Danieli 8 - ÎVUKU RÎA ÛVORO MWARO

Danieli nîwagîre kîoneki kîa ndûrûme na nthenge

¹ “Mwaka wa kathatû Belishazaru arî mûthamaki, nie Danieli nînoonire kîoneki kîngî, gîekariî wata kîrîa Kîam mbere.

² Na njîra ya kîoneki kîu nîneyonire nîrî Susa, îtûûra rînene rîa vûrûri wa Elamu. Noonire nûngamîte rûtere rwa Rûnjî rwa Ulai.

³ Vau rûtere rwa rûnjî nînoonire ndûrûme yarî na mvîa igîrî ndaca, nwatî rûvîa rûmwe rwarî rûraca gûkîra rûu rwîngî, na nîruo rwaumire vuva.

⁴ Nînoonire ndûrûme îo îkîtharîkîra mwena wa îthûîro, rûgûrû, na wa îveti. Gûtirî nyamû îngîamîtirîrie, na gûtirî nyamû îngîetethûrire kûrî yo. Yekaga wa ûrîa îkwenda na nîyeyonaga îrî na vinya mûno.

⁵ “Na rîrîa neciragia ûvoro ûcio, nthenge nîyaumire mwena wa îthûîro na îgîtuîkanîria nthî yonthe îvinyûrîte mûno îtakûvutia nthî. Nthenge îo yarî na rûvîa rûmwe rwarî gatagatî ka metho na rwonekaga waro mûno.

⁶ Nthenge îo nîyathiîre kûrîa ndûrûme îo yarî na mvîa igîrî, îrîa noonete îrûngamîte rûtere rwa Rûnjî. Nîyakuthûkîre ndûrûme na îkîmîtharîkîra na vinya wayo wonthe.

⁷ Nînoonire nthenge îo îkîtharîkîra ndûrûme îo. Nayo yarî ndakaru mûno, kwoguo nîyaringire ndûrûme îo na îkîmiuna mvîa ciayo cioîrî. Ndûrûme îo ndîarî na vinya wa gûtiirîria nthenge îo. Nthenge nîyarivanirie ndûrûme îo nthî na îkîmîkinyangîra vo; gûtirî mûndû ûngîatethûrire ndûrûme îo.

⁸ “Nthenge nîyetîire mûno makîria. Nwatî vîndî îrîa yegucaga îrî na vinya mûno, rûvîa rwayo rûrîa rwarî rûnene nîrwaunîkire na vandûrî va ruo, mvîa ciîngî inya ciarî na vinya nîciaumîrire, wa rûvîa rûroretie mwene wa ruo.

⁹ Kuuma kûrî wa rûvîa rwa icio inya, nîvaaumîrire karûvîa kanini. Vinya wa wathani wa karûvîa kau wathiîre ûkîongererekaga na mwena wa îveti, mwena wa îrathîro, na kûthiî vûrûri wa Kîranîro.

¹⁰ Karûvîa kau nîkaagîre na vinya mûno na gakîneneva îgûrû rîa ciûmbe cia îgûrû, nîkagwîthirie imwe cia njata icio na gagîikinyanga.

¹¹ Karûvîa kau nîkendire gwîtua kanene gûkîra Mûnene wa ciûmbe icio cia îgûrû. Nîkaarûngamirie matega marîa mûnene wa ciûmbe cia îgûrû aarutagîrwa na gakîcûkangia hekarû yake.

¹² Ciûmbe cia îgûrû nîcianenganîrwe rungu rwa wathani wa karûvîa kau. Îthenyarî rîa magongoona marîa maarutagwa wa mûthenya, andû nîmambîrîrie gwîka maûndû macûku. Karûvîa kau nîgaacûkangirie ndini ya Ngai, na gagîtoorania maûndûrî monthe marîa geekaga.

¹³ Nînacokire ngîgua ûrîa mûtheru akîaria, nake wîngî mûtheru akîmûcokeria atîrî, ‘Maûndû mau monekete na njîra ya kîoneki gîkî mageekîka kavinda kegana atîa? Maûndû marîa macûku nîmatûûra mekagwa kavinda kegana atîa vandûrî va magongoona ma wa mûthenya? Mbûtû ya îgûrû na hekarû nîitûûra ikinyangagwa nginya rî?’

¹⁴ Nake ûrîa mûtheru wa mbere nîwacokirie atîrî, ‘Magongoona ma wa mûthenya nîmatûûra matakûrutwa kavinda ka ivwaî na iraûko ngiri igîrî na magana mathatû (2,300). Kavinda kau kathira, hekarû ya Ngai-Mûnene nîgaacokua ûrîa yatûûraga.’

Mûraika Gaburieli nîwataûrire kîoneki

¹⁵ “Rîrîa nie Danieli, noonire kîoneki, na rîrîa naageragia gûgîtaûra, wa rîmwe kîûmbe gîekariî ta mûndûmûrûme nîkîaumîrire na gîkîrûngama mbere yakwa.

¹⁶ Nînegwire mûgambo wa mûndûmûrûme wetana kuuma ndeererî cia rûnjî rwa Ulai ûkiuga atîrî, ‘Gaburieli, taûrîra mûndûmûrûme ûyû kîoneki kîrîa wonire.’

¹⁷ Gaburieli nîwaûkire na akîrûngama varîa naarî. Nînavavûkire mûno nginya ngîgwa nthî. Nwatî Gaburieli nîwambîrire atîrî, ‘We mûndû ûyû, menya atî maûndû mau wonire megiî mavinda ma mûthiia.’

¹⁸ “Na vîndî îo aambaragîria, nînaagwîre nthî na ngîgirîka, nwatî nîwanyitire akîmbûkîrîria na ngîrûngama na magûrû makwa.

¹⁹ Nîwambîrire atîrî, ‘Taroria, nîngûkûmenyaithia maûndû marîa magekîka kuumana na marakara ma Ngai. Kîoneki kîu kîgiî mavinda ma mûthiia.

²⁰ “ ‘Ndûrûme îrîa wonire îrî na mvîa igîrî, yonanagia mothamaki maîrî, na nîmo: Media na Perisi.

²¹ Nthenge nayo yonanagia ûthamaki wa Ngiriki. Naruo rûvîa rûraca rûrîa rûrî gatagatî ka ûthiû wayo rwonanagia mûthamaki wa kuo wa mbere.

²² Mvîa inya irîa ciaumire rûvîa rwa mbere rwaunîka, cionanagia, atî ûthamaki wa mbere nîûkaagaûkana na vûrûri ûcio ûgîe na mothamaki mana, nwatî mothamaki mau mana matikethîrwa marî na vinya ta ûthamaki wa mbere.

²³ “ ‘Rîrîa mavinda ma mûthiia ma mothamaki mau magaakuvîvîria na makethîrwa mevîtie magatûra gacere, nî gûkaagîa na mûthamaki mûmîrîru, mwaganu na mûthaani.

²⁴ Ke nîakaagîa na vinya mûno. Nwatî tî ûvoti wake ke mwene. Nîagaacûkangia maûndû meengî na manene, na avootanage maûndûrî marîa ageekaga. Nîagaacûkangia andû arîa marî îgweta vamwe na andû a Ngai.

²⁵ Nîakaavootanaga maûndûrî marîa ageekaga nîûndû wa wara wake. Nîakaatharîkîra andû engî wana atamamenyithîtie na aregane na mûthamaki ûrîa mûnene gûkîra onthe; nwatî nîagaacûkangua nî vinya ûtarî wa mûndû.

²⁶ Cioneki ciîgiî magongoona ma kîraûko na ma kîvwaî marîa matarîrîtue nîkavinga. Nwatî nîmaigîtwe marî nthithorî, nîûndû nîgûgwîkara kavinda karaca nginya rîrîa magaatuîkîka.’

²⁷ “Nie Danieli nînathirirwe nî vinya ngoro na ngîrwara mîthenya mîngî. Nînaacokire ngîvora na ngîcoka wîrarî ûrîa naveetwe nî Mûthamaki. Nînamakire mûno nîûndû wa kîoneki kîu na ndiavota gûtaûkîrwa nî kîo.