Ezek 34 - ÎVUKU RÎA ÛVORO MWARO

Arîthi a Isiraeli

¹ Ngai-Mûnene nîwambîrire atîrî,

² “Mûndû, rathîra arîthi a Isiraeli na ûmere ûrîa nie Ngai-Mûnene Ngai mbugîte. Meere atî marî na thîna nîûndû merîthagia o ene. Anga arîthi matiagîrîrwe nî kûrîthia ng'ondu?

³ Mûnyunyaga îria na mûkeguîka nguo cia guoya wacio na mûthînjaga irîa noru, nwatî mûtiirîthagia.

⁴ Mûtimenyagîrîra irîa itarî na vinya kana mûvonia irîa ndwaru. Mûtiovaga irîa ikûthua kana mûcokanîrîrie vamwe irîa inyaganîtie kana mûcaria irîa ciûrîte. Mûvûthagîra vinya gûciatha.

⁵ Kwoguo ng'ondu nîcianyaganirie nîûndû itiarî na mûrîthi. Nacio nyamû cia kîthaka nîciaûragire ng'ondu icio na ikîirîa.

⁶ Ng'ondu ciakwa nîcianyaganirie, ciaûrûraga kûndû kuonthe irîmarî na tûrîmarî. Cianyaganîrie nthî yonthe na gûtirî mûndû werûmbûyanirie na ûvoro wacio kana aicarie.

⁷ “Kwoguo mue arîthi, thikîrîriani ûrîa nie Ngai-Mûnene ngûmwîra.

⁸ Wata ûrîa nie Ngai-Mûnene ndûûraga mwoyo nîramwîra atî nîmwatiganîrie ng'ondu ciakwa na ituîkîte cia kûrîwa nî nyamû cia kîthaka nîûndû itirî na mûrîthi. Arîthi akwa maticaragia ng'ondu irîa ciûrîte, nwatî nîkwa mairîcaga vandû va kûirîthia.

⁹ Kwoguo thikîrîriani mue arîthi mwîgue ûrîa ngûmwîra.

¹⁰ Nie Ngai-Mûnene Ngai nîndeganîte namue. Nîngaamûcuna ng'ondu irîa mûrî nacio na ndigetîkîra mûtuîke arîthi a cio. Mue ene mûtigaacoka kwîguna nacio rîngî. Nîngaaivonokia kuuma kûrî mue nîguo itigatuîke nyama cienyu.

Mûrîthi ûrîa Mwaro

¹¹ “Nie Ngai-Mûnene Ngai nîrauga atî, nie mwene nîngaacaria ng'ondu ciakwa na nîimenyerere.

¹² Wata ûrîa mûrîthi acaragia ng'ondu irîa inyaganîtie, nîguo nie ngaacaria ng'ondu ciakwa na nîivonokie kuuma kûrîa kuonthe inyaganîrîtie mûthenya ûrîa gûkethîrwa kûrî na matu na nduma nene.

¹³ Nîngaairuta kuuma kûrî andû a mavûrûri mageni, na nîicokie vûrûrirî wacio. Nîngaairîthia irîmarî cia vûrûri wa Isiraeli, tûrûnjîrî twakuo na kûndû kûrîa kuonthe andû matwîre vûrûrirî.

¹⁴ Nîngaairîthia kûndû kûrî na nyaki mbaro îgûrû rîa irîma cia Isiraeli. Nîikaamama kûndû kûrî na nyaki mbaro ya kûrîwa, na nîikaagîa na kûndû kwaro gwa kûrîa kûu irîmarî cia Isiraeli.

¹⁵ Nie mwene nînie ngaatuîka mûrîthi wa ng'ondu ciakwa, na nîngaatûma ivurûke. Nie Ngai-Mûnene Ngai nînie mbugîte ûguo.

¹⁶ “Ng'ondu irîa ciûrîte nîngaaicaria, na irîa inyaganîtie nîngaaicokanîrîria vamwe. Irîa ikûthua nîngaaciova na mbîkîre vinya irîa itarî na vinya. Nwatî irîa noru na irî na vinya nîngaaicûkangia nîûndû nie ndîthagia na kîvooto.

¹⁷ “Namue ndîthia yakwa, nie Ngai-Mûnene nînie ngaatua ciira gatagatî ka ng'ondu na ng'ondu na ndue ciira gatagatî ka ndûrûme na Nthenge.

¹⁸ Amwe enyu marîcaga nyaki îrîa mbaro na magakinyanga îrîa matakwenda. Manyunyaga manjî marîa maro na marîa matigara makaunjuga na magûrû!

¹⁹ Nwanginya ng'ondu ciakwa irîe nyaki îrîa mûkinyangîte na inyue manjî marîa munjugîte na magûrû menyu?

²⁰ “Kwoguo, nie Ngai-Mûnene Ngai nîramwîra atî nîngaatwithania ciira gatagatî ka ng'ondu irîa noru na ng'ondu irîa ng'înju.

²¹ Mwatindîkire ng'ondu irîa itarî na vinya na ituro cienyu na mûkîimunda na mvîa nginya mûkîinyagania kûraca na ndîthia.

²² Nîngaavonokia ng'ondu ciakwa na itigacoka kûnyamarua rîngî. Nîngaatwithania cira gatagatî ka ng'ondu na ng'ondu îrîa îngî.

²³ Nîngaaithuurîra mûrîthi ûmwe, na nîke Daudi ndungata yakwa na nîagaatuîka mûrîthi wacio. Nîakaairîthia waro na aimenyagîrîre.

²⁴ Nanie Ngai-Mûnene nîngaatuîka Ngai wacio, na ndungata yakwa Daudi nîagaatuîka mûnene wacio. Nie Ngai-Mûnene nînie mbugîte ûguo.

²⁵ Nîngaarûtha kîrîkanîro Kîam thayû nacio. Nîngaaruta nyamû cia kîthaka kuuma vûrûrirî nîguo ng'ondu ciakwa itûûre irî ngitîre kûu werûrî na imamage mûtitûrî.

²⁶ “Nîngaairathima na nîigaatûûra mîenarî ya kîrîma gîakwa Kîammûre. Nîngaaciurithagîria mbura vîndî îrîa yagîrîrîte na nîgaatuîka mbura ya kîrathimo.

²⁷ Mîtî îrîa îrî mîgûndarî nîgaaciara matunda, mîgûnda nîkaagîa na maketha meengî na nîigaatûûra na thayû vûrûrirî wacio. Rîrîa ngaatucanga mînyororo ya andû arîa maaituire ngombo, na nîivonokie kuuma kûrî o, nîikaamenya atî nie nînie Ngai-Mûnene.

²⁸ Itigaatavwa nî ndûrîrî ciîngî, kana ciûragwa kana irîwa nî nyamû cia kîthaka. Igaatûûra irî ngitîre na itakûmakua nî kîndû.

²⁹ Nîngaaiva mîgûnda mîaro îgûkûra irio nîguo itigaacoke kûgîa na yûra vûrûrirî ûcio, na itigaacoka kûthekererwa nî ndûrîrî rîngî.

³⁰ Nao andû nîmakaaamenya atî, nie Ngai-Mûnene Ngai wao, nîrî vamwe nao na mamenye atî andû a Isiraeli nî andû akwa. Nie Ngai-Mûnene Ngai nînie mbugîte ûguo.

³¹ “Mue nîmue ng'ondu ciakwa, ng'ondu cia ndîthia yakwa, nanie nînie Ngai wenyu. Ûguo nîguo nie Ngai-Mûnene Ngai mbugîte.”