Esita 3 - ÎVUKU RÎA ÛVORO MWARO

Hamani nîwavangire ûrîa akûraga Ayahudi

¹ Vuva wa maûndû mau, mûthamaki Ahasuerusi nîwanenevirie Hamani mûvîcî wa Hamedatha, wa rûciaro rwa Agagi akîmûtua mûnene wa atongoria onthe a thirikari.

² Mûthamaki nîwathanire atî andû onthe arîa mamûtungatagîra menamagîrîre na mavecage Hamani gîtîîo. Andû ake onthe nîmeekaga guo nwatî Moridekai nîwaregire kwînamîrîra Hamani kana kûmûva gîtîîo.

³ Ndungata irîa ciekaraga kîvingorî kwa mûthamaki mûciî nîciaûririe Moridekai atîrî, “Nîndûî kîratûma ûregana na watho wa mûthamaki?”

⁴ Mûthenya wa mûthenya ndungata icio nîciaririe na Moridekai ikîmûringîrîria gûturîria Hamani maru nwatî nîwaregire kûmathikîrîria na akîmera atîrî, “Nie nî Mûyahudi na ndingîturîria Hamani maru.” Kwoguo andû acio nîmerire Hamani ûvoro wa Moridekai nîguo mone ûrîa angîka.

⁵ Hamani nîwarakarire mûno rîrîa eguire atî Moridekai nîwaregire kûmûturîria maru.

⁶ Na rîrîa aamenyire atî Moridekai aarî Mûyahudi, nîwavangire kûmûraga vamwe na andû a mûciî wake na Ayahudi onthe arîa maarî vûrûrirî wonthe ûrîa wathagwa nî mûthamaki Ahasuerusi.

⁷ Mwaka wa îkûmi na îîrî mweri wa mbere ûrîa wîtagwa Nisani kuuma mûthamaki Ahasuerusi ambîrîria kwathana, Hamani nîwathanire atî gwikague mîtî nîguo kûmenyekane nîrî makaûraga andû acio. Nayo kuura nîyagwîrîre mûthenya wa îkûmi na îthatû mweri wa îkûmi na îîrî, ûrîa wîtagwa mweri wa Adari.

⁸ Kwoguo Hamani nîwerire mûthamaki atîrî, “Kûrî andû a mûvîrîga mûna manyagarûkîrîte vûrûrirî waku wonthe na methagîrwa makîoneka icunjîrî cionthe cia wathani waku. Andû acio marî na mawatho ngûrani na marîa marûmagîrîrwa nî mavûrûri marîa mengî na matiathîkagîra watho wa mûthamaki, kwoguo gûtirî na vata wa kûmarekereria matûûre vûrûrirî waku.

⁹ We mûthamaki, ethîrwa nî ûkwona arî waro, athana andû acio maûragwe. Nîngwîranîra atî nîngaaruta sîlûva kilo ngiri magana mathatû ma mîrongo îna (340,000) nîguo cigwe kîgînarî Kîam mûthamaki.”

¹⁰ Nake mûthamaki nîwarutire gîcûvî gîake kîrîa gîatûmagîrwa kûvûra maarûa ciake mîvûri, agîkînengera Hamani mûvîcî wa Hamedatha wa njiarwa cia Agagi. Hamani aarî nthû ya Ayahudi.

¹¹ Mûthamaki nîwacokire akîra Hamani atîrî, “Andû acio wana mbeca nî ciaku meke ûrîa ûrona kwagîrîrîte.”

¹² Kwoguo mûthenya wa îkûmi na îthatû wa mweri wa mbere, Hamani nîwetire tûrani tuonthe twa mûthamaki na akîmera mandîke maarûa na nthiomi na mîandîkîre ya andû onthe vûrûrirî ûcio. Nîwaugire ivirîrwe arîrîria a vûrûri arîa anene, arîa anini, na andû arîa onthe mathanaga mavûrûrirî. Maarûa icio ciandîkîtwe vandûrî va mûthamaki Ahasuerusi na akîvûrwa mûvûri na gîcûvî gîake.

¹³ Namo maarûa mau nîmavirirwe mavûrûrirî monthe marîa maathanagwa nî mûthamaki ûcio na mandîkîtwe atî Ayahudi onthe, ciana, athuuri, aka na anake maûragwe. Nao nîmakaûragwa matakwîguîrwa ntha na indo ciao cionthe ciocwe.

¹⁴ Ndûmîrîri îrîa yarî maarûarî îo nîyavirirwe mavûrûrirî monthe, nîguo andû onthe mevarîrie nîûndû wa mûthenya ûcio.

¹⁵ Watho ûcio wavecanirwe kûu Susa kwa mûthamaki, nake mûthamaki Ahasuerusi na Hamani nîmekarire nthî na makînyua ndivei, nao andû onthe arîa maarî îtûûrarî rîa Susa nîmaamakire mûno.