Ezek 5 - ÎVUKU RÎA ÛVORO MWARO

Ezekieli nîwenjire njuîrî ciake

¹ Ngai-Mûnene nîwambîrire atîrî, “We mûndû, oca rûviû rûûgî. Rûtûmîre ta kawembe ka mwenji wenje nderu ciaku na njuîrî ciaku cia kîongo. Ûcoke ûithime na ûigaanie maita mathatû (3).

² Rîrîa mîthenya ya kûrigicîria îtûûra rîa Jerusalemu îkaathira, nîûgoca gîcunjî kîmwe Kîam ithatû ûthiî ûgakîvîvîrie gatagatî ga îtûûra. Na gîcunjî kîmwe Kîam ithatû ûgîtinangîrie mîenarî yonthe ya îtûûra. Nakîo gîcunjî kîu kîngî Kîam kathatû ûkîgûrûkithie na rûkûngi nîûndû nîngaamarûmîrîria njomorete rûviû.

³ Nîûgaacoka woce tûcuîrî tûnini na ûtwoverere mûthiiarî wa nguo yaku.

⁴ Nîûgoca tûcuîrî twîngî na ûtûikie mwakirî tûvîe viû. Mwaki nîûkaauma vau na ûtambe kûrî andû onthe a Isiraeli.”

⁵ Ngai-Mûnene augîte atîrî, “Rîîrî nî îtûûra rîa Jerusalemu. Nîrigîte gatagatî ka ndûrîrî na ngatûma rîrigicîrue nî mavûrûri.

⁶ Jerusalemu nîyareganire na mawatho makwa na îgîka maûndû macûku gûkîra mavûrûri marîa mengî, îgîtuîka îtûûra îremi gûkîra mavûrûri marîa marîthiûrûrûkîrîtie; nîyareganire na kîrîra gîakwa na matuîro makwa ma ciira.

⁷ Kwoguo, thikîrîriani ûrîa Ngai-Mûnene ekuga. Mûrî aremi gûkîra mavûrûri marîa mamûthiûrûrûkîrîtie. Nîmûregete kûrûmîrîra irîra ciakwa na matuîro makwa ma ciira, mûkîrûmîrîra mîtugo ya mavûrûri marîa mamûthiûrûrûkîrîtie.

⁸ Kwoguo, nie Ngai-Mûnene wana nie nîngûregana namue na nîngaamûtuîra ciira ndûrîrî ikîonaga.

⁹ Nîûndû wa maûndû monthe macûku marîa mwaneka, nîmbîka kûrî mue maûndû ndaneka na ndageka rîngî.

¹⁰ Kwoguo, aciari nîmakaarîa ciana ciao mûkîonaga, nacio ciana irîe aciari a cio. Nîmue ngaaverithia, nao arîa magaatigara gatagatîrî kenyu matakuîte nîngamanyagania na mîena yonthe.”

¹¹ “Kwoguo, nie Ngai-Mûnene, wata ûrîa ndûraga mwoyo, nîûndû nîmûgwatîtie nyomba yakwa mûgiro na njîra ya gwîka maûndû macûku, nîngaamûrega muonthe ndakwîguîra mûndû wana ûrîkû ntha.

¹² Gîcunjî kîmwe Kîam ithatû Kîam andû enyu, nîmagaakua nî mûrimû mûcûku na yûra marî kûu mûrî; gîcunjî kîmwe Kîam ithatû kîngî nîgîgaakuîra mbaararî kûu îtûûrarî; gîcunjî kîu kîngî Kîam ithatû nîngaakînyagania nthî yonthe na njoke nîkîrûmîrîrie na rûviû.

¹³ “Ûguo nîguo marakara makwa makaathira na mvorerie mang'ûrîka makwa kûrî o nîguo mbîganîre. Vuva wa ûguo nîmakaamenya atî nie Ngai-Mûnene nîmaverithîtie nîûndû wa kûrega gûtuîka evokeku kûrî nie.

¹⁴ Nacio ndûrîrî irîa ikûthiûrûrûkîrîtie nîigaagûtua kîndû gûtarî, na andû arîa makavîtûkagîrîra vakuvî nawe makûnyarare.

¹⁵ “Rîrîa ngaamûverithia nîrî na marakara meengî, nîmûgaatuîka kîndû gîa kûthekagîrîrwa na kûrumwa nî ndûrîrî irîa imûthiûrûrûkîrîtie. Nie Ngai-Mûnene nînie nauga ûguo.

¹⁶ Vîndî îo nîngarekereria mîguî yakwa ya kûragana ya yûra îmûrathe îmûthirie. Nîngatûma yûra rîongerereke na irio cienyu ithire.

¹⁷ Kwoguo nîngaatûma kûgîe na yûra gatagatî kenyu na nîmûrekerie nyamû cia kîthaka irîe ciana cienyu. Nîmûkeethîrîrua nî mîrimû mîcûku, mbûragano na mbaara cia kûmûthiria. Nie Ngai-Mûnene nînie nauga ûguo.”