Ezek 38 - ÎVUKU RÎA ÛVORO MWARO

Mûthamaki Gogu nîwatûmîrwe nî Ngai

¹ Ngai-Mûnene nîwambîrire atîrî,

² “We mûndû, vûgûka ûrorie Gogu mûthamaki wa vûrûri wa Magogu, na nîke mûtongoria mûnene wa vûrûri wa Mesheki na vûrûri wa Tubali. Ratha maûndû mamwîgiî,

³ na ûmwîre atî: nie Mwathani Ngai-Mûnene nîndeganîte nawe, we Gogu mûtongoria mûnene wa Mesheki na Tubali.

⁴ Nîngaamûnyita nîmûthiûrûrukie, na nîmwîkîre ndûano nthîarî ciake. Nîngaamûrutûrûra na nja, ke vamwe na athigari ake onthe a mbaara, mbarathi na athigari arîa mathiîcaga matûîte mbarathi, gîkundi kînene Kîam andû mekîrîte nguo cia mbaara; onthe marî na ngo na mviû cia mbaara.

⁵ Maratethererua nî athigari a mbaara a kuuma Perisia, Ethiopia na Lîbia marî vamwe na athigari a Gogu. Onthe marî na ngo na ngovia cia cuuma cia kûgitîra ciongo.

⁶ Athigari a mbaara a kuuma Gomeri, Bethi-togarima, kuuma mwena wa rûgûrû kûraca viû, na athigari a mbaara kuuma mavûrûrirî mengî marî vamwe nawe.

⁷ Îîvarîrie we mwene na athigari arîa ûrî nao na ûmathe.

⁸ Vuva wa mîaka mîîngî nîûgetwa ûthiî ûkatharîkîre vûrûri kûrîa andû maaretirwe vamwe kuuma mavûrûrirî mengî na matûûraga matarî na guoya wa mbaara. Nîûkaatharîkîra irîma cia Isiraeli irîa mbererî ciarî werû na maganjo vandû va kavinda karaca, nwatî rîu andû onthe matûûraga marî agitîre.

⁹ We, vamwe na athigari aku a mbaara, na andû a mavûrûri marîa ûkeethîrwa mûnyitanîrîte nao nîmûkaathiî na îvenya ta rûvuvo mûtharîkîre vûrûri ûcio na nîmûgaaûkunîkîra ta îtu.”

¹⁰ Mwathani Ngai-Mûnene arera Gogu atîrî, “Rîrîa kavinda kau gagaakinya, nîûkaambîrîria gwîciiria maûndû macûku na kûvanga mîvango mîcûku ngororî yaku,

¹¹ ûkiugaga atî, ‘Nîngûtharîkîra vûrûri ûrîa ûrî na icagi itarî ngitîre na rûthingo kûrîa andû matûûraga marî na thayû. Andû a kûu matûûraga icagirî itarî mbirigîre na itarî na mîrango ya kûvinga.’

¹² Nîûgaatava na ûkuue indo cia andû arîa marî matûûrarî marîa maarî momokangu. Andû acio maagomanire vamwe kuuma mavûrûrirî mengî na rîu nîmagîte na nyamû cia kûrîthua wana indo na matûûraga gatagatî ka nthî.

¹³ Sheba, Dedani, agûri na endia a indo kuuma Tarishishi na icagi irîa irî vakuvî na kuo nîmagaakûria atîrî, ‘Ûnganîtie athigari aku a mbaara nîguo mûtharîkîre na mûtave na mûcunane indo? Ûrenda gûkuua sîlûva, thaavu, ndîthia nîguo ûtave indo nyîngî?’

¹⁴ “Kwoguo, we mûndû rathîra Gogu ûvoro na ûmwîre Mwathani Ngai-Mûnene augîte: Rîrîa andû akwa a Isiraeli makethîrwa mekarîte marî na thayû nîrîo ûkaathiî

¹⁵ kuuma kûrîa ûtûûraga mwena wa rûgûrû kûndû kûraca ûtongoreretie gîkundi kînene Kîam athigari a mbaara, onthe matwîte mbarathi.

¹⁶ Nîûkaatharîkîra andû akwa a Isiraeli ta ûrîa îtu rîkunîkagîra vûrûri. Vîndî îo nîngaakûrete ûtharîkîre vûrûri wakwa nîguo mavûrûri mamenye atî nîngûvûthîrîte we Gogu nîguo monanie ûtheru wakwa mbere yao.

¹⁷ Kinthî tîwe, nie Mwathani Ngai-Mûnene naririe ûvoro waku tene na njîra ya arathi a Isiraeli ndungata ciakwa, ngiuga atî vîndî îmwe nîngaagûtûma akatharîkîre Isiraeli?”

Ngai nîwaverithirie Gogu

¹⁸ Mwathani Ngai-Mûnene arauga atîrî, “Mûthenya ûrîa Gogu akaatharîkîra vûrûri wa Isiraeli, nie nîngaarakara.

¹⁹ Nîrî na wîru na marakara meengî nîmanîrîra atî mûthenya ûcio nîgûkaagîa na kîthingithia kînene vûrûrirî wa Isiraeli.

²⁰ Nthamaki irî îriarî, iconi irîa igûrûkaga na nyamû cia kîthakarî, ciûmbe irîa ikurumaga na andû onthe a nthî, nîmakaainaina mamona. Irîma nîikomomorwa, nguva nîikomomoka na nthingo cionthe igwe nthî.

²¹ Nîngaatûma Gogu agîe na maûndû ma kûmûmakia ma mîthemba yonthe. Andû aku nîmagaaûkanîrîra wa mûndû arûe na mûndû ûrîa wîngî. Nînie Mwathani Ngai-Mûnene mbugîte ûguo.

²² Nîngaamûverithia na mîrimû mîcûku na ndûme andû maûragane. Nîngaaurithîria Gogu, athigari ake a mbaara na arîa onthe arî nao mbura nene ya mbembe na mwaki wa ûviriti.

²³ Kwoguo, mavûrûri meengî nîmakaamenya atî, nie nînie Ngai-Mûnene na nîngoonania ûnene na ûtheru wakwa kûrî ndûrîrî nyîngî.”