Ezek 7 - ÎVUKU RÎA ÛVORO MWARO

Îvinda rîa mûthiia rîa andû a Isiraeli

¹ Ngai-Mûnene nîwambîrire atîrî,

² “We mûndû, îra andû a Isiraeli atî nie Ngai-Mûnene mbugîte ûyû nî mûthiia! Ûyû nî mûthiia wa vûrûri wonthe!

³ “Mue andû a Isiraeli mûthiia nîûmûkinyîrîte; nîngwîtûrûra marakara makwa kûrî mue. Ngamûtuîra kûringana na mîtugo yenyu, na nîngamûverithia nîûndû wa maûndû menyu macûku.

⁴ Ndikamûcaîra na ndikamwîguîra ntha, nwatî nîngamûverithia kûringana na mîtugo yenyu. Nîngamûverithia nîûndû wa maûndû marîa marî magigi mwîkîte, na nîmûkaamenya atî nie nînie Ngai-Mûnene.”

⁵ Ngai-Mûnene augîte atîrî, “Mûthiro nî yûka kûrî mue îrûmanîrîrîte.

⁶ Mûthiia nî mûkinyu! Mûthiia nî mûkinyu! Mûthiia nî ûmûkinyîrîte!

⁷ Mue arîa mûtûûraga vûrûrirî ûyû, mûthiro wenyu nî ûkîte! Kavinda nî gakinyu, na mûthenya ûrî vakuvî; mûthenya wa thîna nwatî tî mûthenya wa kugîrîria na gîkeno irîmarî.

⁸ “Kavinda gatarî karaca nîngûmwîtûrûrîra marakara makwa. Nîmûtuîre ciira kûringana na mîthiîre yaku, na nîûgacokererwa nî maûndû menyu monthe macûku.

⁹ Ndigaagûcaîra kana ngwîguîra ntha, nîngakûverithia kûringana na mîthiîre yaku mîcûku. Nîûkaamenya atî nînie Ngai-Mûnene mverithanagia.”

¹⁰ “Taroriani, mûthenya nîmûku; mûthiro wenyu nîmûkinyu. Mbûkanîrîro îcûrîte kûndû kuonthe na mwîtîîo ûkengîva.

¹¹ Mbûkanîrîro nîîngîvîte mûno. Gûtirî wanarî ûmwe wao ûgaatigara, kana indo irîa magîte nacio itigare, kana ûtonga, kana gûtigare wanarî mûndû ûrî na riiri.

¹² “Kavinda nîgakinyu na mûthenya nwa ûrakuvîvîria. Mûgûri wa indo nîatige gûkena, kana mwendia wa indo egue kîeva nîûndû marakara ma Ngai magaakinyîra andû onthe.

¹³ Mwendia ndagaacokererwa nî kîndû kîrîa eendirie wana angîtûûra mwoyo, nîûndû marakara ma Ngai magaakinyîra andû onthe. Kwoguo gûtirî mûndû ûgaatigara mwoyo nîûndû wa mevia make.

¹⁴ Nîmaavuvîte karumbeta na andû onthe mevarîria, nwatî gûtirî mûndû wanarî ûmwe ûkûthiî mbaararî, nîûndû marakara makwa nîmakinyîrîte andû onthe.

Andû a Isiraeli nîmaaverithirue nîûndû wa mevia mao

¹⁵ “Nakûu nja kûrî mbaara, nakuo matûûrarî kûrî na mûthiro na yûra. Arîa marî na kûu mîgûndarî magaakua marî mbaararî; na arîa marî îtûûrarî makaathirua nî yûra na mîrimû.

¹⁶ Andû arîa makaavonoka nîmakaaûra na mathiî magekarage irîmarî, magîcayaga ta ndutuura cia ciandarî, wa mûndû nîûndû wa mevia make.

¹⁷ Njara cia andû onthe ikethîrwa itarî na vinya, namo maru mao mainaine.

¹⁸ Nîmagekîra nguo cia macakaya na mekare mamakîte mûno. Nîmakoonekaga marî na gîconoko na menjetwe njuîrî ciongo.

¹⁹ Nîmagaikia sîlûva njîrarî, na thaavu yao igaatuîka ta kîndû gîtarî kîtheru. Sîlûva na thaavu ciao itikaavota kûmavonokia mûthenya ûrîa Ngai-Mûnene akaametûrûrîra marakara make. Itikaamathiria vata kana imavaithie, nîûndû mbeca icio na thaavu nîcio ciatûmire matonye waganurî.

²⁰ Nîmeetîîaga nîûndû wa ûthaka wa mathiga mao ma goro ma kwîgemia, na nîmaamatûmîre kûthondeka mîvuanano îrî magigi na mîmene mûno. Kwoguo nîngaatûma ûthaka ûcio wao ûtuîke kîndû kîrî mûgiro kûrî o.

²¹ “Nîngaanenganîra indo ciao kûrî mavûrûri mageni na ndûme ituîke ta indo itavîtwe na vinya nî andû arîa aganu. Nao nîmakaaûgwatia mûgiro.

²² Nîngaamatiganîria nîguo magwatie vandû vakwa varîa vatheru mûgiro, nao acunani matonye kuo na mavagwatie mûgiro.

²³ “Thondeka nyororo, nîûndû vûrûri wîcûrîtwe nî ûragani na matûûra magecûrwa nî mbaara.

²⁴ Kwoguo nîngaarete mavûrûri maganu mûno megwatîre nyomba ciao, naguo mwîtîîo wa andû arîa marî vinya ûthire; nakuo kûndû kwenyu gwa kûgoocera kûgwatue mûgiro.

²⁵ Rîrîa maûndû ma kîeva magaaûka, nîmûgaacaria thayû, nwatî mûtikaawona.

²⁶ Maûndû macûku magaaûka marûmanîrîrîte. Ndûmîrîri cia maûndû macûku igaaûkaga irûmanîrîrîte. Nîmagaacaragia kîoneki kuuma kûrî arathi. Athînjîri-Ngai nîmagaatura ûndû wa kûthomithania, nao athuuri matikethîrwa marî na kîrîra.

²⁷ Mûthamaki nîagaacakayaga, na mûtongoria athirwe nî kîîrîgîrîro. Andû a vûrûri nîmagaatetemaga nî guoya. Nie nanie ngaamekaga maûndû kûringana na mîthiîre yao na nîngaamatuîra ciira wata ûrîa magîrîrwe nî gûtuîrwa, na nîmakaamenya atî nînie Ngai-Mûnene.”