Ezek 36 - ÎVUKU RÎA ÛVORO MWARO

Irathimo cia Ngai kûrî andû a Isiraeli

¹ Ngai-Mûnene nîwambîrire atîrî, “We mûndû, rathîra irîma cia Isiraeli na ûciîre ithikîrîrie ndûmîrîri Ngai-Mûnene.

² Nie Mwathani Ngai-Mûnene nîrauga: Nthû cienyu ciaugaga atî, ‘Irîma irîa ndaca mûno ituîkîte cietû!’

³ “Kwoguo vecana ûrathi muge Mwathani Ngai-Mûnene augîte atî, Nthû nîciatûmire mue irîma mûtuîke werû na nîmaamûcûkangirie mîena yonthe na mûgîtuîka îgai rîa mavûrûri mengî. Kwoguo mwatuîkire kîndû gîa kûthekagîrîrwa na gûcambua nî andû.

⁴ Kwoguo, Mue irîma cia Isiraeli, thikîrîriani ûrîa Ngai-Mûnene akûmwîra mue irîma namue tûrîma, mue nyûnjî na cianda; wana kûndû kûrîa gûtigîtwe kûrî werû na matûûra marîa mathame, nîmûtavîtwe na mûgatuîka kîndû gîa kûthekererwa nî mavûrûri marîa mengî mamûthiûrûrûkîrîtie.

⁵ “Kwoguo nie Mwathani Ngai-Mûnene, nîûndû nîrî mûrakaru, nîngûverithia andû onthe a mavûrûri marîa mamûthiûrûrûkîrîtie na Edomu kuonthe. Andû acio nîmaanyitire vûrûri wakwa na nîmoonanirie kînyarari ngororî ciao na makîûgaana ûtuîke wao.

⁶ “Kwoguo we mûndû, vecana ûrathi wîgiî vûrûri wa Isiraeli. Îra irîma na tûrîma na wîre tûrûnjî na cianda ûrîa nie Mwathani Ngai-Mûnene ngûmera. Nîrî na marakara marî na wîru nîûndû wa ûrîa maconorithîtue nî mavûrûri mengî.

⁷ Nie Mwathani Ngai-Mûnene nevîta na neranîra atî, mavûrûri mau mamathiûrûrûkîrîtie nwanginya wana mo magaaconorithua.

⁸ Nwatî mue irîma cia Isiraeli, mîtî yenyu nîîkagîa na mvûa na îciare matunda nîûndû wa andû akwa a Isiraeli nîûndû kavinda gatarî karaca nîmagaacoka kwao.

⁹ Nîrî mwena wenyu, na nwanginya mone atî vûrûri wenyu nîwarîmwa rîngî na wavandwa mbeû.

¹⁰ Nîngaatûma andû onthe a Isiraeli mongerereke. Matûûra marîa mathamîtwe nîmagatûûrwa rîngî na kûrîa gûtigîtwe kûrî maganjo nîgûgaatumwa rîngî.

¹¹ Nîngaatûma andû mengîve wana nyamû irîa mûrîthagia ciîngîve. Nîikoongerereka na iciarane mûno na ndûme irîma itûûrwe ta ûrîa ciatûûragwa mbererî. Nîngaamwîka maûndû maro gûkîra marîa monthe naamwîkîte mbere na nîmûkaamenya atî, nie nînie Ngai-Mûnene.

¹² Nîngaatûma andû akwa a Isiraeli maûke na matûûre vûrûri ûyû na mawîgwatîre ûtuîke wao na ndûgaatûma ciana ciao ikua rîngî.

¹³ “Andû maugaga atî nîmûragaga andû enyu na mûgatûma vûrûri wenyu ûcakaye nîûndû wa ciana kûthira,

¹⁴ kwoguo nie Mwathani Ngai-Mûnene mbugîte atî mûtigaacoka kûûraga andû, kana vûrûri wenyu ûcakaye nîûndû wa ciana kûthira. Nie Ngai-Mûnene nînie mbugîte ûguo.

¹⁵ Na ndikenda mwîgua irumi kuuma mavûrûri mau rîngî kana mamûnyûrûria kana matûme vûrûri wenyu ûvîngwe rîngî. Ûguo nîguo nie Mwathani Ngai-Mûnene mbugîte.”

Ûtûûro mûcerû wa andû a Isiraeli

¹⁶ Ngai-Mûnene nîwambîrire atîrî,

¹⁷ “We mûndû, vîndî îrîa andû a Isiraeli maatûûraga vûrûrirî wao, nîmaaûgwatirie mûgiro nîûndû wa mîthiîre yao na mîtugo yao. Mîtugo yao marî mbere yakwa yekariî ta gîko Kîam mûndû mûka vîndî îrîa arî kavindarî gake ka mweri.

¹⁸ Kwoguo nînametûrûrîre marakara makwa nîûndû wa nthakame îrîa meetûrûrire vûrûrirî wao na nîûndû wa mûgiro ûrîa maagwatirie vûrûri na njîra ya kûgooca mîvuanano.

¹⁹ Nînaamatuîrîre kûringana na mîtugo na mîthiîre yao na ngîmanyagania makîthiî mavûrûrirî mageni.

²⁰ Nwatî mathiî kûrî andû a ndûrîrî, wa kûrîa kuonthe maathiîcaga nîmaagwatagia rîîtwa rîakwa rîtheru gîko. Nao andû nîmaaragia ûvoro ûmegiî na makauga atî, ‘Aya nî andû a Ngai-Mûnene, nwatî kûnarî ûguo nîmaaumire vûrûrirî wake.’

²¹ Nwatî nînerûmbûirie nîûndû wa rîîtwa rîakwa rîtheru rîrîa andû a Isiraeli maatûmire rîgîa gîconoko kûrîa kuonthe maathiîcaga kûrî andû a ndûrîrî.

²² “Kwoguo îra nyomba ya Isiraeli Mwathani Ngai-Mûnene augîte atî, ûndû ûrîa nduîte gwîka tînîwîka nîguo mûgunîke nwatî nîwîka nîûndû wa kûva rîîtwa rîakwa rîtheru gîtîîo. Rîîtwa rîu nîmwatûmire rîcambue nî andû a ndûrîrî kûrîa kuonthe mwathiîcaga.

²³ Rîîtwa rîakwa rîtheru rîrîa mwacambithirie gatagatîrî ka andû a ndûrîrî nîngaarîcokeria ûtheru warîo. Nacio ndûrîrî nîikaamenya atî, nie nînie Ngai-Mûnene. Nie Mwathani Ngai-Mûnene nînie mbugîte ûguo. Nîngaamûvûthîra monanie ûtheru wakwa mbere yao.

²⁴ Nîngaamûruta gatagatî ka andû a ndûrîrî na nîmûrute mavûrûrirî monthe nîmûcokie vûrûrirî wenyu.

²⁵ Nîngaacoka nîmûminjaminjîrie manjî matheru, na nîmûkathera. Nîngaamûtheria kuuma kûrî maûndû monthe macûku na kuuma kûrî mîvuanano yonthe.

²⁶ Nîngaamûva ngoro njerû na mbîkîre mwoyo mûcerû ndarî yenyu. Nîngaaruta ndarî yenyu ngoro îrîa nyûmû ta îthiga na njoke mbîkîre ngoro mbathîki.

²⁷ Nîngaamwîkîra roho wakwa ndarî yenyu na nîngaatûma mûrûmagîrîre mawatho makwa na mûmenyagîrîre waro matuîro makwa ma cira.

²⁸ Nîmûgaacoka mûtûûre vûrûrirî ûrîa naveere methe menyu. Nîmûgaatuîka andû akwa nanie nîngaatuîka Ngai wenyu.

²⁹ Nîngaamûvonokia kuuma kûrî maûndû monthe marîa matarî matheru. Nîngatha ngano iciarage mûno nîguo mûtikagîcage na yûra.

³⁰ Nîngaatûma matunda ma mîtî ya mîgûnda yenyu mongerereke wana maciaro ma mîgûnda yenyu nîguo mûtikagîe na yûra rîa gûtûma mûconorithue mûrî gatagatî ka ndûrîrî.

³¹ Nîûgaacoka kûririkana mîthiîre yaku mîcûku na mîtugo yaku îrîa îtaarî mîaro, na nîûkaaîmena nîûndû wa mevia maku na maûndû macûku marîa wekire.

³² We nyomba ya Isiraeli nîrenda ûmenye atî ndireka maûndû mama îthenya rîaku, nwatî nîreka ûguo nîguo ûgîe na gîconoko na gîcambî nîûndû wa mîthiîre yaku. Ûguo nîguo Mwathani Ngai-Mûnene augîte.”

³³ Mwathani Ngai-Mûnene arauga atîrî, “Rîrîa ngaamûtheria mûthirwe nî mevia menyu monthe, nîngaatûma mûtûûre matûûrarî rîngî, na ndûme mûtume rîngî kûrîa kwomomoku.

³⁴ Vûrûrirî kûrîa kwarî kûthame na kwonagwa kûrî na kîthaka nî andû arîa maavîtûkagîra kuo nîngaatûma mûkûrîme rîngî.

³⁵ Andû nîmakaauga atî vûrûri ûrîa watiganîrîtue rîu ûtuîkîte ta mûgûnda wa Edeni. Namo matûûra marîa maarî momoku, na magatuîka maganjo rîu nîmatûûrîtwe rîngî na makagitîrwa na nthingo.

³⁶ Namo mavûrûri marîa magaatigara mamûthiûrûrûkîrîtie, nîmakaamenya atî nie Ngai-Mûnene, nîndumîte rîngî kûrîa kwarî kwomomoku na kûrîa gwatuîkîte werû ngatûma gûkûre mîtî rîngî. Nie Mwathani nînie mbugîte ûguo, na nîngaawîka.”

³⁷ Mwathani Ngai-Mûnene arauga atîrî, “Nîngetîkîria andû a Isiraeli mamvoe nîmatethie na nîngaatûma andû ao mongerereke ta ndîthia ya ng'ondu.

³⁸ Matûûra marîa momoku nîmakethîrwa na andû eengî ta ûrîa vîndî îmwe îtûûra rîa Jerusalemu rîarî na ng'ondu nyîngî irîa ciarutîtwe cia magongoona kavinda karîa kaarî kagîrîru. Nao nîmagaacoka kûmenya atî, nie nînie Ngai-Mûnene.”