Danieli 9 - ÎVUKU RÎA ÛVORO MWARO

Danieli nîwavoere andû ake

¹ “Dario mûvîcî wa mûthamaki Ahasuerusi wa kuuma vûrûri wa Mede nîke wathanaga Babuloni.

² Mwaka wa mbere wa wathani wake, nie Danieli nînathomaga mandîko matheru na ngeciragia mûno ûvoro wîgiî mîaka mîrongo mûgwanja (70) îrîa Jerusalemu îgeekara îrî nyomomore, wata ûrîa Ngai-Mûnene aaguûrîrîtie mûrathi Jeremia.

³ Nînathiîre kûrî Mwathani Ngai na ngîmûvoya ngîmûthaithaga na nîînyereketie, mbîkîrîte nguo cia macakaya, na ngevaka mûu.

⁴ Nînavoire Ngai-Mûnene, Ngai wakwa na ngiumbûra mevia marîa meekîtwe nî andû akwa. “Nînaugire atîrî, ‘Mwathani, wî Ngai mûnene na nîwîkaga maûndû ma magegania. We nîwigaga kîrîkanîro gîaku, na nîwonanagia wendo ûtathiraga kûrî andû arîa makwendete na mathîkagîra maathani maku.

⁵ Tue nî twîvîtie, nîtwîkîte maûndû macûku, na tûgeka naaî. Nîtûreganîte nawe na tûkaregana na maathani maku na irîra ciaku.

⁶ Nîtûregete kwîgua arathi, ndungata ciaku arîa maaragîria athamaki etû, aathani, methe metû ma tene, na andû onthe a vûrûri na njîra ya rîîtwa rîaku.

⁷ We, Mwathani, wîthagîrwa ûrî mûthingu vîndî cionthe. Nwatî tue, tûtûûraga tûrî na gîconoko, wana andû onthe arîa matûûraga Judea na Jerusalemu, na andû onthe a Isiraeli arîa marî mavûrûrirî marîa marî vakuvî na marî kûraca, nîûndû matiarî evokeku kûrî we.

⁸ Ngai-Mûnene, tue, athamaki etû, aathani etû, na methe metû, tûrî na gîconoko nîûndû nîtûkûvîtîrîtie.

⁹ We Mwathani Ngai wetû nîwîgucanagîra ntha, na nîwovanagîra wana ethîrwa nîtûreganîte nawe.

¹⁰ Nîtwaregire gûkwathîkîra we, Ngai-Mûnene, Ngai wetû. Twekire ûguo na njîra ya kûrega kwathîkîra mawatho marîa watûveere na njîra ya arathi, ndungata ciaku.

¹¹ Andû onthe a Isiraeli nîmaaunire watho waku, na makîrega gûkwathîkîra. Tue nîtwakûvîtîrie we Ngai-Mûnene na tûkîrega kwathîkîra Watho ûrîa waveere ndungata yaku Musa. Kwoguo tûrî anyite nî kîrumi na matuîro marîa mandîke wathorî wa Musa, ndungata yaku.

¹² Nîwavingirie maûndû marîa waugire nîûgaatwîka vamwe na athani etû. Nîwacûkangirie Jerusalemu gûkîra ûrîa wanacûkangia matûûra marîa mengî monthe ma nthî.

¹³ Nîûtûverithîtie na maûndû monthe wata ûrîa kwandîkîtwe wathorî wa Musa. Nwatî nginya rîu Ngai-Mûnene, Ngai wetû, nîtûregete gwîka ûndû ûngîgûkenia na njîra ya kûvera mevia, kana kûrûmîrîra ûma.

¹⁴ Kwoguo we Ngai-Mûnene, Ngai wetû, nîwevarîrie gûtûverithia na ûgîka guo, nîûndû vîndî cionthe wîkaga ûrîa kwagîrîrîte, nwatî tue tûkarega gûkwathîkîra.’

¹⁵ “Rîu we Mwathani, Ngai wetû, we nîwonanirie vinya waku na njîra ya kûruta andû aku Misiri, na ûgîtûma rîîtwa rîaku rîtûûre rîririkanagwa nginya ûmûnthî. Tue nî twîvîtie na nî twîkîte maûndû macûku.

¹⁶ We Mwathani, nîûndû wa ûthingu waku tiga kûverithia Jerusalemu, îtûûra rîaku rîrîa rîrî kîrîmarî kîrîa kîtheru. Andû aku, na îtûûra rîa Jerusalemu methagîrwa marî na gîconoko mbere ya mavûrûri marîa mamarigicîrîtie, nîûndû wa mevia metû na maûndû macûku marîa meekirwe nî methe metû ma tene.

¹⁷ Kwoguo we Ngai wetû, thikîrîria mavoya na mathaithana ma ndungata yaku. Na kwenda gwaku we Mwathani, cokanîrîria hekarû yaku îrîa yacûkangirue.

¹⁸ We Ngai wetû, tega matû maku ûtûthikîrîrie. Ta roria mathîna marîa tûrî namo na mathîna marîa marî îtûûrarî rîrîa rîtanîtue nawe. Tûrakûvoya we Ngai nîûndû ûrî wa ntha nyîngî na tî nîûndû wa ûrîa twagîrîrîte.

¹⁹ We Ngai-Mûnene tûthikîrîrie! We Ngai-Mûnene twovere! We Ngai-Mûnene twîgue na wîke ûndû! We Ngai wakwa ndûgacererwe ûgîûka îtûûra rîîrî. Îtûûra rîîrî na andû aya nî aku.

Gaburieli nîwataarîrie ûrathi

²⁰ “Vîndî îrîa naaragia ngîvoyaga na ngiumbûraga mevia makwa, na mevia ma andû akwa, Isiraeli na ngîthaithaga Ngai-Mûnene, Ngai wakwa nîûndû wa kîrîma gîake kîtheru,

²¹ Gaburieli, mûndû ûrîa noonire kîonekirî gîakwa Kîam mbere, nîwaûkire na îvenya nginya varîa naarî. Vîndî îo nîrîo magongoona ma kîvwaî maarutagwa.

²² Nîwambîrire atîrî, ‘Danieli, naûka gûkûva ûûgî na ûtaûku.

²³ Mavinda marîa wambîrîrie kûvoya, Ngai nîwacokirie mavoya, nanie naûka gûgûtaarîria macokio mau, nîûndû we wî mwende mûno. Kwoguo tathikîrîria waro nîguo ûtaûkîrwe nî kîoneki kîu.

²⁴ “ ‘Mîaka mûgwanja maita mîrongo mûgwanja, nî îvinda rîrîa Ngai amûrîte rîa kûthiria waganu, mevia; kwovera andû arîa mekîte maûndû macûku, kûrete thayû wa tene na tene, gwîtîkîra cioneki na ûrathi, na kûvaka vandû varîa vatheru Mûno maguta.

²⁵ Kwoguo, nwanginya ûmenye na ûtaûkîrwe nî ûndû ûyû, atî kuuma watho wa gûtuma Jerusalemu rîngî wavecanwa, nginya rîrîa ûrîa mûtheru wa Ngai akaathuurwa, mîaka mûgwanja maita mîrongo mûgwanja nîîkathira. Jerusalemu nîgaatumwa rîngî îrî na tûcîra twaro na nthingo cia vinya cia kûrîgitîra. Narîo rîgeekara îvinda rîa mîaka mîrongo îtandatû na îîrî maita mûgwanja, nwatî îkethîrwa rîrî îvinda rîa mathîna.

²⁶ Îvinda rîu rîathira mûtongoria ûrîa mwamûre nî Ngai nîakaaûragwa na njîra îtarî ya kîvooto. Îtûûra rîu na hekarû nîigaacûkangua nî athigari a mbaara a mûtongoria ûrî vinya mûno. Mûthiia wa îtûûra rîu ûgaakinya ta mwîcûro wa manjî. Ngai nîarutîte watho akauga, îtûûra rîu rîthirue viû.

²⁷ Mûtongoria ûcio nîakaarûtha kîrîkanîro kîrûmu na andû eengî îvinda rîa mîaka mûgwanja. Îvinda rîa mîaka îthatû na nuthu, nîakaarûngamia matega na magongoona. Vandû varîa vatheru Mûno hekarûrî, nîvakaarûngamua kîrîa kîrî mûgiro nginya rîrîa ûrîa wakigire vo agaacûkangua wata ûrîa Ngai aavangire.’ ”