Ezek 47 - ÎVUKU RÎA ÛVORO MWARO

Karûnjî karîa kaanyûrûrûkaga kaumîte hekarûrî

¹ Mûndû ûrîa nîwanjokirie mûromorî wa hekarû. Vau manjî maumaga na rungu rwa mûromo na makanyûrûrûka mathiîte mwena wa îrathîro (nîûndû hekarû yaroretie mwena wa îrathîro). Manjî manyûrûrûkaga kuuma nthî mwena wa îveti wa hekarû mavîtûkîrîrîte mwena wa îveti wa metha ya kîgongoona.

² Nîwacokire akînduta nja tûvîtûkîrîrîte kîvingorî Kîam mwena wa rûgûrû na akînthiûrûrûkia kinya kîvingorî kîrîa kîroretie mwena wa îrathîro. Kwarî na manjî maanyûrûrûkaga na mwena wa îveti.

³ Mûndû ûcio nîwocire kîndû gîa kûthima na akîthima mita magana matano (500) anyûrûrûkanîtie na karûnjî na mwena wa îrathîro. Nîtwathiîrîre kûu manjîrî namo manjî maatûkinyaga nthûng'wa.

⁴ Nîwacokire akîthima rîngî mita magana matano (500) kûnyûrûrûka na tûkîthiîrîra manjîrî magîtûkinya maru. Akîthima rîngî mita magana matano (500) kûnyûrûrûka, namo manjî magîtûkinya kîûnû.

⁵ Akîthima rîngî mita magana matano (500) anyûrûrûkîte, na karûnjî gagîtuîka kariku na ndingîavotire kûringa tiga nwa mûndû athambîrîte.

⁶ Mûndû ûcio nîwambîrire atîrî, “Mûndû roria maûndû mama waro.” Nîwacokire akînjokia na rûtere rwa karûnjî nginya varîa twambîrîrîtie.

⁷ Rîrîa nacokaga nînonire mîena yoîrî ya karûnjî kûrî na mîtî mîngî.

⁸ Nîwambîrire atîrî, “Manjî mama manyûrûrûkaga mavîtûkagîra vûrûrirî wa mwena wa îrathîro mathiîte Kîamndarî Kîam Jorodani. Na makinya îriarî rîa cumbî nîmatûmaga manjî ma îria rîu matuîka maro.

⁹ Kûrîa kuonthe rûnjî rûu rûthiîrîrîte gûkethagîrwa na nyamû cia mîthemba yonthe na nthamaki. Rûnjî rûu rûgatûma manjî ma îria rîa cumbî matuîke maro, na kûrîa rûkathiîrîra nîrûgaatûma ciûmbe igîe na mwoyo.

¹⁰ Ategi a nthamaki nîmakethagîrwa rûtere rwa îria kuuma Engedi kinya ithimarî cia Enegilaimu marî neti ciao magîtega na nîmagaacianîkaga kuo nîguo ciûme. Îriarî rîu gûkethîrwa na nthamaki mîthemba mîngî wata irîa irî îriarî rîa Mediterania.

¹¹ Nwatî manjî marî marimbarî na marî tûrikorî mwena wa îria gûtikethîrwa na manjî maro, mau makethîrwa marî ma cumbî.

¹² Ndereerî cia rûnjî rûu mîena yoîrî nîgûgaakûra mîtî ya mîthemba yonthe ya matunda ma kûrîwa. Mîtî îo îkethagîrwa îrî mîruru vîndî cionthe na nîgaciaraga matunda mweri wa mweri nîûndû wa manjî marîa manyûrûrûkaga kuuma hekarûrî. Matunda mayo nî ma kûrîa na mathangû mayo nî ma kûvonia andû arîa arwaru.”

Mîvaka ya vûrûri

¹³ Ngai-Mûnene Ngai nîwambîrire atîrî, “Îno nîyo mîvaka ya vûrûri ûrîa ûkaagaîrwa mîvîrîga îrîa îkûmi na îîrî (12) ya Isiraeli na mûvîrîga wa Josefu ûkaagaîrwa icunjî igîrî.

¹⁴ Nînevîtire ngiuga nîngava methe menyu vûrûri ûyû ûtuîke wao. Rîu gaîrani mîvîrîga yonthe icunjî ciîganene.

¹⁵ “Mûvaka wa rûgûrû ûkethîrwa umîte îriarî rîa Mediterania kûthiî îtûûrarî rîa Hethiloni, ûvîtûkîrîre mwanyarî wa Hamathi, ûthiî nginya îtûûrarî rîa Zedadi,

¹⁶ Kuuma vau Berotha na Siburaimu (matûûra marîa marî gatagatî ka Damesiki na Hamathi). Ûcoke ûvîtûke ûthiîte îtûûrarî rîa Tikoni (rîrîa rîrî vûrûri wa Haurani).

¹⁷ Kwoguo mûvaka wa mwena wa rûgûrû ûkaambîrîria îriarî rîa Mediterania ûthiîte mwena wa îrathîro kinya îtûûrarî rîa Hazaru Enoni ûthiîrîre mûvakarî wa Damesiki na Hamathi na mwena wa rûgûrû.

¹⁸ “Mwena wa îrathîro, mûvaka ûkauma Hazaru Enoni gatagatî ka Haurani na Damesiki ûrûmîrîrîte rûnjî rwa Jorodani ûgaanîtie vûrûri wa Isiraeli na vûrûri wa Gileadi. Isiraeli îkethîrwa îrî mwena wa îthûîro nayo Gileadi îthîrwe îrî mwena wa îrathîro ûthiîte nginya Tamarû îriarî rîa cumbî.

¹⁹ “Mwena wa îveti, ûkaauma Tamarû ûthiî kinya ithimarî cia Meribathi Kadeshi. Ûcoke ûrûmîrîre mûvaka wa vûrûri wa Misiri kûthiî îriarî rîa Mediterania. Ûcio nîguo ûgaatuîka mûvaka wa mwena wa îveti.

²⁰ “Mwena wa îthûîro, mûvaka ûkethîrwa ûrî îria rîa Mediterania na ûthiîte nginya mwena wa îthûîro rîa mwanya wa Hamathi.

²¹ “Kwoguo mûkagaana vûrûri ûyû kûringana na mîvîrîga ya andû a Isiraeli.

²² Mûkaûgaa ûtuîke wenyu na mûgaîre andû a ndûrîrî arîa mûtûûranagia nao na magîrîrîte ciana kuo. Andû acio a ndûrîrî mûkaamatua ta andû a Isiraeli na makaagaîrwa mîgûnda nîguo îtuke yao wata andû acio engî a Isiraeli.

²³ Andû a ndûrîrî arîa matûûraga gatagatî kenyu makaagaîrwa mîgûnda mîvîrîgarî îrîa matûûraga. Nînie Mwathani Ngai-Mûnene nauga ûguo.”