Esita 5 - ÎVUKU RÎA ÛVORO MWARO

Esita nîwetîre mûthamaki na Hamani kîrugo

¹ Mûthenya wa kathatû Esita nîwekîrire nguo cia ûthamaki na akîrûgama kîvarorî Kîam nyomba ya mûthamaki kûrorania na varîa mûthamaki ekaraga. Mûthamaki eekarîrîte gîtî Kîam ûthamaki aroretie mwîrîgarî wa mûciî wake.

² Rîrîa mûthamaki oonire Esita arûngamîte vau nja, nîwakenirue nîke na akîmûnengereria mûragi wake wa wathani wa thaavu ûrîa aanyitîte. Esita nîwathiîre na akînyita mûthiia wa mûragi ûcio.

³ Mûthamaki nîwerire Esita atîrî, “Mbîra kîrîa ûrenda wana ethîrwa nî nuthu ya ûthamaki wakwa.”

⁴ Esita nîwerire mûthamaki atîrî, “Ûmûnthî nî mûthenya wakwa wa mwanya. Ethîrwa nî kwenda gwaku we mûthamaki na Hamani, ûkani îrugarî rîakwa rîrîa mvarîrîtie nîûndû waku.”

⁵ Mûthamaki nîwacokire akîathana Hamani aûke narua nîguo mathiî kîrugorî Kîam Esita. Kwoguo mûthamaki na Hamani nîmaathiîre kîrugorî kîrîa Esita aavarîrîtie.

⁶ Na rîrîa manyunyaga ndivei, mûthamaki nîwerire Esita atîrî, “Mbîra kîrîa ûkwenda na nîûkûgîa nakîo wana ethîrwa nî nuthu ya ûthamaki wakwa.”

⁷ Esita nîwacokirie atîrî, “Nie nîravoya atî:

⁸ Ethîrwa nîngwîtîkîrîka nîwe we mûthamaki wakwa, na ethîrwa nîwonete kwagîrîrîte ûvingie îvoya rîakwa, nîrenda we mûthamaki vamwe na Hamani mûkethîrwa mûrî îrugarî rîakwa rûyû rîrîa ngaavarîria nîûndû wenyu. Vîndî îo nîrîo ngaamwîra kîrîa nîrenda.”

Hamani nîwavangire ûrîa akûraga Moridekai

⁹ Hamani nîwaumire kîrugorî arî na gîkeno na acanjamûkîte mûno ngororî. Nwatî rîrîa oonire Moridekai arî kîvingorî gîa gûtonya kwa mûthamaki, na akîona atî ndaramûrûngamîrîra kana amûva gîtîîo na njîra wa yonthe, Hamani nîwarakarire mûno nîûndû wake.

¹⁰ Nwatî Hamani nîweyûmîrîrie na akînûka. Nîwathiîre agîîta arata ake vamwe na mûka Zereshi gwake mûciî.

¹¹ Hamani nîwamataarîrie arî na mwîtîîo ûvoro wa ûtonga wake, mwîgana wa ciana ciake wana ûrîa aaveetwe ngathî nene nî mûthamaki kûrî anene arîa engî wana gûkîra ndungata cia mûthamaki.

¹² Hamani nîwathiîre na mbere na gwîtîîa na akiuga atîrî, “Wana Esita mûka wa mûthamaki ndeta mûndû wîngî kîrugorî gîake tiga nie na mûthamaki na tûrî ete rîngî rûyû.

¹³ Kûnarî ûguo maûndû mama monthe matirang'una, ethîrwa nîngûthiî na mbere kwona Moridekai ûrîa Mûyahudi arûgamîte mwîrîgarî wa gûtonya kwa mûthamaki.”

¹⁴ Kwoguo, mûka Zereshi vamwe na arata ake onthe nîmaamwîrire atîrî, “Rûthithia mûtî wa gûcuria Moridekai wa mita mîrongo îîrî na ithano (25) ûraca na îgûrû. Kîraûko gwakîa, îra mûthamaki athane atî Moridekai acurue mûtîrî ûcio. Mwarîkia gwîka ûguo, we na mûthamaki mûthiî kîrugorî na mûkenerere.” Hamani nîwonire rîu rîrî rîciria rîaro, na kwoguo nîwarûthithirie mûtî ûcio.