Ezek 18 - ÎVUKU RÎA ÛVORO MWARO

Wa mûndû agaatuîrwa kûringana na ciîko ciake

¹ Ngai-Mûnene nîwambarîrie rîngî akîmbîra atîrî,

² “Mwîthagîrwa mûkiuga atîa rîrîa mûkûgweta nthimo îno îgûrû rîgiî vûrûri wa Isiraeli mûkiuga atî, ‘Methe ma ciana maarîre thavibu irî mbîthî namo magego ma ciana makîgîa ngirira?’

³ Ngai-Mûnene augîte atîrî, ‘Wata ûrîa nama ndûûraga mwoyo, mûtigaacoka kûgweta nthimo îno rîngî vûrûrirî wa Isiraeli.

⁴ Atîrî, mîoyo yonthe nî yakwa. Mwoyo wa îthe na wa mwana yoîrî nî yakwa. Mwoyo ûrîa ûvîtagia nîguo ûgaakua.’

⁵ “Ethîrwa mûndû nî mûthingu na nîarûmagîrîra watho na ageka ûrîa kwagîrîrîte,

⁶ wana ndarîcaga irio cia magongoona irîa irutîrîtwe mîvuanano ya andû a Isiraeli irîmarî kana amîgooca, kana aveenererie mûka wa mûndû ûrîa mariganîtie nake, kana amenyane kîîmwîrî na mûndûmûka îvinda rîake rîa mweri,

⁷ ethîrwa ndavinyagîrîria mûndû wana ûrîkû, nîacokagia kîndû kîrîa eranîrîte kûrî mûndû ûrîa marî thirî nake, wana ndacuunaga andû indo ciao, nwatî nîavecaga arîa avûtu irio na arîa matarî na nguo akamava cia gwîkîra.

⁸ Ethîrwa mûndû ûcio ndakovithanagia kîndû nîguo akaarîvwa kîndû kîu kîrî na umithio, nîerigagîrîria ndakavîtie, na atuithanagia ciira na kîvooto gatagatî ka mûndû ûrîa ûkovete na ûrîa ûkovithanîtie.

⁹ Ethîrwa mûndû ta ûcio nî avingagia irîra cia watho wakwa, na nîamenyagîrîra matuîro makwa ma ciira na nîekaga maûndû ma kîvooto, na ma mûndû ûcio nî mûthingu na nîagaatûûra mwoyo. Ûguo nîguo Ngai-Mûnene augîte.

¹⁰ “Angîthîrwa mûndû ûcio arî na mûvîcî ûcunanaga indo na nî aûraganaga, kana ageka maûndû mau

¹¹ marîa îthe atekaga nîûndû nî arîcaga irio irîa irutîtwe irî cia magongoona ma ngai cia mîvuanano irîmarî, nîacûkagia mûka wa mûndû ûrîa mariganîtie nake.

¹² Ke nîavinyagîrîria andû arîa athîni na arîa mavatarîte, nî mûcunani, ndarîvaga kîndû kîrîa meranîrîte atî nîakaarîva, nî avoyaga mîvuanano, na nîekaga maûndû marî mûgiro,

¹³ nîakovithanagia indo agetia umithio na agoca maciaro makîria, nî agatûûra mwoyo? Ndagaatûûra mwoyo. Nîekîte maûndû monthe marîa marî mûgiro na nîagaakua. Ke nîagaacokererwa nî nthakame yake ke mwene.

¹⁴ “Nwatî mûndû ûcio angîciara mwanake na oone mevia marîa îthe ekîte, na agetigîra na akîrega gwîka ta ûrîa îthe ekaga,

¹⁵ ke ndarîcaga irio irîa irutîrîtwe mîvuanano ya nyomba ya Isiraeli irîmarî kana amîgooca, ndacûkagia mûka wa mûndû ûrîa mariganîtie nake,

¹⁶ na ndavinyagîrîria mûndû. Ke ndocaga kîndû nîguo agaakûrîrwa, ndacuunanaga, nwatî nîagaagîra arîa avûtu irio ciake, na arîa matarî na nguo cia gwîkîra nî amavecaga.

¹⁷ Kethîrwa nîemenyagîrîra nîguo ndakaavîtîrie mûndû mûthîni, ndetagia umithio wa indo irîa akovithanîtie, na nîathîkagîra watho wakwa na akarûmîrîra irîra ciakwa; mûndû ta ûcio ndagaakua nîûndû wa mavîtia ma îthe. Na ma nî agaatûûra mwoyo.

¹⁸ Ûvoro wîgiî îthe, ke nîwavinyanagîrîria, nîwacunire mûrwang'ina kîndû, na nîwekire andû ao maûndû mataarî maro, kwoguo îthe nîagaakua nîûndû wa mevia make marîa ekire.

¹⁹ “Kûnarî ûguo mue mûragia atî, ‘Mûvîcî angîrega kûverithua nîûndû wa mavîtia ma îthe nîkî?’ Mûvîcî angîka maûndû marîa magîrîrîte na ma ma, na nîarûmagîrîra watho wakwa waro, na ma nîagaatûûra mwoyo.

²⁰ Roho ûrîa ûvîtagia nîguo ûgaakua. Mwana ndakaaverithua nîûndû wa mavîtia ma îthe na îthe ndakaaverithua nîûndû wa mavîtia ma mwana. Mûndû ûrîa mûthingu nîûgaacokererwa nî ûthingu wake ke mwene, na mûndû ûrîa mwaganu nî agacokererwa nî waganu wake ke mwene.

²¹ “Nwatî mûndû mwaganu angîtiga maûndû monthe macûku marîa ekîte na acoke kûrûmagîrîra mawatho makwa na ekage maûndû marîa magîrîrîte na ma ma, ndagaakua. Mûndû ûcio nî agaatûûra mwoyo.

²² Gûtirî ûndû wana ûmwe mûcûku ûrîa eekire ûkaaririkanwa. Nîûndû wa maûndû ma ûthingu marîa ekîte nîmagaatûma atûûre mwoyo.

²³ Mûreciria nwa ngenerere gîkuû Kîam mûndû mwîvia? Ûguo nîguo Ngai-Mûnene araûria? Naarî. Kinthî tîkava agarûrûke atige njîra îo atûûre mwoyo.

²⁴ “Nwatî mûndû mûthingu angîtiga ûthingu wake na acoke gwîka maûndû matarî ma kîvooto na acoke gwîka maûndû marî mûgiro ta marîa mekagwa nî mûndû ûrîa mwaganu, mûndû ûcio nwa atûûre mwoyo? Gûtirî ûndû wanarî ûmwe wa ciîko irîa cia ûthingu ûrîa ekîte ûkaaririkanwa, nîûndû maûndû macûku marîa matûmîte atuîka mwîvia na mevia marîa ekîte, nîmo magaatûma akue.

²⁵ “Kûnarî ûguo mugaga atîrî, ‘Njîra cia Ngai-Mûnene tî cia ma.’ Thikîrîriani rîu, mue andû a Isiraeli, anga njîra ciakwa tîcio cia ma? Anga njîra cienyu tîcio itarî cia ma?

²⁶ Rîrîa mûndû mûthingu agarûrûka na atiga ûthingu wake na agîka maûndû matarî ma kîvooto, nî agaakua nîûndû wa maûndû mau. Agaakua nîûndû wa maûndû mau matarî ma kîvooto ekîte.

²⁷ Wana rîngî, rîrîa mûndû mwaganu agarûrûka na agîtiga waganu wake ûrîa ekîte agacoka gwîka maûndû marîa magîrîrîte na ma ma, nîakaavonokia mwoyo wake.

²⁸ Ke nîecokerete na akagarûrûka kuuma kûrî maûndû marîa macûku eekîte. Na ma mûndû ûcio ndagaakua, nîagaatûûra mwoyo.

²⁹ Kûnarî ûguo nyomba ya Isiraeli yugaga atî, ‘Njîra cia Mwathani tî mbagîrîru.’ Mue nyomba ya Isiraeli, atî njîra ciakwa tîmbagîrîru? Anga njîra cienyu tîcio itarî mbagîrîru?

³⁰ “Kwoguo mue nyomba ya Isiraeli nie nîngaamûtuîra ciira, wa mûndû kûringana na njîra ciake, ûguo nîguo Mwathani Ngai augîte. Îrireni na mûgarûrûke mûtigane na maûndû mau menyu macûku mûreka na mûtikareke mevia menyu mamûcûkangia.

³¹ Tecanîriani mevia marîa monthe mûmbîtîrîtie, na mûgîe na ngoro njerû na mwoyo mûcerû. Mue nyomba ya Isiraeli, mûngîkua nîkî?

³² Nie ndikenagîra gûkua kwa mûndû wa wonthe, ûguo nîguo Ngai-Mûnene augîte. Kwoguo garûrûkani nîguo mûtûûre mwoyo.”