Ezek 13 - ÎVUKU RÎA ÛVORO MWARO

Arathi arûme a maveeni nîmaamenererue

¹ Ngai-Mûnene nîwambîrire atîrî,

² “Mûndû, rathîra arathi a Isiraeli na ûregane na ûrathi wao ûrîa marathaga kûringana na meciria mao. Meere mathikîrîrie kiugo Kîam Ngai-Mûnene.”

³ Ngai-Mûnene augîte atîrî, “Mue arathi aya aritu, kaî mûrî na thîna-î: mûrûmagîrîra meciria menyu na gûtirî kîndû mwonete.

⁴ Mue andû a Isiraeli, arathi enyu mekariî ta mbwe irî kûndû kwomomokangu.

⁵ Matigitagîra kûrîa nthingo ciatûkangîte, kana matuma nthingo cia kûgitîra andû a Isiraeli kuuma kûrî mbaara mûthenya wa Ngai-Mûnene wakinya.

⁶ Cioneki ciao nî cia mana na maûndû marîa marathaga nî ma maveeni. Maugaga nî maria vandûrî vakwa, nwatî nie ndimatûmîte, na atî nîmerîgagîrîra nîmavingîrie maûndû mau.

⁷ Mûtirona cioneki icio cienyu tî cia ma, na ûrathi ûcio wenyu nîwa maveeni. Mugaga atî nî Ngai-Mûnene ugîte, nwatî nie ndiarîtie!”

⁸ Kwoguo Ngai-Mûnene amerîte atîrî, “Nîûndû cioneki cienyu tî cia ma na nîmwarîtie maûndû ma maveeni, nie nîndeganîte namue.

⁹ Nîngaaverithia arathi arîa monaga cioneki itarî cia ma na marathaga maûndû ma maveeni. Matikethîrwa marî a gîkundi Kîam andû akwa vîndî îrîa makagomana gûtua ciira, kana mûtaranîrue na andû a Isiraeli. Matigaatonya vûrûrirî wa Isiraeli, na nîmakaamenya atî, nie nînie Ngai-Mûnene.

¹⁰ “Arathi acio nîmavîtithîtie andû akwa makîmeeraga atî kûrî na thayû wa rîrîa gûtarî thayû. Andû akwa matumîte rûthingo na mathiga matarî manyitanu nao arathi makarûvaka rangi ûyû mûcerû.

¹¹ Îra arathi acio mavakaga rûthingo rangi mûcerû atî nîrûkaurîrwa nî mbura nene ya mbembe, na rûringwe nî rûkûngi rûnene na nî rûkaagwa.

¹² Rîrîa rûthingo rûkaagwa, andû onthe nîmakaamûria vata wa kûvaka rangi mûcerû warî ûrî kû?”

¹³ Kwoguo Ngai-Mûnene augîte atîrî, “Nîngaarekereria rûkûngi rûnene na mbura ya mbembe nîrî na marakara icûkangie rûthingo rûu.

¹⁴ Nîngoomomora viû rûthingo rûu mwavakire rangi mûcerû, nîguo mathiga ma ruo ma mûcingi matigwe marî ûtherirî. Rûthingo rûu rwagwa, nîrûkamûraga muonthe, na andû onthe nîmakaamenya atî nie, nînie Ngai-Mûnene.

¹⁵ “Ûguo nîguo ngaathiria marakara makwa na rûthingo rûu, na kûrî arathi arîa maarûvakire rangi mûcerû. Nîngaacoka nîmwîre atî rûthingo nîrûgwîu wa vamwe na andû arîa maarûvakire rangi mûcerû,

¹⁶ na arathi a Isiraeli arîa moonaga kîoneki atî Jerusalemu kûrî na thayû na gûtiarî na thayû.” Nie Ngai-Mûnene nînie mbugîte ûguo.

Arathi aka a maveeni nîmaamenererue

¹⁷ “Nawe mûndû, taroria aka a andû enyu arîa marathaga maûndû marîa meciragia o ene. Menereria arathi acio,

¹⁸ na ûmere Ngai-Mûnene augîte atî, ‘Mûrî na thîna, mue aka arîa mûtumaga ithitû cia kwîyova njara nî andû onthe na itambaa cia andû a mîthemba yonthe, araca wana arîa akuvî cia gwîkunîka ciongo nîguo mûvote kûnyitithia mîoyo ya andû. Anga nîkûvîta mûvîtaga mîoyo ya andû akwa nîguo mwîvonokie mue ene?

¹⁹ Mue nîmûmbagithîtie gîtîîo mbere ya andû akwa nîûndû wa kûvewa îvaki rîa cairi ya ngundi na tûirio tûnini. Nîmûragithîtie andû arîa matagîrîrwe nî kûragwa na mûkavonokia andû arîa matagîrîrwe nî gûtûûra mwoyo na njîra ya kûveenia andû akwa nao magetîkia maveeni menyu.’ ”

²⁰ Kwoguo Ngai-Mûnene augîte atîrî, “Nîndeganîte na ithitû icio mwîkagîra andû nîguo mûmagwatithie. Nîngûitucanga ciume njararî cienyu na ndekererie mîoyo îrîa mûranyitithîtie îgûrûke ta iconi.

²¹ Wana nîngatembûranga itambaa cia gwîkunîkîra, na mvonokie andû akwa kuuma njararî cienyu na matigacoka gûtuîka ta nyamû cia kûguîmwa nîmue rîngî na nîmûkaamenya atî, nie nînie Ngai-Mûnene.

²² “Maveeni menyu nîmathirîtie andû arîa athingu vinya, na ndiendaga kûmathiria vinya. Nîmwîkîrîte andû arîa aganu vinya nîguo matigatige gwîka maûndû ma waganu mavonokie mîoyo yao.

²³ Kwoguo, mue mûtigaacoka kwona cioneki icio cia maveeni rîngî kana mûragûria. Nîngaavonokia andû akwa kuuma kûrî mue, na nîmûkaamenya atî, nie nînie Ngai-Mûnene.”