Esita 8 - ÎVUKU RÎA ÛVORO MWARO

Ayahudi nîmerirwe merûîrîre

¹ Mûthenya wa ûcio mûthamaki Ahasuerusi nîwavere kwini Esita indo cionthe cia Hamani, ûrîa warî nthû ya Ayahudi. Esita nîwerire mûthamaki atî Moridekai nî wa nyomba yao na kwoguo kuuma vîndî îo Moridekai nîwetîkîrue kûthiî varî mûthamaki.

² Mûthamaki nîwavere Moridekai mbete îrîa yarî na mûvûûri wake. Mbete îo nî îrîa yarutîtwe Hamani. Esita nîwatuire Moridekai mûrûngamîrîri wa indo cia Hamani.

³ Esita nîwacokire akîarîria mûthamaki rîngî, nîwegwîthirie nthî magûrûrî make akîrîraga. Nîwamûthaithire arûngamie mûvango mûcûku ûrîa warûthîtwe nî Hamani wa gûcûkangia Ayahudi.

⁴ Mûthamaki nîwatambûrûkîrie Esita mûragi wa thaavu, nake Esita nîwarûngamire na akiuga atîrî,

⁵ “Ethîrwa nî kwenda gwaku we mûthamaki na ethîrwa nîûranîciria na ûkona arî waro, nakûthaitha mûthamaki ûrute watho wa gûcûkangia mîvango îrîa Hamani augîte îvingue. Mîvango îo nî îrîa mûvîcî wa Hamedatha wa rûciaro rwa Agagi aavecanire ya kûraga Ayahudi onthe arîa marî vûrûrirî ûrîa wathaga.

⁶ Nîngîûmîrîria atîa kwona andû akwa makînyarirwa kana andû etû makîûragwa?”

⁷ Mûthamaki nîwerire kwini Esita na Moridekai ûrîa Mûyahudi atîrî, “Taroriani, nînacuria Hamani mûtîrî îgûrû nîûndû wa mûvango wake wa kûraga Ayahudi onthe na nava Esita indo cionthe cia Hamani.

⁸ Ûndû wa wonthe wathanîtwe nî mûthamaki wîkwe na ûgekîrwa mûvûri na caini yake, ndûngîgarûrwa. Kwoguo nwa mwandîkîre Ayahudi ûndû wa wonthe ûrîa mûngîenda. Nwa mwandîke mûgîtûmagîra rîîtwa na mûvûri wa mûthamaki, nîûndû ûndû wa wonthe wathanîtwe nî mûthamaki na ûgekîrwa mûvûri wake ndûngîgarûrîka.”

⁹ Maûndû mama mekîkire mûthenya wa mîrongo îîrî na ithatû mweri wa kathatû ûrîa wîtagwa Sivani. Moridekai nîwetire tûrani twa mûthamaki tuonthe na agîtwatha twandîke maarûa kûrî Ayahudi, arîrîria a thirikari, atongoria, na anene onthe a mavûrûri îgana rîa mîrongo îîrî na mûgwanja (127) kuuma India kûthiî Ethiopia. Maarûa nîciandîkirwe kûrî icunjî cionthe na nthiomi ciacio na mîandîkîre yao na igîcoka ikiandîkwa kûrî Ayahudi.

¹⁰ Moridekai nîke wandîkithirie maarûa icio igîkagîrwa mûvûri na caini ya mûthamaki. Andû arîa maaviraga maarûa icio maathiîcaga na mbarathi cia kwa mûthamaki. Mbarathi icio nîciavinyûraga mûno.

¹¹ Maarûa icio ciataaragîria atî mûthamaki nîagwîtîkîria Ayahudi arîa maarî matûûrarî monthe matûngane mavange ûrîa makwîgitîra. Maarî na rûtha rwa kûraga na gûcûkangia viû athigari kuuma vûrûri wa wonthe arîa mangîamatharîkîre, ciana ciao kana aka, na gwoca indo ciao.

¹² Watho ûyû wagîrîrwe nî kûvingua mavûrûrirî monthe marîa mûthamaki aathanaga. Mageeka ûguo mûthenya wa îkûmi na kathatû wa mweri wa Adari na nîguo mweri wa îkûmi na kaîrî.

¹³ Maûndû mama mandîkirwe na magîtuwa watho na magîtambua icunjîrî cionthe kûu vûrûrirî, nîguo Ayahudi mevarîrie kwîrîvîrîria kûrî nthû mûthenya ûcio wakinya.

¹⁴ Mûthamaki nîwathanire mathiî mekarîrîte mbarathi cia kwa mûthamaki na ivinyûre mûno. Ndûmîrîri îo nîyakinyire Susa, îtûûrarî rîrîa rînene.

¹⁵ Moridekai nîwaumire mûciî kwa mûthamaki ekîrîte nguo cia ûthamaki cia rangi wa vururu na îno njerû, na ekîrîte nthûmbî mbaro ya thaavu. Andû onthe a Susa nîmaumîrire varavararî makiugagîrîria macanjamûkîte.

¹⁶ Ayahudi nîmegucaga macanjamûkîte na marî na ûvootani.

¹⁷ Matûûrarî monthe kûrîa ndûmîrîri ya mûthamaki yathomirwe Ayahudi nîmagîre na kîrugo gîa gûkûngûîra na gûkenerera. Andû engî eengî a vûrûri ûcio nîmetuire Ayahudi, nîûndû nîmetigagîra Ayahudi.