Ezek 29 - ÎVUKU RÎA ÛVORO MWARO

Ûrathi wîgiî Misiri

¹ Mûthenya wa îkûmi na kaîrî mwerirî wa îkûmi wa mwaka wa îkûmi kuuma twathiî îthamîriorî, Ngai-Mûnene nîwambîrire atîrî,

² “Mûndû, vûgûka ûrorie mûthamaki wa Misiri ûrathe ûvoro ûmwîgiî vamwe na vûrûri wonthe wa Misiri.

³ Mwîre nie Ngai-Mûnene Ngai mbugîte atîrî: Nîngûrûa nawe mûthamaki wa Misiri we ndamathia îrîa îmamaga rûnjîrî rwa Nilo. Ugaga atî rûnjî rûu nî rwaku na nîwe watûmire rûgîe.

⁴ Nîngekîra ndwano nthîarî ciaku, na nîngaatûma nthamaki cia rûnjî rwaku ciînyitîrîre kûrî we. We vamwe na nthamaki icio nîngaacoka nîmûrute rûnjîrî.

⁵ We vamwe na nthamaki icio nîngaamwikia werûrî na mîîrî yenyu nîîkagwa kûndû gûtarî kîndû na ndîkaathikwa. Mîîrî yenyu îgaatuîka irio cia nyamû cia kîthakarî na iconi cia rîerarî.

⁶ Andû onthe a Misiri nîmagaacoka mamenye atî Nie nînie Ngai-Mûnene. “Nîûndû andû a Isiraeli maaigîte mwîvoko wao kûrî we, nwatî wekariî ta kamûtî gatarî vinya.

⁷ Rîrîa maakûnyitire na njara ciao nîwaunîkire na ûkîguraria ciande ciao. Rîrîa metiranirie nawe, nîwaunîkire na ûgîtûma matetema ciîga cia mîîrî.

⁸ Kwoguo, nie Ngai-Mûnene Ngai nîmbuga atî: nîngaatûma andû makûtharîkîre na mviû na nîmakaaûraga andû na maûrage nyamû ciaku cionthe irîa ûrîthagia.

⁹ Vûrûri wa Misiri ûgaatuîka werû ûtarî kîndû, na nîmakaamenya atî nie nînie Ngai-Mûnene. “Waugire atî Rûnjî rwa Nilo nî rwaku na nîwe warûmbire,

¹⁰ kwoguo nie nîndeganîte nawe na ngaregana na nyûnjî ciaku. Nîngaatûma vûrûri wa Misiri ûtigwe ûrî mûtheri na ûrî mwanangîku kuuma Megido kûthiî nginya Siene na kûthiî mûvakarî wa Ethiopia.

¹¹ Îvinda rîa mîaka mîrongo îna vûrûri ûcio ndûgaatûrwa nî andû na gûtirî mûndû ûkaavîtûkîrîra kuo kana nyamû îvîtûkîrîra kuo.

¹² Nîngaatûma vûrûri wa Misiri wanangîke gûkîra mavûrûri monthe ma nthî. Matûûra ma Misiri magaatuîka maganjo macûku îvinda rîa mîaka mîrongo îna gûkîra matûûra mengî monthe. Nîngaatûma andû a Misiri manyaganîrie ndûrîrîrî ciîngî na ndûme maûre mathiî mavûrûrirî mengî.”

¹³ Ngai-Mûnene Ngai arauga atîrî, “Mîaka mîrongo îna yathira, nîngaatûma andû a Misiri macoke maume mavûrûrirî kûrîa naamanyaganîrie.

¹⁴ Nîngaatûma mone mûnyaka na matûûre vûrûrirî ûrîa maatûûraga mbere wa Pathirosi. Kûu magaatûûra marî rûrîrî rûtarî na vinya,

¹⁵ gatagatî ka mavûrûri marîa mengî monthe na rûtigaacoka kwatha mavûrûri mengî.

¹⁶ Andû a Isiraeli matigaacoka kwiga mwîvoko wao kûrî vûrûri wa Misiri. Nîmakaamenya mavîtia mao ma kûvoya ûtethio kûrî andû a Misiri. Nao Aisiraeli nîmakaamenya atî Nie nînie Ngai-Mûnene Ngai.”

Mûthamaki Nebukadinezarû nîakaavoota Misiri

¹⁷ Mûthenya wa mbere wa mweri wa mbere, mwakarî wa mîrongo îîrî na mûgwanja kuuma twavirwa îthamîriorî, Ngai-Mûnene nîwambîrire atîrî,

¹⁸ “Mûndû, Nebukadinezarû mûthamaki wa Babuloni nîwavere athigari ake a mbaara wîra mûrito wa kûtharîkîra îtûûra rîa Turo. Ciongo ciao cionthe nîciathirire njuîrî nîûndû wa gûkuua mîrigo mîrito nacio ciande ciao igîcûnûka. Kûnarî ûguo, ke wana athigari ake matianyita kîndû gîa kûrîva wîra wa kûtharîkîra îtûûrarî rîa Turo.

¹⁹ Kwoguo, nie Ngai-Mûnene Ngai nîngaanenganîra vûrûri wa Misiri kûrî Nebukadinezarû, mûthamaki wa Babuloni. Nî agaatava indo ciake cionthe na akuue ûtonga wa vûrûri wa Misiri nîguo ûtuîke îrîvi rîa athigari ake a mbaara.

²⁰ Nîmûvete vûrûri wa Misiri nîguo nîmûrîve wîra ûrîa aarutire nîûndû maarutire wîra wakwa. Ûguo nîguo nie Ngai-Mûnene Ngai mbugîte.

²¹ “Mûthenya ûcio nîngaatûma andû a Isiraeli magîe na vinya na nîûkaavota kwaria ûrî gatagatî kao, nao nîmakaamenya atî nie nînie Ngai-Mûnene.”