Ezek 32 - ÎVUKU RÎA ÛVORO MWARO

Mûthamaki wa Misiri aringithanîtue na njûnamatu

¹ Mûthenya wa mbere wa mweri wa îkûmi na îîrî, mwaka wa îkûmi na îîrî kuuma twavirwa îthamîriorî, Ngai-Mûnene nîwambîrire atîrî,

² “Mûndû, ina rwîmbo rwa macakaya nîûndû wa mûthamaki wa Misiri na ûmwîre: We mûthamaki wa Misiri wîtucaga ta mûnyambû gatagatî ka ndûrîrî, nwatî we wîkariî ta njûnamatu îrî manjîrî. Umagîra manjîrî na vinya na ûkaunjuga manjî na magûrû maku na ûgacûkia nyûnjî.

³ Nie Ngai-Mûnene Ngai mbugîte atî nîngaagwikîria neti andû eengî magomanîte na nîmagaakûruta manjîrî.

⁴ Nîngaagwikia nthî nyûmû mûgûndarî kûndû gûtarî na kîndû, na nîngaatûma iconi cia rîerarî na nyamû cionthe cia kîthaka cia nthî yonthe ikûrîe.

⁵ Nyama cia mwîrî waku ngaainyagania irîmarî, na mbîcûrie cianda na mavîndî maku.

⁶ Nîngaatûma nthî îcûre nthakame yaku nginya irîmarî, na nyûnjî ciîcûre nthakame yaku.

⁷ Vîndî îrîa ngaakûthiria, nîngaakunîkîra matu na ndûme njata cia îgûrû ituîke nduma. Nîngaakunîkîra riûa na matu naguo mweri nîûgaatiga kûruta ûtheri waguo.

⁸ Indo cionthe irîa irutaga ûtheri kûu îgûrû nîigaatuîka nduma, na nthî yonthe îcûrwe nî nduma. Nie Ngai-Mûnene Ngai nînie mbugîte ûguo.

⁹ “Ngoro cia andû eengî nîikaathînîka rîrîa ngakûvira îthamîriorî mavûrûrirî mageni.

¹⁰ Andû eengî nîmakaamaka nîwe megua ûvoro ûcio, na athamaki ao mainaine nîûndû waku. Vîndî îrîa ngaatambûrûkia rûviû rwakwa, wa mûndû nîakeguîra ûtûûro wake guoya na agekara agîtetemaga.”

¹¹ Ngai-Mûnene Ngai erîte mûthamaki wa Misiri atîrî, “Mûthamaki wa Babuloni nîakaarûa nawe.

¹² Nîngaaûragithia andû aku na mviû cia njûra cia athigari njamba, andû aganu gûkîra ndûrîrî cionthe. Nîmakaathiria mwîtîîo wa andû a Misiri na maûrage andû akuo onthe.

¹³ Nîngaathiria nyamû ciaku cionthe irîa irî vakuvî na nyûnjî cia Misiri. Manjî ma kuo matigaacoka kunjugwa nî magûrû ma mûndû kana maunjugwa nî mavûngû ma nyamû irîa mûrîthagia rîngî.

¹⁴ Nîngaacoka ndûme manjî matuîke matheru na manyûrûrûkage nyûnjîrî ciakuo ta maguta. Ûguo nîguo nie Ngai-Mûnene Ngai mbugîte.

¹⁵ Rîrîa ngaatûma vûrûri wa Misiri wanangîke na ûtuîke werû, na indo ciao cionthe itavwe na ndûme andû akuo onthe maûragwe, nîmakaamenya atî nie nînie Ngai-Mûnene.

¹⁶ Rûu nîruo rwîmbo rwa macakaya rûrîa makaaina magîcakaya. Erîtu a mavûrûri nîmakaaina magîcakaîra Misiri, na magîcakaîra andû onthe a kuo. Ûguo nîguo Ngai-Mûnene Ngai augîte.”

Vûrûri wa arîa akuû

¹⁷ Mûthenya wa îkûmi na îtano wa mweri wa mbere, mwaka wa îkûmi na kaîrî kuuma twavirwa îthamîriorî, Ngai-Mûnene nîwambîrire atîrî,

¹⁸ “Mûndû, cakaîra mwîngî wa Misiri, ûmaikie nthî, Misiri yo mene na erîtu a mavûrûri marîa marî îgweta. Maikie vûrûri wa arîa akuû mathiî vamwe na arîa manyûrûrûkaga kwa arîa akuû.

¹⁹ Maûrie atîrî: “Mûreciria mûrî aro gûkîra acio engî? Nyûrûrûkani mûgekaranagie na andû arîa mataicî Ngai.

²⁰ “Andû a Misiri nîmakaathirua vamwe na andû arîa makaûragîrwa mbaararî. Onthe makaûragîrwa mbaararî.

²¹ Atongoria arîa marî vinya, vamwe na andû arîa mamatethagia marî kwa arîa akuû nîmakaaragia ûvoro wîgiî Misiri. Nîmakaaugaga atî andû a Misiri nîanyûrûrûku kwa arîa akuû. Mamamîte vamwe na andû arîa mataicî Ngai, arîa maakuîrîre mbaararî.

²² “Asîria îrî kûu, na îthiûrûrûkîrîtue nî mbîrîra cia athigari ao a mbaara arîa maaûragirwe marî mbaararî,

²³ na mbîrîra ciao irî îrimarî kûrîa kûriku mûno gwa akuû. Athigari ao onthe maaûragîrwe mbaararî na mbîrîra ciao ciîcûrîte kûu. Mbererî athigari acio maatûîre mamakagia andû arîa marî mwoyo.

²⁴ “Elamu arî kuo na andû ake mathiûrûrûkîrîtie mbîrîra yake. Onthe nî akuû na maaûragirwe marî mbaararî na makîthiî kwa arîa akuû matarî aruu. Acio nîmaamakagia andû arîa marî mwoyo na nîmaconorithîtue marî vamwe na andû arîa mathiîte gwa akuû.

²⁵ Nîathondekete ûrîrî gatagatîrî ka andû arîa maûragîtwe, vamwe na mûrûrûngano wake wonthe. Arigicîrîtue mîena yonthe nî mbîrîra cia andû arîa matarî aruu na maaûragîrwe mbaararî, nîûndû nîmeekagîra andû arîa marî mwoyo guoya. Rîu nîmaconorithîtue marî vamwe na arîa manyûrûrûkîte gwa akuû na rîu marî vamwe na arîa maûragîrwe mbaararî.

²⁶ “Mesheki na Tubabli marî vo, marigicîrîtue nî mbîrîra cia athigari ao a mbaara. Onthe matiarî aruu na maaûragîrwe mbaararî. Kûnarî ûguo nîmaamakagia arîa marî mwoyo.

²⁷ Matikaathikwa vamwe na athigari njamba arîa maaûragirwe tene, arîa maanyûrûrûkire kwa arîa akuû marî na indo ciao cia mbaara. Mviû ciao cia njûra ciaigirwe rungu rwa ciongo ciao, nacio ngo ciao nîciaigîrîrwe îgûrû rîa mîîrî yao. Andû acio njamba maarî na vinya na nîmaamakagia andû arîa marî mwoyo.

²⁸ “Kwoguo andû a Misiri nîmakaavootwa na mamame gatagatî ka andû arîa matarî aruu arîa maaûragîrwe mbaararî.

²⁹ “Andû a Edomu marî kuo vamwe na athamaki ao na anene ao onthe. Wana ethîrwa maarî na vinya mûno, nwatî rîu marî kwa arîa akuû mamamîte vamwe na andû arîa mataicî Ngai arîa maakuîrîre mbaararî.

³⁰ “Anene onthe a mwena wa rûgûrû marî kuo, wana andû a Sidoni marî kuo. Onthe nîmaanyûrûrûkire kwa arîa akuû marî na gîconoko ta andû arîa maaûragirwe nîûndû wa guoya îrîa meekagîra andû nîûndû wa vinya ûrîa maarî naguo. Nwatî rîu, mathiîte kwa arîa akuû marî na gîconoko vamwe na andû arîa maaûragirwe vîndî ya mbaara.

³¹ “Rîrîa mûthamaki wa Misiri vamwe na athigari ake a mbaara makoona andû arîa aûrage, nîmakeyûmîrîria. Ûguo nîguo Ngai-Mûnene Ngai augîte.”

³² “Nînatûmire mûthamaki wa Misiri ekîre andû arîa marî mwoyo guoya. Nwatî ke vamwe na athigari ake a mbaara onthe nîmakaaûragwa marî mbaararî na nîmakaathikwa vamwe na andû arîa matarî aruu arîa maakuîrîre mbaararî. Ûguo nîguo nie Ngai-Mûnene Ngai mbugîte.”