Esita 9 - ÎVUKU RÎA ÛVORO MWARO

Ayahudi nîmaaûragire nthû ciao

¹ Mûthenya wa îkûmi na îthatû mweri wa Adari na nîguo mweri wa îkûmi na îîrî nîwakinyire. Mûthenya ûcio nîguo warî wa kûvingia ûrîa mûthamaki aathanîte, mûthenya ûrîa nthû cia Ayahudi cievokete nîikaamavoota. Nwatî Ayahudi nîo maavootanire.

² Ayahudi nîmaagomanire matûûrarî monthe ma icunjî cia vûrûri ûrîa wathagwa nî mûthamaki Ahasuerusi na nîmeevarîrie kûtharîkîra mûndû wa wonthe ûngîageragia kûmeka ûndû mûcûku. Andû onthe nîmaametigagîra kwoguo gûtirî mûndû ûngîametirîrie.

³ Atongoria onthe a mavûrûri, arîrîria a vûrûri, anene na andû a kwa mûthamaki nîmatethagîrîria Ayahudi nîûndû onthe nîmegucaga guoya nî Moridekai.

⁴ Moridekai aarî mûndû mûnene mûno mûciî kwa mûthamaki na ngumo yake nîyatambîte matûûrarî monthe na ûvoti wake nîwongerekaga.

⁵ Kwoguo Ayahudi nîmaatharîkîre nthû ciao na mviû na makîmaûraga onthe. Nîmaamekire wa ûrîa mangîendire kûmeka.

⁶ Ayahudi nîmaaûragire andû magana matano îtûûrarî rînene rîa Susa.

⁷ Wana nîmaaûragîre Parishandatha, Dalifoni, Asipatha,

⁸ Poratha, Adalia, Aridatha,

⁹ Porimashata, Arisai, Aridai na Vaizatha.

¹⁰ Nîmaûragire avîcî îkûmi a Hamani mûvîcî wa Hamedatha, nthû ya Ayahudi nwatî gûtirî kîndû wanarî kîmwe maatavire.

¹¹ Mûthenya wa ûcio, mûthamaki nîwerirwe mwîgana wa andû arîa maûragîtwe Susa.

¹² Mûthamaki Ahasuerusi nîwerire mûka Esita atîrî, “Îtûûrarî rîa Susa rîonga, Ayahudi nîmaûragîte andû magana matano vamwe na avîcî îkûmi a Hamani. Ûreciria maûragîte andû egana icunjîrî icio ciîngî! Ûrenda atîa rîu? Ûrîa wonthe ûrenda gwîkwe nîgûgwîkwa.”

¹³ Nake Esita nîwacokirie atîrî, “Ethîrwa nî kwenda gwaku mûthamaki, tiga Ayahudi arîa marî Susa mageka rûciû ûrîa maretîkîrîtue meke, na macoke macurie mîîrî ya avîcî a Hamani mûtîrî îgûrû.”

¹⁴ Kwoguo mûthamaki nîwathanire maûndû mau mekwe. Watho nîwavecanirwe Susa, na avîcî îkûmi a Hamani maûragwe.

¹⁵ Mûthenya wa îkûmi na kana wa mweri wa Adari, Ayahudi arîa maarî Susa nîmaagomanire rîngî na makîûraga andû magana mathatû îtûûrarî rîu. Nwatî gûtirî kîndû wanarî kîmwe maatavire.

¹⁶ Ayahudi arîa maarî icunjîrî icio ciîngî nîmeevangire makîgitîra. Nîmevonokirie kuuma kûrî arîa nthû ciao na makîûraga andû ngiri mîrongo mûgwanja na atano (75,000) arîa maamamenete. Nwatî matiatava kîndû wanarî kîmwe.

¹⁷ Mûthenya ûcio warî wa îkûmi na kathatû wa mweri wa Adari. Mûthenya ûcio wîngî wa îkûmi na kana Ayahudi nîmaavurûkire na magîûtua mûthenya wa kîrugo na gîkeno.

¹⁸ Ayahudi arîa maarî Susa nîmaatuire mûthenya wa îkûmi na gatano wa kîrugo na gûkena nîûndû nîmaûragîte nthû ciao mûthenya wa îkûmi na kathatû na îkûmi na kana.

¹⁹ Kîu nîkîo gîtûmaga Ayahudi arîa matûûraga na kûu icagirî makenerera mûthenya wa îkûmi na kana wa mweri wa Adari ta mûthenya wa gîkeno na wa kûvurûka. Mûthenya ûyû nîwa kûrîa na wa kûvecana iveo cia mûthemba wa irio kûrî mûndû na ûrîa wîngî.

Kîrugo kîa Purimu

²⁰ Moridekai nîwandîkire maûndû mama na akîmatûmîra Ayahudi onthe arîa maarî vakuvî na arîa maarî kûraca icunjîrî cionthe kûrîa kwathagwa nî mûthamaki Ahasuerusi.

²¹ Aamamenyithagia nîguo makûngûagîre mûthenya wa îkûmi na kana mweri wa Adari, mwaka wa mwaka.

²² Mîthenya îno nî îrîa Ayahudi maavootire nthû ciao. Kûrî Ayahudi mûthenya ûyû wagarûrûkîte ûgatuîka wa gûkûngûîra, îthenya rîa kîeva na gûcakaya. Nîmerirwe maririkanage mîthenya îno na kîrugo gîa kûrîa makenete, makîvecanaga iveo cia mîthemba ya irio kûrî mûndû na ûrîa wîngî wana kûva athîni.

²³ Kwoguo Ayahudi nîmarûmîrîre maûndû mau merirwe nî Moridekai, na kîrugo kîu gîgîtuîka Kîam mwaka wa mwaka.

²⁴ Hamani mûvîcî wa Hamedatha na wa rûciaro rwa Agagi na nwake warî nthû ya Ayahudi nîwethîrîtwe aikîtie mîtî (Purimu) nîguo amenye ûrîa akatharîkîra Ayahudi amathirie viû.

²⁵ Nwatî Esita nîwathiîre kûrî mûthamaki, na mûthamaki akîandîkithia watho wa kuga atî mûvango mûcûku ûrîa Hamani aavangîte wîkwe Ayahudi acokererwe nîguo. Maarûa ino nîcio ciatûmire Hamani acokererwa nîguo. Ke na avîcî ake îkûmi nîmaacurirue mûtîrî.

²⁶ Kîu nîkîo gîatûmire kîrugo gîkî gîtwe Purimu, kuumana na kiugo Puri, kîrîa kiugaga gwikia mîtî. Nîûndû wa maûndû mama monthe mekîkire,

²⁷ Ayahudi nîmaavîtûkirie ûndû ûyû ûrî watho kûrî o, njiarwa ciao na arîa onthe magatuîka Ayahudi atî mwaka wa mwaka kavinda karîa kagîrîrîte, mîthenya îo îîrî îkûngûagîrwe kûringana na watho wa Moridekai.

²⁸ Nîkwavîtûkirue atî mîthenya îno îkaririkanagwa nî njiarwa na njiarwa, mûciî, icunjî na îtûûra wa rîonthe, na atî mîthenya îno ya Purimu ndîkariganîre na îkûngûagîrwe nî njiarwa na njiarwa.

²⁹ Kwini Esita mwarî wa Abihaili na Moridekai ûrîa Mûyahudi nîmaandîkire maarûa ya kaîrî îrî ya gwîtîkîra maarûa îrîa yandîkirwe mbere nî Moridekai îgiî Purimu.

³⁰ Maarûa cionthe ciatûmîrwe Ayahudi onthe na kûrî icunjî îgana rîa mîrongo îîrî na mûgwanja (127) kûrîa kwonthe kwathanagwa nî mûthamaki Ahasuerusi. Yeraga Ayahudi magîe na thayû,

³¹ na mekarage marî evokeku na makûngûagîre kîrugo Kîam Purimu mavinda marîa magîrîrîte, wata ûrîa mamûkîrîte mawatho megiî kwînyerekia na ma macakaya, o wana njiarwa ciao.

³² Mawatho ma Purimu maavecanirwe nî Moridekai na makîandîkwa îvukuurî rîa gîkûnjo.