Ezek 8 - ÎVUKU RÎA ÛVORO MWARO

Kûgooca mîvuanano îtûûrarî rîa Jerusalemu

¹ Mûthenya wa gatano mwerirî wa gatandatû mwaka wa gatandatû, naarî gwakwa mûciî tûrî vamwe na athuuri a Juda. Wa rîmwe nînagîrwe nî vinya wa Ngai-Mûnene.

² Nînacokire ngîroria na ngîona kîndû Kîamrî na mûvuanano ta wa mûndû. Kuuma kîûnûrî Kîam mûvuanano ûcio kûnyûrûrûka na nthî gwakanaga mwaki. Na kuuma kîûnûrî kûthiî na îgûrû gwakengaga ta cuuma ya gîcango îno ntherie mûno.

³ Nîwakûnjûrire kîndû gîekariî ta njara akînyita njuîrî yakwa, nake Roho wa Ngai akîmbûkîrîria na îgûrû rîerarî na akîmvira Jerusalemu. Nîrî kîonekirî kîu Kîam Ngai, nonire amvira mûrangorî wa kîvingo Kîam ndaarî wa kîvaro ûrîa werekerete na mwena wa rûgûrû wa hekarû. Vau vaarî na mûvuanano watûmaga Ngai arakare.

⁴ Nînacokire ngîona riiri wa Ngai wa Isiraeli vo wata ûrîa noonete nîrî kûndû kûrîa kwaraganu.

⁵ Nake nîwambîrire atîrî, “Mûndû, taroria na mwena wa rûgûrû.” Kwoguo nînaroririe, na vau mwenarî wa rûgûrû wa metha ya kîgongoona kwarî na mûvuano ûcio watûmaga Ngai arakare.

⁶ Nake nîwambîrire atîrî, “Mûndû, nîûrona ûrîa andû a Isiraeli mareka? Mareka maûndû marî mûgiro na ma gûtûma nthiî kûraca na nyomba yakwa îrîa nyamûre. Nîûkwona maûndû manene na marî magigi gûkîra mau.”

⁷ Nîwacokire akîmvira mûromorî wa kîvaro, na rîrîa naaroririe nînonire îrima rûthingorî.

⁸ Nake Ngai nîwambîrire atîrî, “Mûndû, tûrîkia rûthingo rûrû.” Na rîrîa naatûrîkirie rûthingo nînonire varî na mûrango.

⁹ Nake nîwambîrire atîrî, “Tonya ûthiî wone maûndû macûku na marî mûgiro marîa mareka kûu.”

¹⁰ Nînatonyire ndaarî na ngîroria. Rûthingorî gwecûrîte mbica cia nyamû cionthe irîa ikurumaga na irî mûgiro na mîvuano îrîa andû a Isiraeli maagoocaga.

¹¹ Mbere ya mîvuanano îo kwarî na athuuri mîrongo mûgwanja a Isiraeli, na Jaazania mûvîcî wa Shafani arûngamîte vamwe nao. Wa mûndû agwete kathaani ga kûvîvîria ûbani, na ndogo ya ûbani nîyaumaga îkiunûkagia.

¹² Ngai nîwacokire akîmbîra atîrî, “We mûndû, nîûrona maûndû marîa atongoria a Isiraeli mareka na nthitho? Wa mûndû arî nyomba gwake akîgooca mîvuanano. Meîraga atî, ‘Ngai-Mûnene ndaratwona! Ke nîatiganîrîtie vûrûri wetû.’ ”

¹³ Ngai nîwambûririe atîrî, “Nîûkoona magîka maûndû manene makîria marîa menete.”

¹⁴ Nîwacokire akîmvira kîvingorî gîa hekarû Kîam mwena wa rûgûrû. Kwarî na aka mekarîte nthî makîrîrîra Tamuzi, ngai ya mûvuanano.

¹⁵ Ngai nîwambûririe atîrî, “Mûndû, nîwona maûndû mau? Nîûkwona wana maûndû mengî marî mûgiro gûkîra mama.”

¹⁶ Kwoguo nîwamvirire kîvarorî Kîam ndarî gîa hekarû. Vakuvî na kîvingo gîa hekarû, gatagatî ga kîthaku na metha ya kîgongoona kwarî na athuuri mîrongo îîrî na atano. Athuuri acio nîmaavuvatîrîte hekarû na makenamîrîria mothiû mao nthî merekerete na mwena wa îrathîro makîgoocaga riûa.

¹⁷ Ngai-Mûnene nîwambîrire atîrî, “Mûndû, nîwona maûndû mau? Maûndû mau marî mûgiro andû a Juda mareka marona arî ûndû mûnini, nîûndû nîmatûmîte vûrûri wonthe ûgîe mbaara na magatûma nthiî na mbere kûrakara? Taroria, nîmarandakaria makîria!

¹⁸ Kwoguo nîngamaverithia nîrî na marakara. Ndikaamacaîra kana nîmeguîra ntha. Wana mangîkaavoya maugîrîrîtie ndikaamathikîrîria.”