Ezek 39 - ÎVUKU RÎA ÛVORO MWARO

Gogu nîwavootirwe

¹ Mwathani Ngai-Mûnene nîwambîrire atîrî, “We mûndû, rathîra Gogu mûtongoria mûnene wa vûrûri wa Mesheki na wa Tubali, na ûmwîre atî, nie Ngai-Mûnene nîndeganîte nake.

² Nîngaakûgarûra ngûrute na kûu kûraca mwena wa rûgûrû ngûtongorie ûkatharîkîre irîma cia Isiraeli.

³ Nîngaacoka munange ûta waku ûrî njararî yaku ya ûmotho, na ndûme mîguî îgwe nthî kuuma njararî yaku ya ûrîo.

⁴ We, athigari aku a mbaara, na andû a mavûrûri marîa manyitanagîra nawe nîngaamanenganîra matuîke irio cia kûrîwa nî iconi cia mîthemba yonthe na nyamû cia kîthaka.

⁵ Mûkaaûragîrwa Mûtitûrî. Ûguo nîguo nie Mwathani Ngai-Mûnene mbugîte.

⁶ Nîngaatûma vûrûri wa Magogu kûgîe mwaki na ûgîe kûrî andû arîa matûûraga na thayû rûtererî rwa îria. Nao nîmakaamenya atî, nînie Ngai-Mûnene.

⁷ Nîngamenyithia andû akwa a Isiraeli rîîtwa rîakwa rîtheru na ndigetîkîra rîîtwa rîu rîakwa rîtheru rîcambua rîngî. Nacio ndûrîrî nîikaamenya atî, nie nînie Ngai-Mûnene, ûrîa Mûtheru wa Isiraeli.”

⁸ Mwathani Ngai-Mûnene augîte atîrî, “Mûthenya ûrîa naaririe ûvoro waguo, nama nîûgûkinya.

⁹ Andû arîa matûûraga matûûrarî ma Isiraeli nîmakaaumagara makaûnganie indo cia mbaara na maivîvie. Nîmagaakia mwaki na ngo, ûta na mîguî, matumû na njokoma îvinda rîa mîaka mûgwanja.

¹⁰ Matikaathiî kuna ngû mîgûndarî kana mathiî magaiteme mûtitûrî, nîûndû makaavûthagîra indo cia mbaara ta ngû. Nîmagaatava indo cia andû arîa maamatavîte, na makuue indo cia andû arîa maamacunîte indo ciao. Ûguo nîguo nie Mwathani Ngai-Mûnene mbugîte.”

Gogu nîwathikirwe

¹¹ Ngai-Mûnene augîte atîrî, “Vîndî îrîa maûndû mau mageekîka, nîngaava Gogu vandû va kûthikwa Kîamndarî vûrûrirî wa Isiraeli. Kîanda kîu gîtagwa Kîamnda Kîam athiîi kîrîa kîrî mwena wa îrathîro wa îria rîa cumbî. Gogu vamwe na athigari ake onthe makaathikwa kûu. Athiîi nîmakaarigîrîrua kûvîtûkîra kuo na Kîamnda kîu nîgîgaacoka gwîtagwa, ‘Kîanda Kîam Hamoni-gogu.’

¹² Andû a Isiraeli makaavûthîra îvinda rîa mîeri mûgwanja kûthika ciimba cia andû arîa akuû nîguo matherie vûrûri wao.

¹³ Andû onthe vûrûrirî nîmagaatethereria kûthika andû arîa akuû, na ûndû ûcio nîûkaamaretera ngumo mbaro vîndî îrîa ngoonania riiri wakwa. Ûguo nîguo nie Mwathani Ngai-Mûnene mbugîte.

¹⁴ Vuva wa mîeri mûgwanja, nîmakaathuura andû mathiîcage kûu vûrûrirî magîcaragia andû arîa matarî athike nîguo mamathike matherie vûrûri wao.

¹⁵ Vîndî îrîa makethîrwa magîcangacanga kûu vûrûrirî mangîona îvîndî rîa mûndû, nîmageekîra rûûri nîguo andû arîa marathikana maûke kûthika îvîndî rîu Kîamndarî Kîam Hamoni-gogu.

¹⁶ (Vandû vau nîvakaagîa na îtûûra narîo rîgetagwa Hamona.) Ûguo nîguo makaatheria vûrûri.”

¹⁷ Ngai-Mûnene nîwambîrire atîrî, “We mûndû, îra iconi cia mîthemba yonthe na nyamû cionthe cia kîthakarî igomane vamwe kuuma mîena yonthe ciûke kîgongoonarî kîrîa nîithondekerete. Gîkethîrwa kîrî kîrugo kînene mûno irîmarî cia Isiraeli, na nîkuo ikaarîa nyama na inyue nthakame.

¹⁸ Nîikaarîa nyama cia athigari njamba na inyue nthakame ya anene a nthî arîa makaaûragwa ta ndûrûme, tûgondu, mbûri kana ndegwa irîa noru cia Bashani.

¹⁹ Kîrugo kîu Kîam îgongoona ngûithondekera ikaarîa maguta ivae na inyue nthakame ituîke mîrîu ta inyuîte njovi.

²⁰ Nîigeekara nthî metharî yakwa irîe na ivae nyama cia mbarathi na cia andû arîa mathiîcaga matûîte mbarathi, na cia athigari na andû njamba a mbaara. Nînie Mwathani Ngai-Mûnene mbugîte ûguo.”

Andû a Isiraeli nîmaacokirue vûrûrirî wao

²¹ Ngai-Mûnene nîwambîrire atîrî, “Nîngoonia ndûrîrî riiri wakwa, na nîikoona ûrîa ndûmagîra vinya wakwa ngîtucanîra cira na kîvooto.

²² Nyomba ya Isiraeli nîkaamenya kuuma mûthenya ûcio atî nînie Ngai-Mûnene Ngai wao.

²³ Nacio ndûrîrî nîikaamenya atî andû a Isiraeli maathiîre îthamîriorî nîûndû wa mavîtia marîa maambîkire. Nînaamatiganîrie na nîûndû nîmaamenire, ngîmarekereria kûrî nthû ciao na ikîmaûraga.

²⁴ Naamekire kûringana na maûndû mao marîa marî mûgiro na mevia mao na ngîmatiganîria.”

²⁵ Kwoguo Mwathani Ngai-Mûnene augîte atîrî, “Rîu nîngwîguîra andû a Jakovu ntha, na nîo andû a Isiraeli na ndûme mathatûkwe rîngî. Nîngaatûma rîîtwa rîakwa rîtheru rîvecagwe gîtîîo.

²⁶ Rîrîa magaatûûra vûrûrirî wao matagwîtigîra na marî na thayû, nîmakaariganîrwa nî ûrîa maaconorithîtue nîûndû wa kûndiganîria.

²⁷ Nîngaaruta andû akwa kuuma mavûrûrirî ma nthû ciao nîguo monie ndûrîrî nyîngî atî, nie nîrî mûtheru.

²⁸ Nao nîmakaamenya atî nînie Ngai-Mûnene Ngai wao, nîûndû nînatûmire mavirwe îthamîriorî. Rîu nîmacoketie vûrûrirî wao na gûtirî mûndû wanarî ûmwe wao ûtigîtwe na vuva.

²⁹ Nîngetîrîria andû a Isiraeli roho wakwa, na ndikaamatiganîria rîngî. Nînie Mwathani Ngai-Mûnene mbugîte ûguo.”