Esita 4 - ÎVUKU RÎA ÛVORO MWARO

Moridekai nîwaûririe Esita amûtethie

¹ Rîrîa Moridekai aamenyire ûrîa maûndû mau mekariî, nîwatembûrangire nguo ciake, na agîkîra nguo cia macakaya na akîivaka mûu. Nîwaumagarûkire na kûu îtûûrarî akîrîraga na arî na ûrûrû mwîngî.

² Nîwathiîre nginya mwîrîgarî wa nyomba ya mûthamaki. Nwatî ndaatonya nîûndû gûtirî mûndû ûngîatonyire kwa mûthamaki ekîrîte nguo cia macakaya.

³ Kûndû kuonthe vûrûrirî kûrîa ndûmîrîri na watho wa mûthamaki ciamûkîrwe, nîkwagîre na kîeva kînene. Nîmenyerekirie, makîrîra na magîkîra nguo cia macakaya na makîîvaka mûu.

⁴ Rîrîa ndungata cia Esita cia aka na andû ngaramba arîa mevokeretwe gûtungata nyombarî ya mûthamaki maathiîre makîra Esita ûrîa Moridekai aarî na kîeva kîngî, nîwathînîkire mûno. Esita nîwatûmanire nguo ivirîrwe Moridekai ekîre, vandû va gwîkîra nguo cia macakaya, nwatî Moridekai nîwaregire gwîkîra nguo icio.

⁵ Esita nîwatûmanîre Hathaki ûmwe wa andû ngaramba arîa maatungataga kwa mûthamaki na wathuurîtwe arî ndungata ya Esita, na akîmwîra athiî kûrî Moridekai akamenye ûrîa ûvoro ûcio wîkariî na gîtûmi Kîamguo.

⁶ Hathaki nîwathiîre kûrî Moridekai kîvarorî gîa îtûûra mwîrîgarî wa mûciî kwa mûthamaki.

⁷ Moridekai nîwerire Hathaki maûndû monthe marîa mekîkîte kûrî ke, na mbeca irîa Hamani eeranîrîte kûrîva kîgînarî Kîam mûthamaki nîguo Ayahudi onthe maûragwe.

⁸ Moridekai nîwavere Esita maarûa îrîa yarî na ndûmîrîri îrîa mûthamaki aatûmîte Susa, îrîa yaugaga Ayahudi onthe maûragwe. Moridekai nîwerire Hathaki avirîre Esita ndûmîrîri îo, amûtarîrie na amûrie athiî kûrî mûthamaki amûthaithe etîkîre kwîguîra andû ake ntha.

⁹ Hathaki nîwathiîre na akîîra Esita maûndû monthe marîa Moridekai aamwîrîte.

¹⁰ Nake Esita nîwerire Hathaki athiî akeere Moridekai atîrî,

¹¹ “Ndungata cionthe cia mûthamaki na andû onthe a mavûrûri arîa mathagwa nî mûthamaki nîmaicî atî mûndû wa wonthe arî mûndûmûka kana mûndûmûrûme angîthiî nyomba kwa mûthamaki atarî na rûtha, mûndû ûcio agîrîrwe nî kûûragwa. Mûndû ûrîa tu ûngîvonoka kuumana na watho ûyû nî ûrîa mûthamaki aigîrîrîte mûtî wake wa thaavu wa ûthamaki. Nîrî na mweri mûgima ndathiîte kwa mûthamaki.”

¹² Rîrîa Moridekai aanyitire ndûmîrîri ya Esita,

¹³ nîwamûkaanirie akîmwîra atîrî, “Ndûgecirie atî nîûkûvonoka nîûndû ûrî kwa mûthamaki mûciî Ayahudi acio engî makîûragwa.

¹⁴ Nîûndû ûngîkira îvinda ta rîrî, Ayahudi nîmakaagîa ûtethio kuuma vandû vengî, nwatî we vamwe na andû onthe a mûciî wa aguo nîmûkaaûragwa. Nû wicî atî twa kwîthîrwa we watuîkire mûka wa mûthamaki nîûndû wa îvinda ta rîrî?”

¹⁵ Esita nîwamatûmire makere Moridekai atîrî,

¹⁶ “Thiî ûnganie Ayahudi onthe arîa marî kûu Susa, mwînyerekie na mûvoe. Mûtikarîe kana mûnyua kîndû îvinda rîa mîthenya îthatû, ûtukû na mûthenya. Nie vamwe na ndungata ciakwa tûkethîrwa tûkînyerekia wata mue. Nîngaacoka nthiî kûrî mûthamaki wana ethîrwa tîguo watho wîtîkîrîtie. Ethîrwa nî kûragwa nîngaaûragwa.”

¹⁷ Moridekai nîwacokire akîthiî na agîka ûrîa erîtwe nî Esita.