Ezek 27 - ÎVUKU RÎA ÛVORO MWARO

Gûcakaya nîûndû wa Turo

¹ Ngai-Mûnene nîwambîrire atîrî,

² “Mûndû, ina rwîmbo rwa macakaya nîûndû wa îtûûra rîa Turo,

³ îtûûra rînene rîrîa rîrî rûtere rwa îria na rîrutithanagia wîra wa kûgûra na kwendia indo na andû a mavûrûri marîa matûûraga rûtere rwa maria. Îra îtûûra rîu Ngai-Mûnene Ngai augîte atîrî: “We îtûûra rîa Turo wîtîîaga atî ûrî mûthaka mûno.

⁴ Mîvaka yaku îkinyîte wa îriarî, andû maagûtumire ûrî mûthaka mûno.

⁵ Andû arîa maagûtumire maatûmîre mbaû kuuma kîrîmarî Kîam Seniri; na magîatûra mbaû cia mîtarakwe kuuma Lebanoni; cia kûrûtha mûtî wa gûtwarithia meri.

⁶ Nîmoocire mîtî ya mîvuru kuuma Bashani makîrûtha mîtî ya gûtwarithia meri irîa nene; wamîtumire na mbaû cia mîthithinda kuuma Kuporo, na ûkîigemia na mîguongo.

⁷ Itambaa cia gûtwarithia meri ciaku, ciarî cia nguo mbaro ng'emie kuuma Misiri; na yarî vendera yaku. Kîandarûa gîaku Kîamgemetue na rangi wa vururu, na wa njambarawe kuuma icîgîrîrarî cia Elisha.

⁸ Andû arîa maatûûraga Sidoni na Arivadi, nîo maatindîkaga meri ciaku na mîtî. Andû aku arîa aûgî mûno, nîo maatwarithagia meri.

⁹ Athuuri a Gebali na andû marî na wara maarî gwaku, makîruta wîra wa kûvinga mîanya ya meri. Andû onthe arîa mathiîcagîrîra îriarî na meri, maavîtûkagîrîra gwaku makagûra na makendia indo.

¹⁰ “Athigari kuuma Perisia, Ludi na Puti nîmaatungataga gîkundirî Kîam athigari aku a mbaara. Ngo ciao na ngovia cia kûgitîra ciongo maaicurîtie kûrîa athigari a mbaara mekaraga. Athigari acio nîmaatûmire ûgîa riiri.

¹¹ Andû kuuma Arivadi na Heleki vamwe na athigari ao nîo maarangagîra nthingorî ciaku. Nao andû kuuma Gamadi maarangagîra nyomba irîa ciarî ndaca na îgûrû. Nîmaacuririe ngo ciao nthingorî mîena yonthe na nîmaatûmire wonekane ûrî mûthaka.

¹² “Andû a Tarishishi naamarutithanagia wîra nawe wa kûgûra na kwendia indo nîûndû warî na ûtonga mwîngî wa mîthemba mîîngî. Nîmaakûrananagia indo ta sîlûva, cuuma cia mîthemba mîîngî na indo ciaku.

¹³ Andû kuuma Javani, Tubali na Mesheki nîmaarutithanagia nawe wîra wa kûgûra na kwendia indo. Nîmaakûviragîra ngombo na indo cia cuuma ya gîcango nîguo ûmakûrananîrie na indo ciaku.

¹⁴ Nîmaakûrananirie indo ciaku na mbarathi cia gûkua mîrigo, mbarathi cia mbaara na nyûmbû.

¹⁵ Andû kuuma Dedani nîmaarutithanirie wîra wa kûgûra na andû a Turo. Kûndû kûrîa kwarî na wîra mwaro mûno waku wa kwendia na kûgûra indo, kwarî mavûrûrirî meengî marîa marî rûtererî rwa îria. Andû a kuo nîmaakûretagîra mîguongo ya njogu nîguo ûmakûrananîrie na mîtî ya mîvîngo.

¹⁶ Andû a Sîria nîmaarutithanirie wîra nawe wa kwendia na kûgûra indo nîûndû warî na indo nyîngî. Nîmaakûvere indo ta mathiga ma goro, itambaa cia rangi wa njambarawe, itambaa ino ng'emie na nguo mbaro nîguo nawe ûmave indo ciaku.

¹⁷ Andû a Juda na andû a Isiraeli nîmaarutithanirie wîra wa kûgûra na kwendia indo nawe. Maakûretere ngano, ndamaiyû, ûûkî, maguta na mînyamû mînungi waro nîguo ûmakûrananîrie na indo ciaku.

¹⁸ Andû a Damesiki nîmaagûraga indo kûrî we nîûndû warî na ûtonga wa indo cia mîthemba mîngî. Nîmaakûretagîra ndivei kuuma Heliboni na guoya wa rangi mûcerû wa ng'ondu kuuma Saharu.

¹⁹ Dani na Javani nîmaaretaga indo ciaku cia kwendia kuuma Uzali, na cuuma na magaikûranania na indo kuuma gwaku.

²⁰ Andû a Dedani nîmaakûretagîra nguo cia kwigîrîrwa îgûrû rîa mbarathi rîrîa andû makûthiî mamîkarîrîte.

²¹ Andû a Arîbia na anene onthe a Kedari nîmaakûretagîra tûgondu, ndûrûme na mbûri nîguo mûgûre na mwendanîrie nao.

²² Endia na agûri indo kuuma Sheba na Rama nîmaakûrananagia indo nawe. Nîmaakûretagîra indo cionthe irîa ciarî mbaro mûno cia mînyamû îrîa mînungi waro, mathiga monthe ma goro na thaavu.

²³ Nîmwarutithanagia wîra na andû a Harani, Kane, na Edeni vamwe na agûri na endia kuuma Ashuru na Kilimadi.

²⁴ Acio onthe nîmaarutithanirie wîra nawe wa kwendia nguo irîa mbaro cia rangi wa vururu, na nguo irîa ng'emie na mîgeka ya gûkinyangwa ya marangi mathererûku vamwe na mîkumbû na mîkanda.

²⁵ Meri irîa nene cia Tarishishi nîcio ciagûkuagîra indo. Kwoguo wekariî ta meri îrî îriarî îkuîte mîrigo.

²⁶ “Atwari aku magûtwarîte îriarî kûrîa kûriku mûno, naruo rûkûngi rwa mwena wa îrathîro nîrûkunangîte ûrî kûu kûraca gatagatîrî ka îria.

²⁷ Ûtonga waku wonthe, indo ciaku cionthe, atwarithia na andû aku arîa mathiîcaga na meri, mavundi ma mbaû na agûri na endia aku, athigari aku onthe arîa marî gwaku, athiîi arîa onthe marî merirî na indo cionthe, nîikaaûrîra îriarî mûthenya ûrîa ûkaagwa.

²⁸ Rîrîa kîrîro gîa atwarithia aku a meri gîkeguîka, nthî nyûmû rûtere rwa îria nîkainaina.

²⁹ Arîa onthe marutaga wîra merirî, nîmakaauma marûngame rûtere rwa îria.

³⁰ Nîmagacakaya maugîrîrîtie nîûndû waku, na marîre marî na ûrûrû mwîngî ngororî. Nîmakeminjîria rûkûngû ciongorî ciao, na megaragarie mûurî.

³¹ Menjete ciongo nîûndû waku, na mageekîra nguo cia macakaya, Nîmagaakûrîrîra marî na ûrûrû ngororî.

³² Vîndî îrîa makeethîrwa makîrîra, nîmakaaina rwîmbo rwa macakaya na mauge atî, ‘Nî ûrîkû wanacûkangua ta îtûûra rîa Turo rîrî gatagatî ka îria?’

³³ Vîndî îrîa indo ciaku cia kwendua ciaviragwa nthî ciîngî, andû eengî nîmaagunîkaga nîcio. Nîwatongirie athamaki a nthî, na ûtonga mwîngî wa indo ciaku.

³⁴ Nwatî rîu unîkangîrîte na kûu îriarî, na ûkaûrîra kûrîa kûrikîru mûno manjîrî. Indo irîa ûrakuîte na andû arîa mararî merirî, nîmaûrîrîte manjîrî vamwe nawe.

³⁵ “Andû onthe arîa matûûraga rûtere rwa îria, nîmamakîte nîûndû waku. Nao athamaki a kuo nîetigîru mûno na magakûnja mothiû mao nî gûtangîka.

³⁶ Andû a mavûrûri arîa magûraga na makendia indo nîmagaakûnyarara nîûndû ûkethîrwa ûkinyîtie mûthiia na ndûgaacoka kwonekana rîngî tene na tene.”