Esita 1 - ÎVUKU RÎA ÛVORO MWARO

Kwini Vashiti nîwareganire na mûthamaki Ahasuerusi

¹ Ahasuerusi aarî mûthamaki wa vûrûri ûrîa waumîte India nginya Ethiopia îvinda rîa mîaka îgana rîa mîrongo îîrî na mûgwanja (127).

² Ahasuerusi aathanaga arî îtûûrarî rîa Susa.

³ Mwaka wa kathatû kuuma mûthamaki Ahasuerusi ambîrîria kwathana, nîwarugithirie kîrugo kînene na agîta anene onthe na andû arîa maarî îgweta vûrûrirî ûcio.

⁴ Îvinda rîa mîeri îtandatû, Ahasuerusi nîwonanirie ûtonga wa ûthamaki wake na riiri waguo.

⁵ Vuva wa ûguo, mûthamaki nîwarugithîrie andû onthe a îtûûra rîa Susa, itonga na athîni kîrugo. Kîrugo kîu gîakûngûîrwe îvinda rîa mîthenya mûgwanja, na Kîamvarîrîtue kwa mûthamaki mûciî.

⁶ Kûu nja kwa mûthamaki kwagemetue na itambaa cia rangi wa vururu, na îno njerû na ciovetwe na mîkumbû ya nguo cia goro ya rangi wa Njambarawe na ikovererwa icûvîrî cia sîlûva, igacoka igacurua itugîrî cia mathiga ma yûmba na mîgeka ya gwîkarîra yarûthîtwe na thaavu. Mîkathî îo ya sîlûva na thaavu yaigîtwe nja kwa mûthamaki na kwagemetue waro na mathiga maavenavenagia, mathiga matune, mathiga ma yûmba, mathiga ma rangi ya mûkûngambura na tûthiga twîngî twa goro.

⁷ Andû nîmaaveerwe indo cia kûnyua ciîkîrîtwe ikomberî cia thaavu, nake mûthamaki aarî mûtana mûno na ndivei îrîa yanyunyagwa kwa mûthamaki.

⁸ Wa mûndû aanyunyaga kîrîa akwenda. Mûthamaki nîwarutîte watho kûrî ndungata ciake akiuga andû manyue na marîe wata ûrîa mangîavotire.

⁹ Vîndî wa îo, Vashiti mûka wa mûthamaki wanake nîwarugithîrie aka kîrugo kînene kûu mûciî kwa mûthamaki Ahasuerusi.

¹⁰ Mûthenya wa mûgwanja kuuma kîrugo Kîammbîrîria, mûthamaki aarî mûnyuu ndivei na agacanjamûka. Nake nîwetire ngaramba ciake irîa ciakarambithîtue nîûndû wa gûtungata kwa mûthamaki. Nao nî: Mehumani, Bizitha, Haribona, Bigatha Zethari na Karikasi.

¹¹ Nîwamatûmire mathiî makagîre mûka Vashiti aûke vau mbere ya mûthamaki ekîrîte nthûmbî ya ûthamaki. Vashiti aarî mûthaka mûno na mûthamaki endaga kûmwonania mbere ya atongoria na ageni ake onthe.

¹² Nwatî rîrîa ngaramba icio cia mûthamaki cierire Vashiti ûrîa maathwa nî mûthamaki, nîwaregire kûthiî. Ûndû ûcio nîwarakaririe mûthamaki mûno.

¹³ Kwoguo ta mûtugo mûthamaki nîwathiîre kûrî andû arîa maarî na ûûgî na arîa maamûtaaraga maûndûrî megiî watho na mîthiîre nîguo mamûtaare ûrîa agwîka.

¹⁴ Andû arîa aamenyerete kûria ûtaaro mavinda meengî nî, Karishena, Shethari, Adimatha, Tarishishi, Meresi, Marisena na Memukani. Atongoria aya mûgwanja a Perisia na Media nîo meekaraga vakuvî mûno na mûthamaki.

¹⁵ Mûthamaki nîwerire andû aya atîrî, “Nie mûthamaki Ahasuerusi, nînathire ngaramba ciakwa igîre Vashiti, nwatî akîrega kûmbathîkîra! Watho ugîte mûndûmûka ûyû agîrîrwe nî gwîkwa atîa?”

¹⁶ Memukani nîwacokire akîra mûthamaki vamwe na anene atîrî, “Vashiti mûka wa mûthamaki nîarumîte mûthamaki vamwe na anene onthe, wana akaruma arûme onthe vûrûrirî.

¹⁷ Gîîko gîkî nîkîmenywa nî aka onthe vûrûrirî, nao aka onthe mambîrîrie kûnyarara athuuri ao. Makaugaga atîrî, ‘Mûthamaki Ahasuerusi aathanire mûka Vashiti avirwe mbere yake na akîrega!’

¹⁸ Kuuma mûthenya ûyû wa ûmûnthî, aka a Perisia na Media arîa megua ûrîa Vashiti eka, makeraga atongoria aku. Aka onthe matigacoka gûtîîa athuuri ao, nao athuuri onthe nîmatûûra manyararîte aka ao.

¹⁹ Mûthamaki, ethîrwa nîûkwona kwagîrîrîte athana vûrûri wonthe uge Vashiti ndagakinya mbere ya mûthamaki rîngî. Athana kwandîkwe mawathorî ma Perisia na Media nîguo watho ûyû ndûkagararwe. Nake Vashiti ndagacoke gûka varî we, we Ahasuerusi mûthamaki wetû. Naguo ûvoro wake wa gûtuîka mûka wa mûthamaki ûvewe mwîrîtu wîngî ûrîa mwaro kûmûkîra.

²⁰ Mûthamaki wetû, rîrîa watho ûyû ûkanîrîrwa na ûtambe vûrûrirî ûyû wonthe aka onthe nîmagaatîîa athuuri ao, arîa itonga wana arîa athîni.”

²¹ Mûthamaki, anene na atongoria nîmendire rîciria rîu na mûthamaki agîka ûrîa Memukani aaugîte.

²² Mûthamaki nîwatûmire maarûa icunjîrî cionthe irîa aathanaga mandîkîtwe na rûthiomi na mwandîkîre ûrîa wereekaga gîcunjîrî Kîam vûrûri na akiuga atî mûndûmûrûme wa wonthe nîke ûkaathanaga gwake mûciî na gûtirî mûndû ûkamûkararagia.