Esita 6 - ÎVUKU RÎA ÛVORO MWARO

Moridekai nîwaverwe gîtîîo nî mûthamaki

¹ Ûtukû ûcio mûthamaki ndoona toro. Nîwaugire avirîrwe îvuku rîrîa rîandîkîtwe maûndû marîa mekîkaga wa mûthenya na athomerwe.

² Narîo nîrîathomirwe varîa Moridekai aumbûrire mûvango wa kûûraga mûthamaki Ahasuerusi ûrîa wavangîtwe nî Bigithana na Tereshi. Andû aya ngaramba nîo maarangagîra mûciî wa mûthamaki.

³ Nake mûthamaki nîwaûririe atîrî, “Moridekai aaveerwe gîtîîo kîrîkû kana ngathî îrîkû nîûndû wa ûndû ûcio eekire?” Nacio ndungata ciake nîciacokirie atîrî, “Gûtirî ûndû eekirwe.”

⁴ Mûthamaki nîwaûririe atîrî, “Kûrî mûndû wî kîvarorî?” Nake Hamani nwa vîndî aatonyete vau nja ya kîvaro mûciî wa mûthamaki. Hamani aûkîte kûria mûthamaki acurie Moridekai mûtîrî ûrîa aarûthithîtie.

⁵ Kwoguo ndungata cia mûthamaki nîciamûcokerie atîrî, “Nî Hamani wî ava na nîarenda gûkwona.” Nake mûthamaki nîwaugire atîrî, “Mwîreni atonye.”

⁶ Kwoguo Hamani nîwatonyire nake mûthamaki akîmwîra atîrî, “Kûrî na mûndû nîrenda kûva gîtîîo mûno, mûndû ûcio nînîmwîka atîa?” Hamani nîweyûririe atîrî, “Nî mûndû ûrîkû mûthamaki angîva gîtîîo tiga nie?”

⁷ Hamani nîwerire mûthamaki atîrî, “Mûndû ûcio mûthamaki akwenda kûva gîtîîo,

⁸ nîavewe nguo irîa mbaro mûno irîa ciîkagîrwa nî mûthamaki, na mbarathi irîa athiîcaga nacio na nthûmbî îrîa ekagîra.

⁹ Mûndû ûcio nîekîrwe nguo icio nî mûndû ûrîa mûtîîe mûno vûrûrirî na amûthiûrûrûkie îtûûrarî ekarîrîte mbarathi akiugagîrîria atîrî, ‘Ûguo nîguo mûthamaki ekaga mûndû ûrîa atîîte!’ ”

¹⁰ Nake mûthamaki nîwerire Hamani atîrî, “Thiî narua woce nguo icio na mbarathi îo na ûve Moridekai ûrîa Mûyahudi gîtîîo kîu. Mûmwîke maûndû monthe marîa mwagweta. Nîmûkûmwîthîrîria arî vau mwîrîgarî wa mûciî wa mûthamaki.”

¹¹ Kwoguo Hamani nîwocire nguo icio na mbarathi îo na akîthiî agîciîkîra Moridekai. Moridekai nîwatûîre mbarathi îo na Hamani akîmûtongoreria makîthiûrûrûka îtûûrarî rîu akiugagîrîria kûrî andû atîrî, “Ûguo nîguo mûthamaki ekaga mûndû ûrîa endaga kûva gîtîîo.”

¹² Moridekai nîwacokire kîvingorî kwa mûthamaki nake Hamani akînûka narua enamîtie ûthiû nîûndû wa gûconoka.

¹³ Hamani nîwerire mûka na arata ake onthe maûndû monthe marîa mekîkîte kûrî ke. Mûka na arata acio ake aûgî nîmaamwîrire atîrî, “Moridekai nîagûtuîka mûnene vandûrî vaku. Ke nî Mûyahudi na ndûngîmûvoota. Nwa nginya akûvoote.”

¹⁴ Wa makîaragia maûndû mau, andû arîa maarî ngaramba na marutaga wîra mûciî kwa mûthamaki nîmaûkire narua na makîvira Hamani kîrugorî kîu Kîam Esita.