Ezek 11 - ÎVUKU RÎA ÛVORO MWARO

Jerusalemu nîyatuîrîrwe

¹ Roho wa Ngai nîwanguire na akîmvira kîvingorî Kîam hekarû Kîam mwena wa îrathîro. Vau kîvingorî noonire athuuri mîrongo îîrî na atano. Gatagatîrî kao kwarî Jaazania mûvîcî wa Azuri na Pelatia mûvîcî wa Benaia, atongoria a andû a Isiraeli.

² Ngai-Mûnene nîwambîrire atîrî, “Mûndû, aya nîo andû arîa mavangaga maûndû macûku na mavecanaga kîrîra gîcûku îtûûrarî rîîrî.

³ Maugaga atî, ‘Kavinda ga gûtuma nyomba tîgakinyu; îtûûra rîîrî nîta nyûngû ya kûruga, natue nîta tue nyama.’

⁴ Kwoguo we mûndû, marathîre rîu ûndû ûreganîte nao.”

⁵ Nînacokire ngîcûrwa nî Roho wa Ngai-Mûnene, na akîmbîra ngeere andû a Isiraeli Ngai-Mûnene augîte atîrî, “Ûguo nîguo mugaga mue nyomba ya Isiraeli, nîûndû nîmbicî meciria menyu.

⁶ Nîmûragîte andû eengî mûno îtûûrarî na njîra cionthe ciîcûrîte ciimba.

⁷ “Kwoguo, nie Ngai-Mûnene mbugîte atî, ciimba cia andû arîa mûragîte na mûkamaikia na kûu, andû arîa mûragîte nîo nyama, narîo îtûûra rîîrî nîrîo nyûngû ya kûruga, nwatî nîngûmûruta kuo.

⁸ Nîmwîtigîrîte mbaara; nîngaarete andû mamûtharîkîre.

⁹ Nîngaamûruta îtûûrarî na nîmûnenganîre kûrî andû ageni na nîngaamûtuîra.

¹⁰ Ngaamûtuîrîra kûragwa na mûragwe mûrî mûvakarî wa Isiraeli, na nîmûkaamenya atî nînie Ngai-Mûnene.

¹¹ Îtûûra rîa Jerusalemu rîtigaatuîka ta nyûngû rîngî, kana mue mûtuîke ta nyama ndarî ya yo. Ngaamûtuîra ciira mûrî vûrûrirî wa Isiraeli.

¹² Nîmûkaamenya atî nie nînie Ngai-Mûnene ûrîa mwaregire kûrûmîrîra mawatho make kana mûvingia irîra ciake, nwatî mwekire kûringana na irîra cia ndûrîrî irîa imûthiûrûrûkîrîtie.”

¹³ Rîrîa naarathaga, Pelatia mûvîcî wa Benaia nîwakwire. Nînaacokire ngîturumithia ûthiû wakwa nthî na ngîrîra na mûgambo mûnene ngiugaga atîrî, “Ûûi Ngai-Mûnene! Nîkwa ûkûthiria andû onthe a Isiraeli?”

Kîranîro kîa Ngai kûrî andû arîa maarî îthamîriorî

¹⁴ Ngai-Mûnene nîwambîrire atîrî,

¹⁵ “Mûndû, aa mûrwanyûkwe, andû enyu, andû arîa mûrî îthamîriorî nao na andû onthe a nyomba ya Isiraeli nîmararia ûvoro waku. Marauga atî, ‘Andû arîa marî îthamîriorî marî kûraca na Ngai-Mûnene. Aatûveere vûrûri ûyû ûtuîke wetû.’

¹⁶ “Kwoguo îra andû arîa marî îthamîriorî atî nie Ngai-Mûnene, nînie naamavirire kûndû kûraca na ngîmanyaganîria mavûrûrirî mengî. Kûnarî ûguo, kavindarî gaka nîmbîthîrwa nîrî nao mavûrûrirî monthe kûrîa maathiîre.

¹⁷ “Kwoguo meere Ngai-Mûnene augîte nîngaamaûngania nîmarute mavûrûrirî marîa naamanyaganîrie, na nîngaamacokia vûrûrirî wa Isiraeli.

¹⁸ Rîrîa magaacoka vûrûrirî ûcio, nîmakaaruta indo cionthe irîa menete na mîvuanano yonthe kuuma kuo.

¹⁹ Nîngaamûva ngoro njerû na roho mûcerû. Nîngaamûthengutîria ngoro îrîa nyûmû ta îthiga na nîmûve ngoro mbathîki.

²⁰ Nîmûgaacoka kûrûmîrîra mawatho makwa na mwathîkagîre irîra ciakwa. Nanie nîngaatuîka Ngai wao, nao nîmagaatuîka andû akwa.

²¹ Nwatî andû arîa ngoro ciao irûmagîrîra indo irîa njûku na kûvoya mîvuanano, nîngaamaverithia kûringana na maûndû mau macûku mekîte. Nie Ngai-Mûnene nînie mbugîte ûguo.”

Riiri wa Ngai nîwaumire Jerusalemu

²² Akerubi nîmaambararirie mathagu nîguo maûmbûke wa vamwe na nthugû irîa ciarî mwena wao. Na riiri wa Ngai wa Isiraeli warî îgûrû rîao.

²³ Naguo riiri ûcio wa Ngai-Mûnene nîwaunûkirie na ûkiuma kûu îtûûrarî na ûkîthiî ûkîrûngama kîrîmarî kîrîa kîrî mwena wa îrathîro wa îtûûra.

²⁴ Na njîra ya kîoneki Roho wa Ngai nîwambocire akîmvira îthamîriorî vûrûri wa Akalidei, na kîoneki kîrîa naarî nakîo gîkîthira.

²⁵ Nînacokire ngîra andû arîa maarî îthamîriorî maûndû monthe marîa Ngai-Mûnene aamonetie.