Ezek 3 - ÎVUKU RÎA ÛVORO MWARO

¹ Ngai nîwambîrire atîrî, “We mûndû, rîa kîrîa ûkûvewa. Rîa îvuku rîîrî rîa gîkûnjo ûcoke ûthiî ûkarîrie andû a nyomba ya Isiraeli.”

² Kwoguo nînavingûrire kanyua nake Ngai agîtûma ndîe îvuku rîu rîa gîkûnjo.

³ Nake nîwambîrire atîrî, “We mûndû, rîa îvuku rîîrî rîa gîkûnjo ngûkûnengera ûvae.” Nînarîrîre na rîrî kanyua gakwa rîacamaga ta ûkî.

⁴ Ngai nîwacokire akîmbîra atîrî, “We mûndû, thiî kûrî nyomba ya Isiraeli na ûmere maûndû marîa ngakwîra.

⁵ Ndiragûtûma kûrî rûrîrî rwaragia rûthiomi rûgeni na rûmû, nwatî nîragûtûma kûrî andû a Isiraeli.

⁶ Ndiragûtûma kûrî rûrîrî rûnene na rwaragia rûthiomi ûtaicî na rûmû rûrî na ciugo ûtangîtaûkîrwa. Nama, kethîrwa nagûtûmire kûrî andû ta acio, nîmangîakûthikîrîrie.

⁷ Nwatî andû a Isiraeli matigakûthikîrîria, nîûndû matirenda kûnthikîrîria. Andû onthe a Isiraeli marî ngoro nyûmû na nî aremi.

⁸ Taroria, nîndûmîte ûtuîke mûremi na ûgîe na ngoro nyûmû ta o.

⁹ Nîngatûma ûthiû waku ûme ta îthiga rîrîa rîûmû mûno. Ndûgetigîre kana ûmakue nîo nîûndû nî andû aremi.”

¹⁰ Nîwacokire akîmbîra atîrî, “We mûndû, thikîrîria waro maûndû monthe marîa ngûkwîra na ûmaige ngororî yaku.

¹¹ Thiî rîu kûrî andû enyu arîa marî îthamîriorî na ûmere ûrîa nie Ngai-Mûnene mbugîte, wana ethîrwa magakûthikîrîria kana tî makûthikîrîria.”

¹² Nînacokire ngîambararua na îgûrû nî Roho, na vuva wakwa nînegwire mûgambo ta wa kîthingithia kînene ûkiuga, “Riiri wa Ngai-Mûnene ûrîa ûrî îgûrû ûrokumua.”

¹³ Ngîcoka ngîgua mûgambo wa mathagu ma ciûmbe irîa irî mwoyo rîrîa mavutania, na mûgambo wa nthugû irîa irî mwena wa mo. Warî mûgambo mûnene ta wa kîthingithia.

¹⁴ Nînacokire ngîambararua nî Roho na akînguua ngîthiî nîrî na ûrûrû na marakara ngororî, na Ngai-Mûnene akîmboca na vinya wake.

¹⁵ Nînathiîre nginya Tela-Abibu vakuvî na rûnjî rwa Kebari kûrîa andû etû maatûûraga îthamîriorî. Nekarire kûu maarî mîthenya mûgwanja nîrî mûmaku nîûndû wa maûndû marîa noonete na ngîgua.

Ezekieli nîwathuurirwe atuîke mûrangîri

¹⁶ Mîthenya mûgwanja yathira, Ngai-Mûnene nîwambarîrie na akîmbîra atîrî,

¹⁷ “Mûndû nînagûtua mûrangîri wa andû a Isiraeli. Kwoguo thikîrîria ûrîa ngûkwîra na ûthiî ûgakaanie andû a Isiraeli vandûrî vakwa.

¹⁸ Nîngîkera mûndû mwaganu atî nama nîagûkua nawe ûrege kûmûkaania nîguo agarûrûke avonokie mwoyo wake; mûndû mwaganu nîagaakua nîûndû wa waganu wake, nawe nîngaakûrîvia nthakame yake.

¹⁹ Nwatî ûngîkaania mûndû mwaganu na arege gûtiga waganu wake na mîthiîre yake mîcûku, mûndû ûcio mwaganu nîagaakua nîûndû wa waganu wake, nwatî we nîûkaavonokia mwoyo waku.

²⁰ “Mûndû mûthingu angîtiga ûthingu wake na agîcoka gwîka maûndû macûku, nîngekîra maûndû ma kûmûvînga mbere yake na mûndû ûcio nîagaakua. Nîûndû ndwanamûkania, nîagaakua nîûndû wa waganu wake. Ndikaaririkana ciîko ciake cia ûthingu na nîngaakûrîvia nthakame yake.

²¹ Nwatî ûngîkaania mûndû mûthingu ndakevie na arege kwîvia, nama mûndû ûcio nîagaatûûra mwoyo nîûndû nîeguîte ûkîmûkaania nawe nîûkethîrwa ûvonoketie mwoyo waku.”

Ezekieli nîwaremirwe nî kwaria

²² Nînecûrirwe nî vinya wa Ngai-Mûnene, na ngîgua ambarîria akiuga atîrî, “Ûkîra ûthiî kûndû kûrîa kwaraganu na nîngakwarîria ûrî kûu.”

²³ Kwoguo nînaûkîrire na ngîthiî kûndû kûrîa kwarî kwaraganu. Nîrî kûu nînonire riiri wa Ngai-Mûnene ûrûngamîte mbere yakwa wata ûrîa noonete rûnjîrî rwa Kebari. Nînacokire ngîturumithia ûthiû wakwa nthî.

²⁴ Nwatî nînecûrirwe nî Roho wa Ngai na ûkînûngamia. Ngai-Mûnene nîwambîrire atîrî, “Thiî ûkevingîre gwaku nyomba.

²⁵ Nawe nîûkoovwa na mîkanda nîguo ndûkavote kûthiî kûrî andû.

²⁶ Nîngatûma rûrîmî rwaku rûtuîke rûrito na nîûkaaremwa nî kwaria nîguo ndûgakanie andû acio aremi.

²⁷ Nwatî rîrîa ngakwarîria, nîngakûvingûra kanyua na nîûkamera ûrîa nie Ngai-Mûnene mbugîte. Amwe nîmagaakûthikîrîria, nwatî amwe matigakûthikîrîria nîûndû nî andû aremi.”