Ezek 2 - ÎVUKU RÎA ÛVORO MWARO

Ngai nîwetire Ezekieli atuîke mûrathi

¹ Mûgambo ûcio waugire atîrî, “We mûndû, rûngama na magûrû maku na nîngûkwarîria.”

² Nînacokire ngîcûrwa nî Roho wa Ngai na akînûngamia. Ngîgua akîmbarîria,

³ na akîmbîra atîrî, “We mûndû, nîngûtûma kûrî andû a Isiraeli, andû mareganîte nanie. Nginya ûmûnthî andû acio nîmamvîtîrîtie wata ûrîa methe mao maamvîtîrie.

⁴ Andû acio nî aremi na nî aûmû ngoro. Kwoguo nîngûgûtûma ûthiî ûkamere ûrîa nie Ngai-Mûnene ngûmera.

⁵ Wana makûthikîrîria kana marege gûkûthikîrîria nîûndû o nîmareganîte nanie, nîmakaamenya atî mûrathi ararî gatagatî kao.

⁶ “Nwatî we mûndû ndûkametigîre kana wîtigîre mîario yao. Wana wathiûrûrûkîrua cong'e na mîgua, kana wîkarîre tûng'aurû, ndûkamakue nî mîario yao kana wîtigîre irethiû ciao, nîûndû o aremi.

⁷ We nîûkaamera ciugo ciakwa wana makûthikîrîria kana marege gûkûthikîrîria nîûndû andû acio nî aremi.

⁸ “Nwatî we mûndû thikîrîria ûrîa ngûkwîra, na ndûgatuîke mûremi ta andû acio. Vingûra kanyua ûrîe kîrîa ngûkûnengera.”

⁹ Rîrîa naroririe, nonire njara îtambarûkîtue na kûrî nie îrî na îvuku rîa gîkûnjo rîrî rîandîke.

¹⁰ Nîwacokire akîrîkûnjûra mbere yakwa, na ngîona rîandîkîtwe mîena yoîrî ciugo cia gûcakaya, kîrîro na mathîna.