîre Ngai magongoona ma kûvîvua wata ûrîa kwandîkîtwe wathorî wa Musa ûrîa warî mûndû wa Ngai.

³ Wana ethîrwa nîmeetigagîra andû arîa maatûûraga vûrûri ûcio, nîmaatumire metha ya kîgongoona wa varîa yarî mbere. Nao nîmaacokire makîambîrîria rîngî kûrutîra Ngai-Mûnene matega ma kûvîvua vo kîraûko na kîvwaî.

⁴ Nîmaakûngûîre kîrugo gîa tûnyomba twa magema wata ûrîa kwandîkîtwe wathorî, na wa mûthenya nîmaarutaga matega ma kûvîvua mwîgana ûrîa wavataranagua.

⁵ Na vuva wa gûkûngûîra kîrugo gîa tûnyomba twa magema, nîmeethagîrwa marî na matega mengî ma kûvîvua. Matega mau maarî ma vîndî ya karûngamo ka mweri na irugo cionthe irîa ciagoocagwa Ngai-Mûnene. Na nîkwethagîrwa kûrî na matega mengî marîa andû maategagîra Ngai-Mûnene na njîra ya kwîyendera.

⁶ Andû a Isiraeli maambîrîrie kûrutîra Ngai-Mûnene matega ma kûvîvua mûthenya wa mbere wa mweri wa mûgwanja. Nwatî mûcingi wa hekarû ndwarî mûtume.

Hekarû nîyambîrîrie gûtumwa rîngî

⁷ Andû nîmaacokire makîvecana mbeca cia kûrîva mavundi ma mathiga na ma mbaû. Na nîmaaveere andû a matûûra ma Turo na Sidoni irio, gîakûnyua, na maguta ma mîtî ya mîtamaiyû îrîa îciaraga matunda nîguo mamaviragîre mîtî ya mîtarakwe îriarî rîa Jopa kuuma Lebanoni. Mûthamaki Cairasi wa Perisia nîke wamaveete rûtha rwa gwîka maûndû mau.

⁸ Mweri wa kaîrî wa mwaka wa kaîrî kuuma macoka Jerusalemu varîa hekarû ya Ngai yatumîtwe, nîmaambîrîrie wîra wa gûtuma hekarû. Zerubabeli mûvîcî wa Shealitieli, Jeshua mûvîcî wa Jehozadaki nîo maambîrîrie wîra marî vamwe na andû ao, athînjîri-Ngai, na Alawi, na andû onthe arîa maacokire Jerusalemu kuuma îthamîriorî, nîmaanyitanîre vamwe kûruta wîra. Nao Alawi onthe arîa makinyîtie ûkûrû wa mîaka mîrongo îrî na makîria nîmaatuirwe arûngamîrîri a wîra wa gûtuma hekarû rîngî.

⁹ Jeshua ûrîa warî Mûlawi na avîcî ake, na Kadimieli na avîcî ake (maarî a mûvîrîga wa Hodavia) nîmaatuîkire arûngamîrîri a gûtuma hekarû wanao. (Nîmaatethererue wîra ûcio nî Alawi a mûvîrîga wa Henadadi.)

¹⁰ Vîndî îrîa atumi a hekarû maarîkirie gûtuma mûcingi wayo, athînjîri-Ngai mekîrîte nguo ciao cia ûtungata nîmoocire tûrumbeta. Nao Alawi, ciana cia Asafu nîmoocire ithaani irîa iringithanagua rîrîa andû makwina nyîmbo, na onthe nîmaambîrîrie gûkumia Ngai-Mûnene kûringana na kîrîra kîrîa gîatigirwe nî Daudi mûthamaki wa Isiraeli.

¹¹ Nîmaainire nyîmbo cia gûkumia Ngai-Mûnene makiugaga atîrî, “Ngai-Mûnene nî mwaro, wendo wake ûtathiraga kûrî andû a Isiraeli nî wa tene na tene.” Andû onthe nîmaaugîrîrie na vinya wata ûrîa mangîavotire, magîkumagia Ngai-Mûnene nîûndû wîra wa gûtuma mûcingi wa hekarû nîwambîrîrîtue.

¹² Andû eengî nîmaaugagîrîria marî na gîkeno. Nwatî athînjîri-Ngai eengî, Alawi, na anene a nyomba cia andû a Isiraeli arîa maarî akûrû na moonete hekarû îrîa ya mbere, nîmaarîrire mona mûcingi wa hekarû îo ya kaîrî.

¹³ Kwoguo andû matiagîcaga na ngûrani ya andû arîa maugagîrîria nî gûkena na arîa maugagîrîria makîrîra nîûndû nîmaaugîrîrîtie na mûgambo mûnene na nîweguîkaga kûndû kûraca.