Ezek 28 - ÎVUKU RÎA ÛVORO MWARO

Ûrathi wîgiî Mûthamaki wa Turo

¹ Ngai-Mûnene nîwambîrire atîrî,

² “We mûndû, îra mûthamaki wa Turo ûrîa nie Ngai-Mûnene Ngai nîramwîra. Arî na mwîtîîo ngororî na arauga atî ke nî ngai na ekaragîra gîtî Kîam ûnene Kîam ngai gatagatî ka maria. Nwatî we wî mûndû nwa tîwe ngai wana ethîrwa wîyonaga ûrî na ûgî ta ngai.

³ Nîma wîtucaga atî ûrî mûûgî gûkîra Danieli na gûtirî ûndû wa nthitho ûtaicî.

⁴ Ûûgî waku na ûtaûku nîcio itûmîte ûgîa na ûtonga. Wîyûnganîrîtie thaavu na sîlûva na ûgaciga mûthithûrî waku.

⁵ Ûûgî wa kwendia na kûgûra indo nîwongererete ûtonga waku na ûkagîa na mwîtîîo ngororî nîûndû wa ûtonga ûcio waku!

⁶ “Kwoguo, nie Ngai-Mûnene Ngai mbugîte nîûndû wîyonaga ûrî na ûgî ta ngai,

⁷ nîngaatûma andû ageni makûtharîkîre. Makethîrwa marî mavûrûri maganu gûkîra mavûrûri monthe. Nîmagaacomora mviû cia njûra na mathirie ûthaka wa ûgî ûcio waku na magwatie riiri waku gîko.

⁸ Nîmagaakûraga na magwikie îrimarî na nîûgaakua ta andû arîa maûragîrîtwe îriarî kûrîa kûriku.

⁹ Nîûkaauga atî we wî ngai rîrîa ûkethîrwa ûrî mbere ya andû arîa magaûka gûkûraga? Wakinya njararî cia arîa magaaûka gûkûthiria nîûkaamenya atî we wî mûndû tu, nwatî ndûrî ngai.

¹⁰ Ûgaakua gîkuû kîrî na nthoni mûno ûrî njararî cia andû ageni. Nie Ngai-Mûnene Ngai nînie mbugîte ûguo.”

Kûgwa kwa Mûthamaki wa Turo

¹¹ Ngai-Mûnene nîwambîrire rîngî atîrî,

¹² “Mûndû, ina rwîmbo rwa macakaya nîûndû wa mûthamaki wa Turo. Mwîre nie Ngai-Mûnene Ngai nîrauga atî: we mûthamaki wa Turo wonagwa ûrî kîonereria Kîam maûndû marîa makinyanîru. Warî na ûgî mwîngî na warî mûthaka viû.

¹³ Watûûraga Edeni mûgûndarî wa Ngai na wegemetie na mathiga ma goro ma mîthemba yonthe. Mathiga mau marî ma mîthemba ya: rangi njerû, rangi wa mathangû ûtarî mûgwatu waro, arimathi, mûruru, ndune, vururu, mûtukanio wa marangi mîthemba mîngî îkûvenavenia, na rangi wa njambarawe. Warî na mathaga ma thaavu. Maûndû mau monthe wathondekerwe mûthenya ûrîa waûmbirwe.

¹⁴ Nînathuurire mûraika wa gûkûrangagîra. Watûûraga kîrîmarî gîakwa kîrîa kîtheru, na wathiîcagîra kûndû kûrî na mathiga makûvenavenia.

¹⁵ Mîthiîre yaku îthîrîtwe îtarî ûcuke kuuma mûthenya ûrîa waûmbirwe nginya rîrîa wambîrîrie gwîka maûndû matarî ma ûthingu.

¹⁶ Warî na wîra mwîngî wa kûgûra na kwendia indo na ûkîambîrîria gwîka maûndû na vinya na ûndû ûcio ûgîtûma wîvie. Kwoguo nînaakûvinyûririe ta kîndû kîrî mûgiro nîguo ume kîrîmarî Kîam Ngai. Na mûraika ûrîa wakûrangagîra nîwakûvinyûririe ûkiuma mathigarî marîa maavenavenagia.

¹⁷ Nîwagîre na mwîtîîo nîûndû wa ûthaka waku, na ûgîcûkia ûûgî waku nîûndû wa riiri waku. Nagwikirie nthî mûtheturî na ngîkwanîka mbere ya athamaki nîguo makwone.

¹⁸ Nîwarûthire maûndû meengî macûku ûrî wîrarî waku wa kwendia na kûgûra indo na ûkîgwatia vandû varîa ûgoocagîra mûgiro. Kwoguo nînatûmire mwaki ume wa kûu ûrî ûkûvîvie ûthire. Nao andû arîa maakwonaga moonaga ûtuîkîte mûu.

¹⁹ Andû arîa mwîcene nao vûrûrirî nîmagwatîtwe nî kîmako nîûndû waku. We ûtuîkîte kîndû gîa kûmakania na ndûgaacoka kwonekana rîngî tene na tene.”

Ûrathi wîgiî Sidoni

²⁰ Ngai-Mûnene nîwambîrire atîrî,

²¹ “Mûndû, vûgûkîra îtûûra rîa Sidoni ûrirathîre ûvoro

²² ûrîre atî Ngai-Mûnene Ngai augîte nîakûrûa narîo onanie riiri wake gatagatî ka rîo. Rîrîa ngoonania ûthingu wakwa na njîra ya kûrîverithia, andû nîmakaamenya atî nie nînie Ngai-Mûnene.

²³ Nîngaatûma mîrimû îtûûrarî rîu na nthakame îtûrûrwe tûcîrarî twa rîo. Rîkaatharîkîrwa kuuma mîena yonthe nî nthû, na andû arîa makaaûragwa makaagwa wa kûu îtûûrarî, na nîmûkaamenya atî nie nînie Ngai-Mûnene.”

Isiraeli Nîmakaarathimwa

²⁴ Ngai-Mûnene augîte atîrî, “Gûtigaacoka kwoneka ûndû rîngî wa kwîgwithia andû a Isiraeli ûrûrû ta ûrîa mwîgua kana cong'e imundaga mûndû umîte na mavûrûrirî marîa mariganîtie nao. Na nîmakaamenya atî nînie Ngai-Mûnene Ngai.”

²⁵ Ngai-Mûnene Ngai arauga atîrî, “Nîngaûngania andû a Isiraeli na nîmacokanîrîrie vamwe kuuma mavûrûrirî marîa maanyaganîrîtue. Ngeeka ûguo nîguo andû a ndûrîrî mone ûthingu wakwa. Nao andû a Isiraeli nîmagacoka gûtûûra vûrûrirî ûrîa naveere Jakovu, ndungata yakwa.

²⁶ Nîmagaatûûra kuo marî agitîre. Nîmagaatuma nyomba kuo na mavande mîtî ya mîthavibu. Magaatûûra marî agitîre nîûndû nîngaaverithia mavûrûri marîa mariganîtie nao marîa maamavinyagîrîria. Na nîmakaamenya atî nie nînie Ngai-Mûnene Ngai wao.”