Ezek 44 - ÎVUKU RÎA ÛVORO MWARO

Ûrîa mwîrîga wa mwena wa îrathîro wavûthagîrwa

¹ Mûndû ûrîa nîwanjokirie mwîrîgarî wa nja wa mwena wa îrathîro rîa hekarû, naguo warî mûvinge.

² Ngai-Mûnene nîwambîrire atîrî, “Mwîrîga ûyû ûgekaraga ûrî mûvinge na ndûkaarugûrwa. Gûtirî mûndû wagîrîrwe nî kûûvûthîra nîûndû nie Ngai-Mûnene, Ngai wa Isiraeli nîndonyerete mwîrîga ûcio. Kwoguo ûgekaraga ûrî mûvinge.

³ Mûnene ûrîa ûrathana nwa atonye athiî akarîe irio irîa nyamûre mbere ya Ngai-Mûnene. Agaatonyera na akaumîrîra mûrangorî ûrîa ûrî kanyombarî ga gûtonya hekarûrî.”

⁴ Mûndû ûcio nîwacokire akîmbira mwena wa mbere wa hekarû tûvîtûkîrîrîte mûrangorî wa mwena wa rûgûrû. Nînaroririe na ngîona hekarû îcûrîte riiri wa Ngai-Mûnene, ngîcoka ngîturumithia ûthiû wakwa nthî.

⁵ Ngai-Mûnene akîmbîra atîrî, “Mûndû, roria waro, tega matû maku ûthikîrîrie maûndû marîa ngûkwîra megiî mawatho ma hekarû ya Ngai-Mûnene. Menya waro andû arîa magîrîrwe nî gwîtîkîrua gûtonya hekarûrî na nî arîkû matagîrîrwe nî gûtonya kuo.

⁶ “Îra andû acio a Isiraeli aremi Ngai-Mûnene augîte atî, nîmatige gwîka maûndû mau marî mûgiro methîrîtwe magîka.

⁷ Nîmagwatîtie hekarû yakwa mûgiro nîûndû wa gwîtîkîria ageni na andû arîa matarî aruu matonya hekarûrî rîrîa nîrarutîrwa maguta na nthakame ya magongoona. Kwoguo andû akwa nîmekîte maûndû marî magigi na nîmaunîte kîrîkanîro gîakwa.

⁸ Nîmûregete kûrûmîrîra mawatho makwa marîa mamûre ma hekarû, vandû va ûguo ageni nîo mwîtîkîrîtie mamarûmagîrîre.

⁹ “Kwoguo nie Ngai-Mûnene nauga atî, gûtirî mûndû wa ndûrîrî ûrîa ûtaruaga ûgaatonya hekarûrî yakwa, wana ethîrwa arî mûgeni ûrîa ûtûûraga gatagatî ka andû a Isiraeli.”

Alawi nîmaagirirue gûtuîka athînjîri-Ngai

¹⁰ Ngai-Mûnene nîwambîrire atîrî, “Nîngaaverithia Alawi arîa maandiganîrie makînyitanîra na andû acio engî a Isiraeli na makîambîrîria kûgooca mîvuanano.

¹¹ Magaatungataga hekarûrî yakwa marî arangîri a ivingo, na marutage mawîra mengî ma hekarû. Makaathînjaga nyamû irîa irutîtwe cia magongoona ma kûvîvua na cia magongoona mengî na matungatage andû.

¹² Nie Mwathani Ngai-Mûnene nînîvîtîte nîûndû wao ngiuga nîngaamaverithia nîûndû mevia mao nîmaavîtithirie andû a Isiraeli magîtûma magooce mîvuanano.

¹³ Matigaûke vakuvî nanie gûtungata ta athînjîri-Ngai, kana mathiî vakuvî na indo ciakwa irîa nyamûre kana matonya vandû varîa vatheru Mûno. Nwatî nîmagaaconoka nîûndû wa maûndû marîa marî magigi mekîte.

¹⁴ Kûnarî ûguo nîngamathuura mavaragîrie hekarû na marutage mawîra marîa marutagwa kuo.”

Athînjîri-Ngai

¹⁵ Ngai-Mûnene nîwaugire atîrî, “Athînjîri-Ngai a mûvîrîga wa Lawi, a njiarwa cia Zadoku nîo maamenyagîrîra hekarû yakwa rîrîa andû acio engî a Isiraeli maandiganîrîtie. Acio nîo makaandungatagîra na maûkage mbere yakwa kûndutîra maguta na nthakame.

¹⁶ Magaatonyaga hekarûrî na matungatage metharî ya kîgongoona na matongoragie kûgooca hekarûrî.

¹⁷ Rîrîa matonya kîvingorî gîa kîvaro Kîam ndarî, magekagîra nguo irîa mbaro. Matiagîrîrwe nî gwîkîra nguo cia guoya magîtungata marî kîvarorî Kîam ndarî kana marî hekarûrî.

¹⁸ Makeyovaga iremba cia nguo mbaro ciongorî ciao na mekagîre mîvuto ya nguo mbaro, nwatî matikeyova mîcivi nîguo matikathithine.

¹⁹ Na rîrîa makûthiî kîvarorî Kîam nja kûrîa andû marî, makaarutaga nguo irîa makethagîrwa mekîrîte magîtungata hekarûrî na maitige nyombarî irîa ntheru. Magekagîra nguo ciîngî nîguo andû maivutia matigatuîke amûre.

²⁰ “Athînjîri-Ngai matikenjwe njuîrî cia ciongo ciao kana marera njuîrî iracava mûno. Makaigaga njuîrî yao îrî nenge waro.

²¹ Athînjîri-Ngai matikanyue ndivei magîtonya kîvarorî Kîam ndarî.

²² Gûtirî mûthînjîri-Ngai ûkaavikia mûndûmûka matiganîte na mûrûme, nwa avikirie mwîrîtu nthingi Mûisiraeli kana mûndûmûka wa ndigwa wa mûthînjîri-Ngai wîngî akuîte.

²³ “Athînjîri-Ngai makathomithagia andû ngûrani ya indo irîa ntheru na irîa itarî ntheru, na gûkûrana indo irîa irî mûgiro na irîa itarî mûgiro.

²⁴ Kûngîgîa na ngucanio magatuithanagia ciira kûringana na watho wakwa ûrîa ûgîte. Makaarûmagîrîra mawatho ma mîthenya îrîa mîamûre kûringana na mawatho na irîra ciakwa, na mamenyagîrîre thavatû ciakwa ciîthagîrwe irî ntheru.

²⁵ Mûthînjîri-Ngai ndagîrîrwe nî kwîgwatia gîko na njîra ya kûvutia kimba. Nwatî nwa agwatwe nî gîko nîûndû wa kûvutia kimba Kîam îthe, ng'ina, mûvîcî kana mwarî, Kîam mûrwang'ina kana Kîam mwarwang'ina ûtarî mûviku.

²⁶ Agwatwa nî gîko, agekaraga mîthenya mûgwanja, na yathira nîakaathera.

²⁷ Mûthenya ûrîa akaathiî vandûrî varîa vatheru kîvarorî Kîam ndarî gûtungata, nîakaaruta îgongoona rîa kûthiria mevia make nîguo acoke gûtungata rîngî. Nînie Ngai-Mûnene nauga ûguo.

²⁸ “Athînjîri-Ngai matiagîrîrwe nî kûgaîrwa mîgûnda, nînie îgai rîao. Matikagaîrwa vûrûrirî wonthe wa Isiraeli.

²⁹ Matega ma irio cia mîgûnda, matega ma kûthiria mevia na matega ma kûrîva mevia makarîcagwa nî athînjîri-Ngai. Indo cionthe vûrûrirî wa Isiraeli irîa ciamûrîrîtwe Ngai igatuîkaga ciao.

³⁰ Maketha ma mbere marîa maro mûno na indo irîa mbaro mûno cia matega menyu irîa mûndutagîra ikaavecagwa athînjîri-Ngai. Vîndî cionthe rîrîa mwakanda mûgate, mûgate wa mbere ûkaavecagwa athînjîri-Ngai rîrî îtega nanie ngarathimaga mîciî yenyu.

³¹ Athînjîri-Ngai matiagîrîrwe nî kûrîa nyama cia gîconi kana cia nyamû wa yonthe îkuîte yo mene kana yûragîtwe nî nyamû îngî.”