Ezek 16 - ÎVUKU RÎA ÛVORO MWARO

Îtûûra rîa Jerusalemu tî rîathîki

¹ Ngai-Mûnene nîwambîrire rîngî atîrî,

² “Mûndû, menyithia îtûûra rîa Jerusalemu maûndû marîa macûku rîkîte.

³ Wîre Jerusalemu Ngai-Mûnene augîte atî: aaciarîrwe vûrûrirî wa Kanaani. Îthe aarî Mûamori, nake ng'ina aarî Mûhiti.

⁴ Mûthenya ûrîa aaciarirwe, rûrîra rwaku rûtiatinua, na gûtirî mûndû wakûthambirie na manjî nîguo ûthere. Gûtirî mûndû wakûvakire cumbî kana akwova nguo cia kaana.

⁵ Gûtirî mûndû wakwîguîrîre ntha nîguo agwîke maûndû mau. Waikirue na kûu mûgûndarî mûthenya ûcio waciarirwe nîûndû warî mûmene.

⁶ “Rîrîa naavîtûkîrîre vakuvî nawe nînoonire ûkîgaragara nthakamerî yaku na ngiuga ûtûûre mwoyo.

⁷ Nînatûmire ûkûre ta mûtî ûrî mûgûndarî. Nîwakûrire, ûkîneneva na ûgîtuîka mwîrîtu mûthaka. Nîwaumire nyondo, ûkîgîa na njuîrî, nwatî warî njaga.

⁸ “Rîrîa navîtûkîrîre vakuvî nawe rîngî, nînoonire atî nama warî mwîrîtu mûkinyiu wa kûmbwa. Nînarutire nguo yakwa ya îgûrû ngîgûkunîka nîguo ûthithe njaga. Nîtwarîkanîre nawe atî nîtûkûvikania, nawe nîwatuîkire wakwa.” Ûguo nîguo Ngai-Mûnene arauga.

⁹ “Nînacokire ngîoca manjî na ngîkûthambia nthakame îrîa yarî mwîrîrî waku, ngîcoka ngîkûvaka maguta ma ndamaiyû mwîrî.

¹⁰ Nînagwîkîrire nguo îno ng'emie, ngîgwîkîra iratû magûrû cia rûûo rûrîa rwaro mûno ngîkwova gîtambaa Kîamro gîa kîongo na ngîgwîkîra nguo mbaro.

¹¹ Nînacokire ngîgwîkîra mathaga maro ma gûkûgemia, ngîgwîkîra mvang'iri njara, na mûkathî ngingo,

¹² na ngîgwîkîra gîcûvî îniûrû na mindo matû, na ngîgwîkîra ngovia mbaro mûno kîongo.

¹³ Ûguo nîguo wagemetue na thaavu na sîlûva. Wekagîra nguo irîa mbaro na ciagemetue waro. Warîcaga irio cia mûtu ûrîa mûvinyu mûno, na ûûkî na maguta. Nîwatuîkire mûthaka makîria na ûgîtûgîra nginya ûgîtuîka mûthamaki mûndûmûka.

¹⁴ Wagîre ngumo mavûrûrirî monthe nîûndû wa ûthaka waku nîûndû nînie naakûgemirie.” Ûguo nîguo Ngai-Mûnene arauga.

¹⁵ “Nîwevokire ûthaka waku, nayo ngumo yaku îgîtûma ûvûre ûmaraa. Mûndû wa wonthe waûkaga kûrî we nîwavûraga ûmaraa nake.

¹⁶ Nîwocire nguo imwe ciaku na ûkîgemia kûndû kûrîa warûthîte gwa kûvoera na ûkîvûrîra ûmaraa kuo. Ûndû ta ûcio ndwanoneka rîngî na ndûkooneka.

¹⁷ Wana nîwocire mathaga mamwe marîa nakûveere ma thaavu na sîlûva ûkîthondeka mîvuanano ya andû arûme na ûkîvûra ûmaraa nayo.

¹⁸ Wocire nguo ciaku irîa ciarî ng'emie irîa nakûveere na ûgîciîkîra mîvuananorî îo, na ûkîmîrutîra matega ma maguta makwa na ûbani wakwa.

¹⁹ Irio ciakwa irîa Nie nakûveere, cia mûtu ûrîa mûvinyu, maguta ma ndamaiyû na ûûkî, warutire mîvuanano îo irî îgongoona rîa mûtararûko ûrîa ûnungaga waro nîguo ûmîkenie.” Ûguo nîguo Ngai-Mûnene arauga.

²⁰ “Makîria ma ûguo, nîwacokire ûkînyita anake na erîtu aku, acio wanjiarîre na ûkîmaruta marî îgongoona kûrî mîvuanano îo nîguo marîwe mathire. Anga ûndû ûcio waku wa ûmaraa warî ûndû mûnini,

²¹ nîûndû nîwacokire ûkîûraga ciana ciakwa ûkîiruta irî îtega rîa kûvîvua kûrî mîvuanano?

²² Ûgîka maûndû mau maku macûku wana ûkîvûra ûmaraa, ndwaririkana wana vanini vîndî îrîa warî mûnini na wagaragaraga ûrî njaga nthakamerî yaku.”

Mûtûûrîre wa Jerusalemu ta mûmaraa

²³ Ngai-Mûnene augîte atîrî, “Ûûi, kaî ûrî na thîna-î, nîûndû vuva wa gwîka maûndû mau monthe ma waganu,

²⁴ nîwacokire ûgîtuma kûndû gwa kûgoocagîra, na kûndû gûtûgîru ivaarorî cionthe.

²⁵ Makathîkanorî ma njîra cionthe nîwetumire kûndû gûtûgîru na ûkîvûthîra ûthaka waku na njîra ya ûmaraa kûrî mûndû wa wonthe ûrîa wavîtûkaga, na njîra îo ûmaraa waku ûkîongerereka mûno.

²⁶ Nîwavûrire ûmaraa na andû a Misiri arîa mûriganîtie nao na makwîriragîria, ûmaraa waku nîwongererekire na ûgîtûma ndakare.

²⁷ “Kwoguo nînaûkîrîrie njara yakwa nîguo ngûverithie. Nînaanyivirie îgai rîaku na ngîkûrekereria kûrî nthû ciaku, erîtu a Afilisiti arîa maaconokire mûno nîûndû wa ciîko ciaku cia ûûra nthoni.

²⁸ “Nîwavûrire ûmaraa na andû a Asîria nîûndû ndweganîra; nîma nîwavûrire ûmaraa nao na ndweganîra.

²⁹ Ûmaraa waku waûtambirie nginya kûrî andû a vûrûri wa Babuloni, andû arîa marutaga wîra wa kûgûra na kwendia indo na ndweganîra nîo.”

³⁰ Ngai-Mûnene arauga atîrî, “We ûrî kîviti, nîwekire maûndû mau monthe ma ûmaraa ûtagûconoka.

³¹ Makathîkanorî ma njîra cionthe nîwetumîrîte kûndû gwa kûgoocagîra mîvuanano, na ivaarorî ûgatuma kûndû gûtûgîru. Ndwarûthaga ta mûmaraa nîûndû ndwetagia mbia.

³² Warî mûndûmûka mûmaramaru wathiîcaga na arûme engî vandû va kûthiî na mûrûmeguo.

³³ Arûme nîmavecaga maraa monthe indo, nwatî we nîwe wamavecaga. Wamavakaga makauma kûndû kuonthe nîguo ûrûthe ûmaraa nao.

³⁴ Kwoguo we ûrî îraa rîa mwanya nîûndû ndwekaga ta maraa marîa mengî. Gûtirî mûndû wakûringîrîrie. Ndwarîvagia arîa maaûkaga kûrî we, nwatî we nîwe wamarîvaga!”

Ngai nîwatuîrîre Jerusalemu

³⁵ We îraa rîrî, rîu thikîrîria ciugo cia Ngai-Mûnene!

³⁶ Ngai-Mûnene arauga atîrî, “Nîwerutire nguo na ûgîtigwa ûrî njaga. Nîwenenganîre kûrî arîa maakwendaga na ûkîgooca mîvuano îo yaku, na ûkîruta ciana ciaku irî magongoona kûrî yo.

³⁷ Kwoguo, nîngaaûngania anyanya aku onthe arîa wekenagia nao, arîa onthe mwanendana nao wana andû arîa ûthûrîte. Nîngaatûma magûkîrîre maumîte na mîena yonthe, na ngûrute nguo nîguo makwone ûrî njaga.

³⁸ Nîngaagûtuîra ciira ta ûrîa aka arîa macûkagia moviki mao matucagîrwa na arîa maûraganîte. Nîngaagûtuîra ciira wa kûragwa nîrî na marakara na nîrî na wîru.

³⁹ Nîngaakûnenganîra kûrî anyanya aku, na nîmakaatharia kûndû gwaku gwa kûgoocagîra na kûndû kûrîa gûtûgîru. Nîmagaakûruta nguo vamwe na mathaga na magûtige ûrî njaga.

⁴⁰ “Nîmakaaunjuga kîrîndî na gîkûrive na mathiga, na nîmagaagûtinangia tûcunjî na mviû.

⁴¹ Nîmagaacoka mavîvie nyomba ciaku, na makûverithie aka eengî makîonaga, na nîngaatûma ûtige kûvûra ûmaraa na ûtige kûrîva andû nîguo mavûre ûmaraa nawe rîngî.

⁴² Ûguo nîguo ngaavoreria marakara makwa nawe, na nthirie wîru wakwa kûrî we. Nîngaacoka ngire ki na ndigaacoka kûrakara rîngî.

⁴³ We ndûraririkana maûndû marîa naagwîkire vîndî îrîa warî mwîthî, nwatî nîûndakarîtie na maûndû monthe marîa wîkîte. Kwoguo nie nîngûkûrîvia maûndû mau wekire. Na kinthî ndwongerere maûndû ma waga nthoni îgûrû rîa marîa wekire marî mûgiro?” Ûguo nîguo Ngai-Mûnene arauga.

Mwîrîtu atutagia ng'ina

⁴⁴ “Na ma mûndû ûrîa ûvûthagîra nthimo nîakaavûthîra îno nîûndû waku na auge atîrî, ‘Mwîrîtu atutagia ng'ina.’

⁴⁵ We ûrî mwîrîtu wa mûndûmûka ûrîa ûnyararîte mûrûme na ciana ciake. Na ma wî mwarwang'ina na erîtu arîa manyararîte arûme ao wana ciana ciao. Nyûkwe aarî Mûhiti nake aguo aarî Mûamori.

⁴⁶ “Mwarwanyûkwe ûrîa mûkûrû nî Samaria, na aatûûraga mwena waku wa rûgûrû marî na erîtu ake. Nake mwarwanyûkwe ûrîa mûnini nî Sodomu, na aatûûraga mwena waku wa îveti marî na erîtu ake.

⁴⁷ Kûnarî ûguo we ndwaneganîra ûrûmîrîra mîtugo yao kana wîka ta ûrîa o meekaga maûndû marî na magigi. Takwa ûndû ûcio ûtaarî mûnene, we nîwatuîkire mûcûku mûno na ûkîmakîra onthe mîthiîrerî yaku.”

⁴⁸ Ngai-Mûnene augîte atîrî, “Wata ûrîa nie ndûûraga mwoyo, mwarwanyûkwe Sodomu na erîtu ake matianeka maûndû macûku ta marîa we na erîtu aku mwekire.

⁴⁹ Îvîtia rîa mwarwanyûkwe Sodomu nî atî, ke na erîtu ake maarî etîi, maarî na irio cia kwîgana na nîmeganîrîte, nwatî matiatethagia andû arîa maarî athîni na avatari.

⁵⁰ Maarî a mwîyambo na nîmeekaga maûndû macûku marî mbere yakwa, kwoguo nînaamathiririe wata ûrîa noonire kwagîrîrîte.

⁵¹ “Samaria matievia wanarî nuthu ya mevia marîa mwevirie. Mue nîmwekire maûndû macûku mûno kûmakîra. Ûngîringithania maûndû maku marîa macûku na ma aa mwarwanyûkwe, mao tî manene.

⁵² Rîu we nîûtûûra ûconokete nîûndû nîûtûmîte aa mwarwanyûkwe monekane ta matavîtîtie nîûndû nîwekire maûndû macûku mûno kûmakîra nao makîonekana marî athingu gûgûkîra. Kwoguo nîûconoka nîûndû nîûtûmîte aa mwarwanyûkwe monekane matarî na mavîtia.”

Sodomu na Gomora nîigaatumwa rîngî

⁵³ Ngai-Mûnene erîte Jerusalemu atîrî, “Nîngaatûma Sodomu na Samaria, wa vamwe na aarî ao magîe na maûndû maro ta marîa maarî namo mbere. Wa nawe nîngaatûma maûndû maku matuîke maro gatagatîrî kao,

⁵⁴ nîguo ûgaaconoka nî maûndû marîa we mwene wekire na ûcambe nîûndû nîwathiîre kûmaûmîrîria.

⁵⁵ Aa mwarwanyûkwe Sodomu na erîtu ake, Samaria na erîtu ake nîmagaacoka mekare wata ûrîa meekariî mbere. Wanawe na erîtu aku nîmûgekara wata ûrîa mwekariî mbere.

⁵⁶ Nîwairire mwarwanyûkwe Sodomu nîûndû wa mwîtîîo waku.

⁵⁷ Kinthî ndwekire ûguo mbere ya maûndû maku marîa macûku mamenyeka? Rîu we ûtuîkîte wata Sodomu, ûgatuîka kîndû gîa kûthekagîrîrwa nî erîtu a Edomu na arîa mariganîtie nao, na erîtu a Filisiti na arîa mamathiûrûrûkîrîtie na makûmenete.

⁵⁸ Nwanginya ûgwate kîrîa gîkwagîrîrîte nîûndû wa maûndû maku marîa macûku na marî mûgiro marîa wîkîte.” Ûguo nîguo nie Ngai-Mûnene mbugîte.

Kîrîkanîro gîa gûtûûra tene na tene

⁵⁹ Tathikîrîria, Ngai-Mûnene araugîte atîrî, “Ngaagwîka wata ûrîa we wekire nîûndû wanyararire mîvîtwa yaku na ûkîthûkia kîrîkanîro.

⁶⁰ Kûnarî ûguo, nîngaaririkana kîrîkanîro kîrîa twarîkanîre nawe rîrîa warî mwîthî, na nîngaarûtha kîrîkanîro nawe gîa gûtûûra tene na tene.

⁶¹ Nîûgaacoka ûririkane njîra ciaku na nîûgaaconoka rîrîa ngooca aa mwarwanyûkwe ûrîa mûkûrû na ûrîa mûnini na ngûnengere o marî ta erîtu aku, nwatî ndigeeka ûguo nîûndû wa kîrîkanîro gîetû nawe.

⁶² Nîngaarûtha kîrîkanîro gîakwa nawe na nîûkaamenya atî nie nînie Ngai-Mûnene.

⁶³ Nîngaakûrekera mavîtia monthe marîa waneka. Nawe waririkana maûndû monthe marîa waneka nîûkaamaka, na ndûkaaria rîngî nî gîconoko.” Nie Ngai-Mûnene nînie mbugîte ûguo.