Ezek 12 - ÎVUKU RÎA ÛVORO MWARO

Mûrathi nîwathiîre kwîthitha

¹ Ngai-Mûnene nîwambîrire atîrî,

² “Mûndû, we ûtûûranagia na andû aremi. Marî na metho ma kwona nwatî mationaga, marî na matû ma kwîgua nwatî matiîgucaga,

³ nîûndû nî aremi. Kwoguo mûndû, varîria mîrigo yaku ûthiî îthamîriorî na ûthiî mûthenya magîkwonaga, ûrîre kûndû kwîngî. Nwakwîthîrwa magataûkîrwa wana ethîrwa nî andû aremi.

⁴ Ûkaaruta mûrigo waku ûthiî îthamîriorî mûthenya makîonaga. Na ûkaathiî kîvwaî magîkwonaga ta ûrîa andû arîa mathiîcaga îthamîriorî mekaga.

⁵ Tûrîkia îrima rûthingorî na umîrîre vo na mîrigo yaku magîkwonaga.

⁶ Oca mûrigo waku ûwigîrîre Kîamnde wa makûroretie na ûthiî kûrî na nduma. Îîkunîke ûthiû nîguo ndûkoone kûrîa ûthiîte nîûndû nîngûtuîte rûûri kûrî andû a Isiraeli.”

⁷ Kwoguo nînekire wata ûrîa naathirwe. Nînarutire mûrigo wakwa kûrî mûthenya na ngîwovania ta mûndû ûthiîte îthamîriorî. Kîvwaî kîu nînatûrîkirie îrima rûthingorî na njara ciakwa. Na gwatuka nînaumîrîre îrimarî rîu nguuîte mûrigo wakwa na Kîamnde mandoretie na ngîthiî.

⁸ Kîraûko Kîam mûthenya ûcio wîngî Ngai-Mûnene nîwambarîrie

⁹ na akîmbûria atîrî, “Mûndû, anga andû acio aremi a nyomba ya Isiraeli matinakûria ûreka ûguo nîkî?

¹⁰ Meere Ngai-Mûnene augîte atî, kîoneki gîkî kîgiî atongoria a Jerusalemu na andû onthe a Isiraeli arîa matûûraga kuo.

¹¹ Meere we ûrî rûûri kûrî o, na ûguo weka nîguo mageekwa. Nîmakaanyitwa na mavirwe îthamîriorî.

¹² Mûtongoria ûrîa ûrî gatagatî kao nîagaakuua mûrigo wake kûrî na nduma, na aumîrîre îrimarî rîrîa aatûrîkirie rûthingorî na athiî. Nîagaakunîka ûthiû wake nîguo ndakoone vûrûri kûrîa athiîte.

¹³ Nîngaakûnjûra neti ta mûtego nîguo agwatue nîyo na nîngaamûvira Babuloni vûrûrirî wa Akalidei. Kûnarî ûguo ndakaawona, wana ethîrwa nîagaakuîrîra kuo.

¹⁴ Arûmîrîri ake arîa mamûtaaraga, na athigari ake onthe a mbaara nîngaamanyaganîria mîenarî yonthe, na nîngaruta rûviû nîmarûmîrîrie.

¹⁵ “Rîrîa ngaamanyagania ndûrîrîrî ciîngî na mavûrûrirî ma kûraca, nîmakaamenya atî nie nînie Ngai-Mûnene.

¹⁶ Nwatî nîngaatûma andû anini mavonoke kuuma mbaararî, kuuma kûrî yûra, na kuuma kûrî mîrimû. Nao nîmakeraga andû a mavûrûri kûrîa makeethîrwa marî, maûndû macûku marîa maneka na nîmakaamenya atî nie nînie Ngai-Mûnene.”

Rûûri rwa mûrathi watetemaga

¹⁷ Nînaakinyîrîrwe nî ndûmîrîri ya Ngai-Mûnene,

¹⁸ ngîrwa atîrî, “Mûndû, rîa irio na ûnyue manjî maku ûgîtetemaga nî guoya.

¹⁹ Îra andû a vûrûri ûyû ndûmîrîri ya Ngai-Mûnene îgiî andû arîa matûûraga Jerusalemu vûrûrirî wa Isiraeli atî, makaarîa irio magîtetemaga na makaanyua manjî makinainaga. Vûrûri wao ndûkethîrwa na kîndû nîûndû andû onthe arîa matûûraga kuo nî aremi.

²⁰ Matûûra marîa marî na andû magaatigwa marî manangîku na vûrûri ûtuîke werû. Namue nîmûgaacoka mûmenye atî, nie nînie Ngai-Mûnene.”

Nthimo îrî îgweta na ndûmîrîri îtarî îgweta

²¹ Ngai-Mûnene nîwambîrire atîrî,

²² “Mûndû, nî nthimo îrîkû îo andû a Isiraeli maragia ûvoro wayo atî, ‘Mîthenya yûkaga na îkavîtûka nwatî cioneki itivingaga?’

²³ Rîu thiî ûmere ûrîa nie Ngai-Mûnene mbugîte atî, matigûcoka kûvûthîra nthimo îo rîngî gûkû vûrûrirî wa Isiraeli. Nwatî meere kavinda karî vakuvî rîrîa ûrathi wonthe ûkaavinga!

²⁴ “Gatagatîrî ka andû a Isiraeli gûtigaacoka kûgîa na ûrathi wa maveeni rîngî kana cioneki cia maveeni.

²⁵ Nwatî nie Ngai-Mûnene nîngaaragia na ûndû ûrîa naria nîûkaavingua ûtagwîkarîrîria. Kavinda ga ûtûûro wenyu, mue aremi a Isiraeli, ngaragia ûndû na ûgekîka. Nie Ngai-Mûnene nînie mbugîte ûguo.”

²⁶ Ngai-Mûnene nîwambîrire atîrî,

²⁷ “Mûndû, taroria andû a Isiraeli maugaga atî cioneki ciaku ciîgiî îvinda rîa tene, na ûrathaga maûndû marî kûraca mûno!

²⁸ Kwoguo meere nie Ngai-Mûnene, mbugîte atî ciugo ciakwa cionthe gûtirî gîgeekarîrîria rîngî. Ûrîa mbarîtie nwanginya wîkîkage. Ûguo nîguo nie Ngai-Mûnene mbugîte!”