Ezek 17 - ÎVUKU RÎA ÛVORO MWARO

Ngerekano ya rwîgî na mûtî wa mûthavibu

¹ Ngai-Mûnene nîwambîrire atîrî,

² “Mûndû! Gwatithania ndaî na warîrie andû a Isiraeli na ngerekano,

³ na ûmere nie Ngai-Mûnene mbugîte atî kwarî na nderi nene mûno yarî na mathagu manene. Mathagu maruo maarî na mbûî nyîngî ndaca cia rangi mwanya mwanya. Nderi îo nîyagûrûkire na îkîthiî kîrîmarî Kîam Lebanoni rûkîgwa îgûrû rîa mûtarakwe.

⁴ Nîrwacokire rûgîtua îthangû rîrîa rîarî îgûrû mûno rîa mûtî ûcio na rûkîrîvira vûrûrirî wa andû arîa maarutaga wîra wa kûgûra na kwendia indo. Nîrwarigire îtûûrarî rîmwe rînene rîa vûrûri ûcio.

⁵ Rwîgî rûu nîrwacokire rûgîoca kamûmera kuuma vûrûrirî ûcio na rûgîkavanda mûtheturî mûnoru vakuvî na manjî ta mûtî ûmerete rûtere rwa manjî.

⁶ Mûmera ûcio nîwamerire na ûgîkûra ûgîtuîka mûthavibu wa mûthemba wa mûtî mûkuvî ûrîa ûtambaga. Mvûa ciaguo nîciakûrire cierekerete rwîgî rûu. Nayo mîri yaguo nîyatonyire na nthî ya mûmera ûcio. Naguo nîwatuîkire mûthavibu mûgima na ûkîruta mvûa na mathangû meengî.

⁷ “Nwatî kwarî na nderi yarî nene na yarî na mathagu manene na mbûî nyîngî. Kwoguo mûtî ûrîa wa mûthavibu ûrî wa vau warî nîwarorithirie mîri yaguo na kûrî nderi îo. Nîwacokire ûkîruta mvûa ûgîcierekeria na kûrî nderi îo nîguo îrwîtagîrîrie manjî.

⁸ Mûthavibu ûcio wavandîtwe mûtheturî mwaro rûtere rwa manjî nîguo ûkûre, ûrute mvûa, na ûciare maciaro na ûtuîke mûthavibu mwaro.

⁹ “Kwoguo nie Ngai-Mûnene nîraûria kana mûthavibu ûcio nîûgaakûra? Anga tîgûkûrwa ûgaakûrwa mîri yaguo na ûtemangwe maciaro maguo nîguo more na maûme, namo mathangû maguo marîa methî wanamo maûme? Gûtikaaûrua mûndû ûrî na vinya kana gîkundi Kîam andû eengî a gûûkûûra vamwe na mîri yaguo.

¹⁰ Mûtî ûcio nîmûvande, nwatî nîûgaakûra? Rîrîa rûkûngi rûrîa rumaga na mwena wa îrathîro rûkaavurutana na rûwîthîrîrie, kinthî tî kûma ûkaaûma? Ûkaaûma ûrî wa vau ûvandîtwe.”

Gûtaarîria ngerekano

¹¹ Ngai-Mûnene nîwacokire akîmbîra atîrî,

¹² “Rîu arîria andû acio aremi ûmaûrie kana nîmaicî ûrîa ngerekano îo yugîte. Meere atî mûthamaki wa Babuloni nîwaûkire Jerusalemu na agîoca mûthamaki wa Jerusalemu wa vamwe na atongoria ake na akîthiî nao Babuloni.

¹³ Nîwocire mûndû ûmwe wa mûciî wa mûthamaki wa Jerusalemu na akîthondeka kîrîkanîro nake na agîtûma evîte. Nîwarutire andû arîa marî njamba vûrûrirî na akîthiî nao,

¹⁴ nîguo ûthamaki ûcio ûthire vinya, na wathîkagîre kîrîkanîro Kîamo na mûthamaki wa Babuloni.

¹⁵ Nwatî mûthamaki wa Jerusalemu nîwareganire na mûthamaki wa Babuloni. Nîwatûmire aarîrîria a vûrûri wake makîthiî nginya Misiri nîguo mûthamaki wa Misiri amûve mbarathi na athigari a mbaara. Mûthamaki wa Jerusalemu nî akaavootana? Mûndû ûrîa wîkîte ûguo nwa avonoke nîûndû nî aunîte kîrîkanîro? Kinthî twa nginya averithue?”

¹⁶ Ngai-Mûnene augîte atîrî, “Wata ûrîa Nie ndûûraga mwoyo, nama mûthamaki ûcio agaakuîra Babuloni kûrîa mûthamaki ûrîa wamwîvîtithirie na akîmûtua mûthamaki atûûraga, nîûndû nî anyararîte muma ûrîa aanyuire na nîaunîte kîrîkanîro kîrîa maarûthire na mûthamaki wa Babuloni.

¹⁷ Mûthamaki wa Misiri na gîkundi gîake kînene Kîam athigari a mbaara ndakaamûtethia kûrûa rîrîa athigari a mbaara a Babuloni magaatuma rûthingo rûrî na vinya na mamûrigicîrie nîguo maûrage andû eengî.

¹⁸ Ke ndakaavonoka nîûndû nîwanyararire mwîvîtwa ûrîa eevîtire na akiuna kîrîkanîro kîrîa maarîkanîre na akîandîka agîkîra ûira.”

¹⁹ Kwoguo Ngai-Mûnene augîte atîrî, “Wata ûrîa nie ndûûraga mwoyo, nama nîngaamûverithia nîûndû wa kûnyarara mwîvîtwa ûrîa eevîtire na rîîtwa rîakwa na akiuna kîrîkanîro kîrîa twarîkanîre nake.

²⁰ Nîngaatega mûtego na nî akaanyitithua nîguo. Nîngaamûvira Babuloni na nîngaamûtuîra nîûndû wa kûrega gûtuîka mwîvokeku kûrî nie.

²¹ Athigari ake arîa njamba nîmakaaûragwa marî mbaararî. Nao arîa magaatigara marî mwoyo nîmakaanyaganîria mîenarî yonthe ya nthî, na nîmûkaamenya atî nie Ngai-Mûnene, nînie mbarîtie.”

Ngai-Mûnene nîwavecanire kîîrîgîrîro

²² Ngai-Mûnene augîte atîrî, “Nie mwene nîngoca kamûtî karîa karî îgûrû mûno mûthiiarî wa mûtî wa mûtarakwe na nîngaakavanda. Ngaatua karûvûa ka mûthiia ga tûrûvûa tûrîa twîthî tûrîa tûrî îgûrû viû twa mûtî ûcio. Nie mwene nîngaacoka nîkavande îgûrû kîrîmarî kîraca mûno.

²³ Ngaakavanda vandû îgûrû kîrîmarî kîrîa kîraca mûno gîa Isiraeli. Nîgagaakûra kagîe na mvûa, kagîe na maciaro na gatuîke mûtarakwe mwaro. Nyamû cia mîthemba yonthe nîigaatûûraga rungu rwa mwîgunyî wa guo, na iconi cionthe nîigaatuma ciomba ciacio mvûarî cia mûtarakwe ûcio.

²⁴ Nayo mîtî yonthe kûu vûrûrirî nîkaamenya atî nie nînie Ngai-Mûnene. Nîmvotaga gûtûma mîtî îrîa mîraca îtuîke mîkuvî na mîtî îrîa mîkuvî îtuîke mîraca. Nînyûmagia mîtî îrîa mîthî na îrîa mîûmû ngatûma îtuîke mîthî. Nie Ngai-Mûnene nînie mbugîte ûguo, na nîngeka guo.”