Ezek 45 - ÎVUKU RÎA ÛVORO MWARO

Gîcunjî kîa Ngai-Mûnene vûrûrirî

¹ “Rîrîa mûkagaania vûrûri nîguo wa mûvîrîga wîgwatîre kûndû kwaguo, nîmûkagaa gîcunjî Kîammûrîrwe Ngai-Mûnene. Gîcunjî kîu gîkethîrwa kîrî Kîam ûraca wa kilomita îkûmi na igîrî na nuthu (12.5) na wariî wa kilomita îkûmi (10).

² Ndarî yakîo nîgûkethîrwa na gîcunjî Kîam ûraca wa mita magana maîrî na mîrongo îtano (250) na wariî wa mita magana maîrî na mîrongo îtano (250) gîa hekarû. Gîcunjî kîu gîkaathiûrûrûkîrua nî kîvaro kîngî Kîam wariî mita mîrongo îîrî na ithano (25).

³ Gîcunjîrî kîu Kîammûrîrîtwe Ngai-Mûnene nîûkaathima gîcunjî Kîam hekarû kuuma kûrî kîo Kîam ûraca wa kilomita îkûmi na igîrî na nuthu (12.5) na wariî wa kilomita ithano (5). Vau nîvo vagaatumwa hekarû îrîa îgatuîka ntheru gûkîra kûndû kuonthe.

⁴ Kûndû kûu gûkethîrwa kûrî kûtheru vûrûrirî, na kûrî kwa athînjîri-Ngai arîa matungataga hekarûrî na mathiîcaga vakuvî na Ngai-Mûnene. Gîgaatuîka gîa gûtumwa nyomba cia athînjîri-Ngai na hekarû.

⁵ Gîcunjî kîu kîngî Kîam ûraca wa kilomita îkûmi na igîrî na nuthu (12.5) na wariî wa kilomita ithano (5) nîgîkaagawa gîa gûtuma mîciî ya gûtûûrwa nî athînjîri-Ngai arîa matungataga hekarûrî.

⁶ “Nîvakethîrwa na gîcunjî kîngî kîriganîtie na kîrîa Kîammûrîrîtwe Ngai-Mûnene Kîam ûraca wa kilomita îkûmi na igîrî na nuthu (12.5) na wariî wa kilomita igîrî na nuthu (2.5). Kîu gîgaatumwa îtûûra rîrîa mûndû wa wonthe wa Isiraeli angîthiî gûtûûra.

Gîcunjî kîa mûnene

⁷ “Mûnene ûrîa ûrathana nîakaagaîrwa vûrûri wake. Gîcunjî gîake na mwena wa îthûîro gîkethîrwa kîvakanîte na kûndû kûrîa kwamûre kûthiî nginya îriarî rîa Mediterania. Mwena wa îrathîro gîkaathiî nginya mûvakarî wa vûrûri wa Isiraeli. Ûraca wakîo ûkethîrwa wîgana ta ûraca wa vûrûri ûrîa ûgaîrîtwe mîvîrîga ya Isiraeli.

⁸ Gîcunjî kîu gîgaatuîka îgai rîa mûnene ûrîa ûrathana vûrûrirî wa Isiraeli nîguo ndakavinyîrîrie andû akwa, nwatî areke andû magaîrwe vûrûri ûcio wîngî kûringana na mîvîrîga ya Isiraeli.”

Mawatho ma mûnene

⁹ Ngai-Mûnene augîte atîrî, “Mue anene a andû a Isiraeli nîmwîvîtie vandû va kavinda karaca. Thirwani nî waganu na mûtige kûvinyanîrîria mwîkage maûndû ma kîvooto na ma waragania. Tigani kûvinyûria andû akwa kuuma vûrûrirî wao. Nie Ngai-Mûnene nînie nauga ûguo.

¹⁰ Mûndû wa wonthe nwanginya avûthagîre ithimi irîa mbagîrîru akîthima ûrito kana ûraca wa kîndû.

¹¹ “Mûkathimaga indo ta mûtu na efa, na indo irîa ndweku ta manjî na bathi. Ithimi icio cionthe nîciîganenie ûrito. Efa îmwe nî gîcunjî kîmwe gîa îkûmi (10) Kîam homeri, na bathi îmwe nî gîcunjî kîmwe gîa îkûmi (10) Kîam homeri. Ikîringithanua, homeri îmwe (1) nîta lita îgana rîa mîrongo mûgwanja na ithano. Kwoguo Efa na bathi ithimîtwe nî cia lita îkûmi na mûgwanja na nuthu (17.5). Homeri nîkîo kîthimi kîrîa gîtîkîrîku.

¹² Ithimi cia ûrito nacio: Gera mîrongo îîrî (20) nî cekeli îmwe (1). Cekeli mîrongo îtano (50) nî mina îmwe (1).

¹³ “Ino nîcio ithimi irîa mûkaarutaga matega nacio. Varî Homeri îmwe (1) ya ngano kana ya cairi, mûkaarutaga gacunjî kamwe ka ithathatû ka Efa (1/6).

¹⁴ Namo maguta mûkaathimaga gîcunjî kîmwe gîa îkûmi (1/10) Kîam Bathi kuuma kûrî Kori îmwe (1). Kori îmwe îringithanîtue nî ûndû ûmwe na Homeri îmwe. Bathi îkûmi (10) nî Kori îmwe (1).

¹⁵ Varî wa ng'ondu magana maîrî nîmakaaruta ng'ondu îmwe kuuma kûrî ndîthia cia andû a Isiraeli. Rîrî nî îtega rîa irio cia mûgûnda, îtega rîa kûvîvua na îtega rîa thayû nîguo andû arîa mamareta mavoroverue mevia mao. Ûguo nîguo Ngai-Mûnene augîte.

¹⁶ Andû onthe a vûrûri wa Isiraeli nîmakaavira matega mau kûrî mûnene ûrîa ûrathana Isiraeli.

¹⁷ Nake mûnene ûrîa ûrathana nîke wagîrîrwe nî kûvecana nyamû cia îgongoona irîa ikaavîvua itarî nthînje, matega ma irio cia mûgûnda na matega ma indo cia kûnyua vîndî ya irugo cia karûngamo ka mweri, thavatû na irugo cionthe irîa nyamûre cia andû a Isiraeli. Vamwe na ûguo nîakaaruta matega ma kûthiria mevia, matega ma irio cia mûgûnda, matega ma kûvîvua na matega ma thayû nîguo agwatanie andû onthe a Isiraeli.

Irugo

¹⁸ “Mûthenya wa mbere wa mweri wa mbere nîûkaaruta ndegwa îtarî wonje ya îgongoona nîguo mûtherie hekarû. Ûguo nîguo nie Ngai-Mûnene nauga.

¹⁹ Mûthînjîri-Ngai nîagoca nthakame îmwe ya nyamû ya îgongoona rîa kûtheria mevia na amîvake itugîrî cia mîrango ya hekarû, na mîenarî îna ya metha ya kîgongoona na itugîrî cia mîvîrîga ya gûtonya kîvarorî Kîam ndarî.

²⁰ Mûthenya wa mûgwanja wa mweri mûthînjîri-Ngai ageka wa ûguo nîûndû wa mûndû wa wonthe ûrîa ûngîvia atakwenda kana evie nîûndû wa kûrigwa. Na njîra îo nîmûkaatheria hekarû.

²¹ “Mûthenya wa îkûmi na îna wa mweri wa mbere, mûgakûngûagîra kîrugo Kîam pasaka. Vandû va mîthenya mûgwanja mûkarîcaga mîgate îtekîrîtwe ndawa ya kwimbia.

²² Mûthenya ûcio mûnene nîakaaruta ndegwa îmwe ya matega ma mevia make na ma andû a vûrûri.

²³ Na îvinda rîa mîthenya mûgwanja îo ya kîrugo Kîam pasaka, wa mûthenya wa mûthenya mûnene nîakaarutîra Ngai-Mûnene îtega rîa kûvîvua rîa ndegwa mûgwanja na ndûrûme mûgwanja itarî na wonje na ikaavîvua irî ng'ima. Na wa mûthenya wa mûthenya nîakaaruta îgongoona rîa nthenge nîûndû wa mevia.

²⁴ Nîagaacoka arute kilo îkûmi na mûgwanja na nuthu (17.5) cia mûtu kûrî wa ndegwa na kilo îkûmi na mûgwanja na nuthu (17.5) kûrî wa ndûrûme cia îgongoona rîa kûvîvua irî îtega rîa irio cia mûgûnda, na arute lita ithatû cia maguta kûrî wa kilo îkûmi cia mûtu.

²⁵ “Kîrugo gîa tûnyomba kîthagîrwa kîrî Kîam mîthenya mûgwanja na Kîammbagîrîria mûthenya wa îkûmi na îtano wa mwerirî wa mûgwanja. Mûnene wa vûrûri wa Isiraeli nîakaaruta wa mûthenya wa mûthenya îtega rîa kûtheria mevia, îtega rîa kûvîvua na îtega rîa irio cia mûgûnda vamwe na îtega rîa maguta.”