Ezek 23 - ÎVUKU RÎA ÛVORO MWARO

Erîtu Arîa Maarî Evia

¹ Ngai-Mûnene nîwambîrire atîrî,

² “We mûndû, vîndî îmwe kwarî na erîtu a ng'ina ûmwe.

³ Marî ethî, matûûraga vûrûri wa Misiri. Marî kûu nîmaavûrire ûmaraa, makîvivinywa nyondo ciao na magîtuîka tî erîtu nthingi.

⁴ Ûrîa mûkûrû eetagwa Ohola, nake ûrîa mûnini eetagwa Oholiba. Nao nîmaatuîkire aka akwa, magîciara anake na erîtu. Marîîtwa mau mao, Ohola nî Samaria, nake Oholiba nî Jerusalemu.

⁵ Ohola anarî mûka wakwa, nîwavûraga ûmaraa na kwîrirîria andû arîa mendanîte nao a kuuma Asîria.

⁶ Andû acio maarî athigari njamba a mbaara na meekagîra nguo cia rangi wa njambarawe, anene, na anene a athigari a mbaara. Onthe maarî anake ethî athaka na mathiîcaga mekarîrîte mbarathi.

⁷ Ohola nîwavûrire ûmaraa na andû onthe a Asîria arîa maarî îgweta, na nîwegwatirie gîko na njîra ya kûvoya mîvuanano ya mûndûmûrûme wa wonthe ûrîa eeriragîria.

⁸ Ndaatiganîria ûmaraa ûrîa aambîrîrie arî Misiri rîrîa aarî mwîrîtu mwîthî. Arûme arîa maamamaga nake nîo maamûcûkîrie wîrîtu wake na makîmûtua mûmaraa.

⁹ Kwoguo nînaamûnenganîre kûrî anyanya acio ake a Asîria arîa eeriragîria mûno.

¹⁰ Andû acio nîmaamûrutire nguo agîtigwa arî njaga. Nîmaanyitire anake na erîtu ake, nake ke mwene makîmûraga na rûviû. Îvera rîrîa aagwatire nîrîatûmire atuîke wa kûthekagîrîrwa nî aka arîa engî.

¹¹ “Mwarwang'ina Oholiba ona ûndû ûcio nîwatuîkire mûcûku gûkîra Ohola na akîrirîria ûmaraa gûkîra wa mwarwang'ina.

¹² Nîweriragîria andû a Asîria, atongoria, anene a athigari a mbaara, athigari njamba arîa meethagîrwa meyovete indo ciao cia mbaara, athigari arîa maathiîcaga mekarîrîte mbarathi. Onthe acio maarî anake ethî na athaka.

¹³ Nînoonire atî ke aarî mûmaramari. Oîrî, ke wana mwarwang'ina maarî na mîtugo îvanene.

¹⁴ “Oholiba nîwathiîre na mbere na kûvûra ûmaraa. Nîwagucîrîrue mûno nî mbica cia Akalidei icoretwe rûthingorî ivakîtwe rangi îno ndune,

¹⁵ meyovete mîcivi ciûnorî na marî na iremba ciongo. Onthe moonekaga mekariî ta anene a Babuloni, andû matûûraga vûrûrirî wa Kalidei.

¹⁶ Rîrîa oonire mbica icio nîwerirîrie arûme acio na agîtûma anjaama kûrî o vûrûrirî wa Kalidei.

¹⁷ Andû acio a Babuloni nîmaaûkire kûrî ke na nîmaamenyanire nake kîîmwîrî ûrîrîrî wake nîûndû wa kûmwîrirîria. Marîkia kûvûra ûmaraa nake, nîwamamenire na agîtigana nao.

¹⁸ Rîrîa eyonithanirie kûrî andû atî ke nî mûmaraa na akîonania njaga yake, nînaamûtiganîrie wata ûrîa naatiganîrîtie mwarwang'ina.

¹⁹ Kûnarî ûguo, nîwathiîre na mbere kûvûra ûmaraa na vinya mûno, ta ûrîa eekaga arî mwîthî rîrîa aavûraga ûmaraa vûrûrirî wa Misiri.

²⁰ Nîweriragîria mûno arûme arîa ciîga ciao cia ûciari ciegana ta cia mvunda na maarî na vinya wa ûciari mwîngî ta wa mbarathi.

²¹ Oholiba nîwerirîrie maûndû make macûku marîa eekaga arî mwîthî vûrûrirî wa Misiri. Andû a Misiri mamondorire nyondo ciake irîa ciarî nûngarû na ndaacoka gûtuîka nthingi rîngî.

Ngai nîwatuîrîre Oholiba ciira

²² “Kwoguo we Oholiba Ngai-Mûnene arauga atîrî, “Rîu nîngûtûma anyanya aku arîa watiganîrie magûkîrîre. Magaagûkîrîra kuuma na mîena yonthe.

²³ Ngaatûma andû magûkîrîre kuuma Babuloni na Kalidei, andû kuuma Pekodi, Shoa na Koa, na andû onthe a Asîria. Ûgaaûkîrîrwa nî anake onthe arîa athaka wa vamwe na atongoria, anene a athigari a mbaara, na athigari njamba cia mbaara onthe mathiîte mekarîrîte mbarathi.

²⁴ Nao nîmagaakûtharîkîra kuuma mwena wa rûgûrû marî na ikaari cia mbaara na cia gûkuua mîrigo na gîkundi Kîam andû eengî. Nîmagaakûrigicîria kuuma na mîena yonthe marî na ngo nene na nini na ngovia cia cuuma cia kûgitîra ciongo. Nîngaametîkîria magûtuîre ciira, na nîmagaagûtuîra kûringana na watho wao.

²⁵ Nîûndû nîrî na marakara, nîngaatûma magûtuîre marî na mang'ûrîka. Nîmagaagûtinia na rûviû maniûrû na matû, macoke manyite anake na erîtu aku. Nao andû arîa magaatigara matakuîte, nîmakaavîvua na mwaki.

²⁶ Andû acio nîmagaagûtembûrangîra nguo irîa ûkethîrwa wîkîrîte na magûcune mathaga maku maro.

²⁷ Ûguo nîguo ngaagûtigithia ûmaramari ûcio waku na ûmaraa ûrîa wambîrîrie rîrîa warî Misiri, nîguo ndûgacoke kûmaroria kana ûririkana vûrûri wa Misiri rîngî.”

²⁸ Mwathani Ngai arauga atîrî, “Nie nîngaakûrekereria kûrî andû arîa ûmenete, na wî kînyiria Kîamo.

²⁹ Nîûndû wa ûrîa makûthûrîte, nîmagaagûcuna indo ciaku irîa ûtûîre ûthûkûmaga na magûtige ûrî njaga ûtarî nguo. Nayo njaga ya ûmaraa waku nîîkonekana, ûmaramari na ûraa waku cionekane.

³⁰ Ngaagwîka maûndû mau monthe nîûndû nîwarûthire ûmaraa na andû a ndûrîrî, na nîûgwatîtue mûgiro nî mîvuanano yao.

³¹ Nîwarûmîrîre mîthiîre îrîa yarî na mwarwanyûkwe, kwoguo gîkombe kîrîa aanyuîrîre nîkîo wanawe ûkanyuîrîra.”

³² Ngai-Mûnene arauga atîrî, “Ûkaanyuîrîra gîkomberî kîrîa, mwarwanyûkwe aanyuîrîre, gîkombe kînene na kîrikîru. Andû nîmagaakûthekerera na makûnyarare; na nîgîcûru.

³³ Nîgîgaatûma ûtuîke mûrîu na wîgue kîeva, gîkombe Kîam mwarwanyûkwe Samaria, nî gîkombe Kîam guoya na gûcûkangia.

³⁴ Ûgaakînyuîra ûkînyinyûkîrîrie, ûgaakîenyûranga na magego tûcunjî tûcunjî, na wîtemange nyondo natuo. Nie Ngai-Mûnene, nînie mbugîte ûguo.”

³⁵ Ngai-Mûnene arauga atîrî, “We nîwariganîrwe nî nie na ûkîmbuvatîra, nîûkaaverithua nîûndû wa ûmaramari waku na ûmaraa waku.”

Ngai nîwatuîrîre Erîtu acio oîrî Ciira

³⁶ Ngai-Mûnene nîwambîrire atîrî, “We mûndû, nîûgûtuîra Ohola na Oholiba ciira? Meere maûndû marîa marî mûgiro mekîte.

³⁷ Nîmarûthîte maûndû ma ûtharia na nîmaûraganîte. Nîmarûthîte maûndû ma ûmaraa na mîvuanano yao, na makamîrutîra ciana ciakwa irî magongoona ma kûvîvua.

³⁸ Na twa ûguo wonga, mûthenya wa ûcio nîmaagwatirie vandû vakwa varîa vatheru mûgiro na nîmaaregire gûtîîa thavatû ciakwa.

³⁹ Nîûndû mûthenya ûrîa maaûragire ciana ciao na makîiruta irî magongoona kûrî mîvuanano, nîmaatonyire vandû vakwa varîa vatheru na makîvagwatia mûgiro. Ûguo nîguo meekire nyombarî yakwa.

⁴⁰ “Erîtu aya nîmaatûmaga anjaama mathiî magete andû kuuma kûraca, na nîmaaûkire. Nîûndû wao erîtu aya nîmeethambagia, makevaka rangi metho na makegemia na mathaga.

⁴¹ Mekarîîre itî mbaro mûno ta irîa ciîkaragîrwa nî anene na metha îtandîkîtwe mbere yao. Metharî îo maaigîrîrîte ûbani wakwa na maguta makwa.

⁴² Nîkweguîkire mîgambo ya andû eengî matetigagîra maûndû, arûme maarî mîrîu maarutîtwe kuuma werûrî. Nîmeekîrire aka acio mvang'iri njara na makîmekîra ngovia mbaro ciongorî ciao.

⁴³ Nînacokire ngîyûria kana nîmathiî na mbere kûvûra ûmaraa na mûndûmûka ûcio mûkûrû ûguo.

⁴⁴ Arûme acio maathiîcaga kûrî ke ta ûrîa mathiîcaga kûrî mûmaraa. Ûguo nîguo maathiîcaga kûrî Ohola na kûrî Oholiba, aka acio amaramaru.

⁴⁵ Nwatî andû arîa athingu nîmakaamatuîra ciira ûrîa aka arîa itharia na aûragani matucagîrwa, nîûndû nî itharia na nîaûragani.”

⁴⁶ Ngai-Mûnene arauga atîrî: “Nîgûgaaûka gîkundi Kîam andû eengî kîmatharîkîre na kîmacuune indo ciao.

⁴⁷ Gîkundi kîu Kîam andû nîgîkaamariva na mathiga na kîmaûrage na mviû. Nîgîkaaûraga anake ao na kîûrage erîtu ao, na nîgîkaavîvia nyomba ciao.

⁴⁸ Ûguo nîguo ngaathiria ûmaramari kûu vûrûrirî wonthe, nîguo ûtuîke ûndû wa gûkaania aka onthe matige kûrûtha maûndû ma ûmaraa ta ûcio Ohola na Oholiba meekire.

⁴⁹ Na nîmûkaaverithua nîûndû wa ûmaramari ûcio wenyu na mevia menyu ma kûgooca mîvuanano. Vîndî îo nîmûkaamenya atî nie nînie Mwathani Ngai-Mûnene.”