Esita 2 - ÎVUKU RÎA ÛVORO MWARO

Esita nîwatuîkire Kwini

¹ Vuvarî, marakara make mavorera, mûthamaki Ahasuerusi nîwaririkanire Vashiti na nîweciragia mûno îgûrû rîa maûndû marîa ekîte wana îtua rîrîa rîatuîtwe îgûrû rîake.

² Kwoguo ndungata cia mûthamaki irîa ciamûtungataga nîciamûtaarire atîrî, “Mwathi wetû kûrî na erîtu eengî ethî na ciîrorerwa. Tiga tûgûcarîrie ûmwe gatagatîrî kao.

³ Nawe mûthamaki wetû, thuura anene mavûrûrirî monthe na ûmatue a gûcaria erîtu arîa athaka mûno na maretwe nyombarî ya mûthamaki gûkû Susa. Nîmaigwe nyombarî îrîa îkaraga aka, na mekarague nî Hegai ûrîa ngaramba na mûmenyereri wa aka a mûthamaki, macoke mavewe maguta megemie.

⁴ Nake mwîrîtu ûrîa ûgaakûmba, ûmûtue mûthamaki mûndûmûka vandûrî va Vashiti.” Mûthamaki nîwonire mataaro mau marî maro na nîwekire guo.

⁵ Kûu Susa, kwarî na Mûyahudi wetagwa Moridekai mûvîcî wa Jairi. Nake Jairi aarî mûvîcî wa Shemei, Shemei aarî mûvîcî wa Kishu wa mûvîrîga wa Benjamini.

⁶ Moridekai aarî ûmwe wa andû arîa maatavîtwe vamwe na Jekonia mûthamaki wa Juda ûrîa watavîtwe na akathamîrua Babuloni nî mûthamaki Nebukadinezarû.

⁷ Moridekai nîke warerete Hadasa, na nîke Esita, mwîrîtu wa îthe mûkûrû. Aciari a Esita makua, Moridekai nîke wamwocire na akîmûrera arî ta ûmwe wa ciana ciake.

⁸ Mûthenya ûmwe rîrîa watho wa mûthamaki wanîrîrwe, erîtu eengî nîmavirirwe Susa îtûûra rîrîa rînene na Hegai agîtuwa wa kûmamenyagîrîra. Esita wanake nîwavirirwe kwa mûthamaki na akigwa rungu rwa Hegai ûrîa wamamenyagîrîra.

⁹ Hegai nîwakenirue nî Esita mûno nginya akîmwenda gûkîra erîtu acio engî onthe. Atagûta mavinda, nîwavere Esita maguta ma kwîthakaria na irio cia mwanya cia kûrîa mûthenya wa mûthenya. Nîwamûvere ndungata mûgwanja cia erîtu irîa ciatungataga nyomba kwa mûthamaki nîguo imûtungatage.

¹⁰ Moridekai nîwataarîte Esita ndakemenyithanie kûrî andû ao wana kana kûrî andû a mûciî wake atî ke nî Mûyahudi.

¹¹ Mûthenya wa mûthenya Moridekai nîwavîtûkagîrîra vau nja ya nyomba îrîa mekaraga, nîguo amenye kana Esita arî na thayû.

¹² Erîtu acio methagîrwa marî nyomba kwa mûthamaki, megemagia îvinda rîa mwaka ûmwe. Mîeri îtandatû ya mbere mevakaga maguta kuuma mûtîrî wa mare, na mîeri îo îngî îtandatû makevaka maguta manungi waro na maguta ma mîthemba îngî. Marîkia kwîgemia, wa mwîrîtu arî wenga nîwaviragwa mbere ya mûthamaki Ahasuerusi.

¹³ Vîndî ya kuuma kûrîa mekaraga na kûthiî kwa mûthamaki, wa mwîrîtu nîwavecagwa wa kîrîa kîonthe angîendire nîguo athiî nakîo kwa mûthamaki.

¹⁴ Kîvwaî mwîrîtu nîwatonyaga kwa mûthamaki na kîraûko agacoka nyombarî ya kaîrî îrîa yamenyagîrîrwa nî Shaashagazu, mûndû ûrîa warî ngaramba na wevokeretwe aka a kwigwa a mûthamaki. Mwîrîtu wa wonthe ndangîacokire kwa mûthamaki tiga endirwe nî mûthamaki na etwe na rîîtwa.

¹⁵ Kavinda ka Esita ga kûthiî kwa mûthamaki nîgaakinyire. Esita aarî mwarî wa Abihaili, îthe mûkûrû wa Moridekai. Moridekai nîwocete Esita agatuîka mwarî. Esita nîwendagwa nî mûndû wa wonthe wamwonaga. Rîrîa kavinda gaakinyire Esita nîwekîrire nguo îrîa Hegai, ngaramba îrîa yarûngamagîrîra ndungata cia aka aamûtaarire ekîre.

¹⁶ Kwoguo mwaka wa mûgwanja mwerirî wa îkûmi na nîguo mweri wa Tebethi Ahasuerusi arî mûthamaki, Esita nîwavirirwe mûciî kwa mûthamaki.

¹⁷ Mûthamaki nîwendire Esita gûkîra erîtu acio engî onthe, kwoguo nîwamwîkîrire nthûmbî kîongorî îrîa îkagîrwa nî mûka wa mûthamaki na akîmûtua mûka vandûrî va Vashiti.

¹⁸ Mûthamaki nîwacokire akîrugithîria Esita kîrugo kînene na agîta anene, atongoria na ndungata ciake cionthe. Nîwarekere vûrûri wonthe gooti na akîvecana iveo wata ûrîa ûtaana wake wegana.

Moridekai nîwavonokirie mûthamaki

¹⁹ Rîrîa erîtu maagomanîte vamwe vîndî ya kaîrî, Moridekai aarî mûtue mûrûngamîrîri wa mûciî wa mûthamaki.

²⁰ Esita ndaarî mûmenyithaniu mûvîrîga wake kana nyomba yake nîûndû aarî mûkanie nî Moridekai ndageke guo. Nake Esita nîwathîkîre Moridekai wata ûrîa aamwathîkagîra arî gwake mûciî, kûrîa aakûrîre.

²¹ Vîndî îrîa Moridekai aarî mûrûngamîrîri wa mûciî wa mûthamaki, andû aîrî ngaramba arîa maarangagîra nyomba ya mûthamaki na nîo Bigithana na Tereshi nîmarakarire nginya makîrûtha mûvango wa kûraga mûthamaki Ahasuerusi.

²² Moridekai nîwamenyire ûndû ûcio na akîra Esita, nake Esita akîmenyithia mûthamaki.

²³ Rîrîa ûndû ûcio watuîrirue na ûkîmenyekana atî nî wa ma, andû acio oîrî nîmaacurirue mûtîrî îgûrû. Mûthamaki nîwathanire ûvoro ûcio wandîkwe îvukuurî rîa maûndû ma kûririkanagwa ma vûrûri.