Ezek 14 - ÎVUKU RÎA ÛVORO MWARO

Ngai nîwamenererie kûgooca mîvuanano

¹ Vîndî îmwe atongoria a Isiraeli nîmaaûkire kûrî nie kûria ûtaaro.

² Nake Ngai-Mûnene nîwambîrire atîrî,

³ “Mûndû, andû aya nîmetîkîtie mîvuanano, na mîvuanano îo nîîratûma mevie. Nie nwambîtîkîre mambûrie ûtaaro wa wonthe?

⁴ “Rîu marîrie ûmere nie, Ngai mbugîte atî, mûndû wa wonthe wa nyomba ya Isiraeli ûkeerirîria mîvuanano yake ya kûvowa, na etîkîrie mîvuanano îo îmûvîtithie, na acoke athiî kûrî mûrathi kûvoya ûtaaro, nîngaamûcokeria kûringana na wîngî wa mîvuanano îo yake.

⁵ Ngeka ûguo nîguo nîîgwatîre ngoro cia andû a nyomba ya Isiraeli nîûndû onthe nîmaandiganîrie makîthiî kûgooca mîvuanano îo yao.

⁶ “Kwoguo îra andû a Isiraeli atî, Ngai-Mûnene augîte: Îrireni na mûgarûrûke mûtigane na mîvuanano îo yenyu, na mûtige maûndû marîa macûku mwîkaga.

⁷ “Mûndû wa wonthe wa nyomba ya Isiraeli, kana ageni arîa matûûranagia na Aisiraeli angîndiganîria na ambîrîrie kûgooca mîvuanano na îtûme evie, na mûndû ûcio athiî kûrî mûrathi akamûrie ûtaaro, nie Ngai-Mûnene nîngamûcokeria.

⁸ Nîngaaregana nake na ndûme atuîke ûndû wa kwaragua na atuîke rûûri kûrî andû. Nîngaacoka nîmûrute gatagatî ka andû akwa; namue nîmûkaamenya atî, nie nînie Ngai-Mûnene.

⁹ “Mûrathi angîkaveenua na arie ûndû, nie Ngai-Mûnene nînie ngethîrwa nîmûveenetie. Nîngaakûnjûra njara yakwa nîmûrute kûrî andû akwa a Isiraeli.

¹⁰ Mûrathi ûcio wa vamwe na mûndû ûcio ûrathiîte kûria ûtaaro kûrî mûrathi, onthe ngaamaverithia ûndû ûmwe.

¹¹ Nao andû a Isiraeli matigaacoka kûndiganîria rîngî, kana megwatia mûgiro na maûndû macûku marîa mekaga, nwatî magaatuîka andû akwa, nanie nduîke Ngai wao. Nînie Ngai-Mûnene nauga ûguo.”

Noa, Danieli na Ayubu

¹² Ngai-Mûnene nîwambîrire atîrî,

¹³ “Mûndû, vûrûri wa wonthe ûngîvia nîûndû wa kûrega gûtuîka evokeku kûrî nie, nîngaaûverithia. Nîngaacûkangia makûmbî mao ma irio na ndûme kûgîe na yûra. Nîngaatûma andû a vûrûri ûcio makue, wana nyamû ciakuo.

¹⁴ Kethîrwa arûme acio athatû, Nuhu, Danieli na Ayubu matûûraga vûrûri ûcio, mîoyo yao nwayo îngîkaavonokua nîûndû wa ûthingu wao.” Ûguo nîguo Ngai-Mûnene augîte.

¹⁵ “Nîngîtûma nyamû cia kîthaka ivîtûkîrîre vûrûri ûcio na ciûrage andû viû na ûtigwe ûtarî mûndû, na gûtuîke gûtirî mûndû ûngîvîtûkîrîra kuo nîûndû wa nyamû.

¹⁶ Arûme acio athatû mangîthîrwa matûûraga vûrûrirî ûcio, nie Ngai-Mûnene nevîta nauga matingîvonokia ciana ciao cia erîtu na cia anake, nwatî o nwa mavonoke na vûrûri ûtigwe ûrî werû.

¹⁷ “Nwa ndûme kûgîe mbaara vûrûrirî, na kûgîe indo njûku cia mbaara ithirie andû wana nyamû cia kîthaka.

¹⁸ Andû acio athatû; Noa, Danieli na Ayubu mangîthîrwa marî vûrûrirî ûcio, nie Ngai-Mûnene nevîta nauga, matingîvonokia ciana ciao cia anake na erîtu. Mangîvonokia mîoyo yao tu.

¹⁹ “Narîo nîngîtûma mûrimû mûcûku kûu vûrûrirî nîrî na marakara, nîngatûma andû na nyamû ikue,

²⁰ wana ethîrwa Noa, Danieli na Ayubu marî kuo, matingîvonokia erîtu kana anake ao. Nwatî nîûndû wa ûthingu wao, o nwa mavonoke.”

²¹ Ngai-Mûnene arauga atîrî, “Nîngûverithia Jerusalemu na maûndû mana: Mbaara, yûra, nyamû mbaganu cia kîthakarî na mîrimû mîcûku nîguo andû mathire, na nyamû ithire.

²² Kûnarî ûguo, kûrî na andû makaavonoka na mavonokie erîtu na anake ao. Andû acio mangîgaaûka kûrî we, ûkaamaroria nîguo wone mîtugo na mîthiîre yao mîcûku; mîtugo îo nîîkamwonia atî îverithia rîrîa ngaverithia Jerusalemu nîrîagîrîru.

²³ Mîtugo yao na mîthiîre yao nîîkamûmenyithia atî mûthiro ûrîa naretithîrie îtûûra rîu warî na gîtûmi.” Nînie Ngai-Mûnene nauga ûguo.