Ezek 20 - ÎVUKU RÎA ÛVORO MWARO

Wendi wa Ngai-Mûnene na ûremi wa andû

¹ Mûthenya wa îkûmi wa mweri wa gatano, mwaka wa mûgwanja kuuma twathiî îthamîriorî, athuuri amwe a Isiraeli nîmaaûkire kûrî nie. Nîmeekarire nthî mbere yakwa makîenda gûtuîria wendi wa Ngai-Mûnene kuuma kûrî nie.

² Ngai-Mûnene nîwambîrire atîrî,

³ “Mûndû, arîria athuuri a Isiraeli ûmeere Ngai-Mûnene aramaûria kana nîkwa maûkîte gûtuîria wendi wakwa? Na ma wata ûrîa Nie Ngai ndûûraga mwoyo, wendi wakwa ndûgûtuîrua nî mue.

⁴ “Mûndû, nîûgaatuîra andû aya? Mamenyithie maûndû marî mûgiro marîa meekirwe nî methe mao ma tene.

⁵ Meere Ngai-Mûnene augîte atî, mûthenya ûrîa nie naathuurire andû a Isiraeli nîneranîre na mwîvîtwa kûrî njiarwa cia Jakovu na ngîîmenyithania kûrî o marî vûrûrirî wa Misiri. Nevîtire kûrî o ngiuga atî nie nînie Ngai-Mûnene Ngai wenyu.

⁶ Mûthenya ûcio nînevîtire nîrî mbere yao ngiuga atî nîngaamaruta vûrûri wa Misiri nîmavire vûrûrirî ûrîa naamacarîrie, vûrûri mûnoru na ûrî îriia na ûûkî mwîngî, vûrûri mwaro gûkîra mavûrûri monthe.

⁷ Naamerire matecanîrie maûndû marî mûgiro marîa meeriragîrua nî metho mao, na matige kwîgwatia gîko na mîvuanano ya kûgoocwa ya Misiri. Nie nînie Ngai-Mûnene, Ngai wao.

⁸ Nwatî nîmaareganire nanie na makîrega kûnthikîrîria. Gûtirî wanarî ûmwe wao watecanîrie maûndû marîa marî mûgiro meeriragîria, kana matiganîria mîvuanano ya kûgooca ya Misiri. Ngîcoka ngiuga nîngûmetûrûrîra mang'ûrîka makwa nthirie marakara makwa kûrî o marî vûrûrirî wa Misiri.

⁹ Nwatî ndieka guo nîguo rîîtwa rîakwa rîtikanyararwe nî ndûrîrî irîa maatûûraga gatagatîrî ga cio. Ndûrîrî icio nîcionire ngîîmenyithania kûrî andû a Isiraeli na njîra ya kûmaruta vûrûri wa Misiri.

¹⁰ “Kwoguo nînaamarutire vûrûri wa Misiri na ngîmavira werûrî.

¹¹ Nînaamavere irîra ciakwa na ngîmamenyithia mawatho makwa nîguo mûndû amarûmîrîra atûûre mwoyo.

¹² Makîria ma ûguo, nînaamavere mîthenya yakwa ya thavatû îtuîke kîmenyithia gatagatî gakwa nao nîguo mamenye atî nie Ngai-Mûnene nînie nîmatheragia.

¹³ Nwatî andû a Isiraeli nîmaareganire nanie marî werûrî. Matiarûmîrîra irîra ciakwa nwatî nîmaaregire mawatho makwa, marîa mûndû angîmarûmîrîra mangîtûma atûûre mwoyo, na makîrega kûva thavatû ciakwa gîtîîo. Nînacokire ngîciria nîmetûrûrîre marakara nîmathirie viû marî werûrî.

¹⁴ Nwatî nînekire ûndû wîngî nîguo rîîtwa rîakwa rîtikanyararwe nî ndûrîrî irîa cionire ngîmaruta Misiri.

¹⁵ Marî werûrî nînevîtire kûrî o ngiuga ndikaamavira vûrûrirî ûrîa naamaveete wîcûrîte îriia na ûûkî na mwaro gûkîra mavûrûri monthe,

¹⁶ nîûndû nîmaaregire mawatho makwa na makîrega kûrûmîrîra irîra ciakwa. Ngoro ciao cierirîrie kûgooca mîvuanano na makîrega kûva thavatû ciakwa gîtîîo.

¹⁷ “Kûnarî ûguo nînaameguîrîre ntha na ndiamacûkangia kana nîmathiria marî werûrî.

¹⁸ Na marî kûu werûrî nerire ciana ciao itikaarûmîrîre irîra cia methe mao, kana ciathîkîra mawatho mao, kana ciîgwatia gîko na njîra ya kûgooca mîvuanano.

¹⁹ Nie Ngai-Mûnene nî Ngai wenyu, rûmagîrîrani mawatho makwa na mwathîkagîre irîra ciakwa,

²⁰ na mûvecage thavatû ciakwa gîtîîo nîguo ituîkage kîmenyithia gatagatî gakwa namue, atî Nie Ngai-Mûnene nî Ngai wenyu.

²¹ “Nwatî njiarwa ciao nîciatuîkire aremi na ikîregana nanie. Matiarûmîrîra irîra ciakwa na matiathîkîra mawatho makwa marîa mûndû amarûmîrîra matûmaga atûûra mwoyo. Nîmaaregire kûva thavatû ciakwa gîtîîo. Nînacokire ngîciria nîmetûrûrîre mang'ûrîka makwa nîguo nthirie marakara makwa kûrî o marî werûrî.

²² Nwatî nînathunithirie njara yakwa ndigeke guo nîguo rîîtwa rîakwa rîtikanyararwe nî ndûrîrî irîa cionire ngîmaruta Misiri.

²³ Makîria ma ûguo nînevîtire nîrî mbere yao kûu werûrî ngiuga atî, nîngaamanyagania gatagatîrî ka ndûrîrî ciîngî na ndûme mavirwe mavûrûrirî mengî.

²⁴ Nekire ûguo nîûndû nîmaaregire kûvingia matuîro makwa ma ciira, na nîmaaregire irîra cia watho wakwa na makîrega kûva thavatû ciakwa gîtîîo. Nîmeerirîrie kûgooca mîvuanano îrîa methe mao maagoocaga.

²⁵ “Nînaamaretithîrie irîra cia mawatho mataarî maro ma kûrûmîrîrwa na matuîro ma ciira matangîatûmire mûndû atûûra mwoyo.

²⁶ Nînamagwatirie mûgiro na njîra ya matega mao na ngîtûma maruta marikithathi mao marî magongoona ma kûvîvua. Nînatûmire macûkangue nîguo mamenye atî nînie Ngai-Mûnene.

²⁷ “Kwoguo, we mûndû, arîria andû a Isiraeli. Meere Ngai-Mûnene augîte atî, methe mao ma tene nîmaagwatirie rîîtwa rîakwa gîko nîûndû nîmaaregire gûtuîka evokeku kûrî nie.

²⁸ Namaretire vûrûrirî ûrîa namerîrîre na mwîvîtwa atî nîngaamava. Varîa vonthe moonaga varî tûrîma tûtûgîru kana mûtî mûruru, nîmaathiîcaga na makarutîra magongoona mao vo, na nîmandakaririe na magongoona mao ma kûvîvua matega ma ndivei marîa maarutire.

²⁹ Nanie nînacokire ngîmaûria, ‘Vandû vau vatûgîru mûthiîcaga nî va?’ Kwoguo vandû vau vetagwa Bama nginya ûmûnthî.

³⁰ Rîu aria na andû a Isiraeli ûmere Ngai-Mûnene arauga atîrî: Nîmwîcûkangia na njîra ta îrîa methe menyu mecûkangirie nayo na mûkagooce mîvuanano?

³¹ Rîrîa mûkûruta iveo cienyu na mûkaruta ciana cienyu irî magongoona ma kûvîvua, nîmwîgwatagia gîko mue ene na mîvuanano yenyu yonthe nginya ûmûnthî. Mue andû a Isiraeli, nwa mûrie ûndû kuuma kûrî Nie? Ngai-Mûnene augîte atî wata ûrîa ke atûûraga mwoyo, ndangîtîkîra mûmûrie ûndû.

³² Ûguo mûtuîte na ngoro cienyu gûtingîvoteka, nîûndû mûrauga atî nîmwenda kûvanana na ndûrîrî irîa ciîngî, irîa igoocaga mîtî na mathiga.”

Ngai nîaverithanagia na nîovanagîra

³³ Ngai-Mûnene arauga atîrî, “Wata ûrîa ndûûraga mwoyo, nîngaamwatha na vinya, na ûvoti wakwa wonthe nîrî na marakara.

³⁴ Nîngaamûruta kuuma kûrî ndûrîrî nîmûcokanîrîrie vamwe kuuma mavûrûrirî marîa mûnyaganîrîtie na nîngaamwonia vinya wakwa na ûvoti wakwa.

³⁵ Nîngaamûvira werûrî wa andû a ndûrîrî, na kûu nîkuo ngaamûtuîrîra ciira mûkîonaga.

³⁶ Ngai-Mûnene augîte atî wata ûrîa aatuîrîre methe menyu marî werûrî wa Sinai nwaguo wana mue akaamûtuîrîra.

³⁷ “Nîngaamwatha na vinya na ndûme mwathîkîre kîrîkanîro gîakwa.

³⁸ Andû arîa aremi na arîa mevagia nîngaamaruta gatagatî kenyu. Nîngaamaruta kuuma vûrûrirî ûrîa matûûraga, nwatî ndigetîkîra matonya vûrûrirî wa andû a Isiraeli. Nîmûgaacoka mûmenye atî nie nînie Ngai-Mûnene.

³⁹ “Rîu mue andû a Isiraeli, Ngai-Mûnene augîte atî: Wa mûndû nîathiî na mbere gûtungatîra mûvuanano wake ethîrwa tîmûnthikîrîria. Nwatî mûtigûcoka gûturithia rîîtwa rîakwa rîtheru gîtîîo na iveo icio cienyu na mîvuanano yenyu ya kûgoocwa.

⁴⁰ Nîûndû kîrîmarî gîakwa kîtheru, kûu kîrîmarî gîa Isiraeli îgûrû, nîkuo andû a Isiraeli makaangoocagîra. Nîngaamamûkîra, na nîngenda mandutîre indo ciao na mandutîre magongoona ma maketha mao ma mbere. Wana nîngetîkîra indo ciao cionthe irîa ntheru.” Ûguo nîguo Ngai-Mûnene augîte.

⁴¹ “Naamûruta kûrî ndûrîrî na mavûrûri marîa mûnyaganîrîtie na nîmûrete vamwe, nîngaamwamûkîra mûrî ta îgongoona rîrî na mûnungo mwaro wa kûngenia, nacio ndûrîrî nîikoona ûthingu wakwa.

⁴² Rîrîa ngaamûcokia vûrûrirî wa Isiraeli, vûrûri ûrîa nerîrîre methe menyu na mwîvîtwa atî nîngaamava, nîmûkaamenya atî nie nînie Ngai-Mûnene.

⁴³ Mûrî kûu nîmûkaaririkana mîthiîre îrîa mwarî nayo na maûndû monthe macûku marîa mwekire na mamûgwatirie mûgiro. Nîmûkethûûra nîûndû wa maûndû mau monthe macûku mwekire.

⁴⁴ Mue andû a Isiraeli nîmûkaamenya atî nie Ngai-Mûnene nînie mbîkîte maûndû mau monthe nîûndû wa rîîtwa rîakwa nie mwene. Ndikethîrwa nîmwîkîte kûringana na ûrîa mwagîrîrwe nîgwîkwa nîûndû wa wîvia wenyu, wana kana kûringana na maûndû menyu marîa macûku.” Ûguo nîguo Ngai-Mûnene augîte.

Mwaki mwena wa Îveti

⁴⁵ Ngai-Mûnene nîwambîrire atîrî,

⁴⁶ “Mûndû, taroria na mwena wa îveti. Vecana ûvoro wîgiî mwena wa îveti, na ûrathîre ûvoro ûkîregana na andû arîa matûûraga vûrûri wa Negebu.

⁴⁷ Îra Vûrûri wa Negebu ûthikîrîrie ûrîa Ngai-Mûnene augîte. Taroriani, nîngaakia mwaki kûrî we na nîûkaavîvia mîtî yonthe mîruru na mîtî yonthe mîûmû îrîa îrî kûrî we. Mwaki ûcio ndûkaavorua nî kîndû. Andû onthe kuuma mwena wa îveti kûthiî nginya mwena wa rûgûrû nîmakaavîvua nî ûrugarî wa guo.

⁴⁸ Andû onthe nîmakoona atî nie Ngai-Mûnene, nînie nîwakîtie na ndûkaavorua nî mûndû.”

⁴⁹ Nînaacokire ngiuga atîrî, “Ngai-Mûnene! Andû aya mararia ûvoro wakwa makiugaga: ‘Kinthî mûndû ûyû ndaragia maûndû na ngerekano?’ ”