Esita 7 - ÎVUKU RÎA ÛVORO MWARO

¹ Kwoguo mûthamaki na Hamani nîmaathiîre kîrugorî Kîam Esita.

² Mûthenya wa kaîrî kîrugorî kîu rîrîa maanyunyaga ndivei, mûthamaki nîwaûririe Esita atîrî, “Nîndûî ûrenda? Mbîra na nîngîkûva wana ethîrwa nî nuthu ya ûthamaki wakwa.”

³ Esita mûka wa mûthamaki nîwaugire atîrî, “Ethîrwa nî kwenda gwaku we mûthamaki Ahasuerusi na nîûrona kwagîrîrîte we mûthamaki Ahasuerusi, wendi wakwa nî atî nie na andû akwa tûtûûre mwoyo.

⁴ Andû akwa nî endie nîguo maûragwe mathirue. Kethîrwa nîkwa makwendua tûtuîke ngombo nie ndingîrî gûkûthînia we mûthamaki, nwatî rîu nîkwa tûrenda kûragwa tûthire viû.”

⁵ Mûthamaki Ahasuerusi nîwaûririe Esita atîrî, “Nû wîcirîtie gwîka gîîko Kîam mûthemba ta ûcio? Mûndû ûcio arî kû?”

⁶ Esita nîwacokirie atîrî, “Nthû yetû îrîa îtûnyamaragia nî mûndû ûyû mwaganu Hamani.” Nake Hamani nîwetigîrire arî mbere ya mûthamaki na kwini Esita.

⁷ Mûthamaki nîwaûkîrire akiuma kîrugorî kîu arî na marakara mûno na akîthiî na kûu mûgûndarî wa nyomba îo ya mûthamaki. Hamani nîwonire atî mûthamaki aarî mwîvarîriu kûmûverithia kwoguo nîwatigirwe akîthaithaga kwini Esita nîguo ndakaûragwe.

⁸ Rîrîa mûthamaki aumire na kûu mûgûndarî na agîcoka mûciî varîa maanyunyagîra ndivei, ethîrîrie Hamani egwîthîtie nthî gîtîrî kîrîa gîekarîrîtwe nî Esita. Nake mûthamaki ona ûguo nîwaugire atîrî, “Nîkwa mûndû ûyû arenda kûmenyana kîîmwîrî na vinya na mûka wakwa mbere yakwa gûkû nyombarî yakwa?” Mûthamaki akîrîkia kuga ûguo, Hamani aarî mûkunîke kîongo nî andû ngaramba arîa maamenyagîrîra mûthamaki.

⁹ Haribona, ûmwe wa ngaramba irîa ciamenyagîrîra mûciî kwa mûthamaki nîwaugire atîrî, “Nyomba kwa Hamani nîkuo kûrî na mûtî ûrîa warûthîtwe wa mita mîrongo îîrî na ithano wa gûcuria Moridekai ûrîa waririe maûndû maro ma kûvonokia mûthamaki.” Nake mûthamaki nîwaugire atîrî, “Mûcurieni mûtîrî ûcio îgûrû.”

¹⁰ Andû acio nîmaacuririe Hamani mûtîrî ûrîa aarûthithîtie ûrî wa gûcuria Moridekai. Namo marakara ma mûthamaki nîmaathirire.